ज्ञानेश कुमार यांनी निवडणूक यंत्रणा उदध्वस्त केली, मोदी-शाह मास्टरमाइंड: राहुल गांधींचा घणाघात

केंद्रीय निवडणूक आयोगाचे मुख्य निवडणूक आयुक्त ज्ञानेश कुमार आणि आयोगातल्या इतर दोन आयुक्तांमधले मतभेद उघड झाल्यामुळे देशभरातलं राजकारण तापलं आहे. निवडणूक आयुक्त सुखबीर संधू आणि विवेक जोशी या दोघांनी गेल्या १० महिन्यांत एसआयआर आणि निवडणूक प्रक्रियेशी संबंधित तब्बल १४ लेखी आक्षेप नोंदवले होते, असं वृत्त समोर आलं आहे. मतदार यादीत नावं समाविष्ट करणे आणि नावं वगळणे, तसेच निवडणूक प्रक्रियेच्या कार्यपद्धतीत झालेले बदल, या मुद्द्यांवरून या दोन आयुक्तांनी नोंदवलेल्या आक्षेपांमधून गंभीर प्रश्न उपस्थित करण्यात आले होते. मात्र ज्ञानेश कुमार यांनी या दोघांचे आक्षेप बाजूला सारून स्वतःच अंतिम निर्णय घेतले, असं वृत्तात म्हटलं आहे.

याच वादाच्या पार्श्वभूमीवर लोकसभेतील विरोधी पक्षनेते राहुल गांधी यांनी पत्रकार परिषद घेत निवडणूक आयोगावर जोरदार टीका केली. सत्ताविरोधी लाट असतानाही भारतीय जनता पक्ष प्रत्येक निवडणूक कशी जिंकतो, असा थेट सवाल त्यांनी या पत्रकार परिषदेत उपस्थित केला. महाराष्ट्र, हरियाणा आणि मध्य प्रदेश या तीन राज्यांतल्या निवडणुकांवर याचा परिणाम झाल्याचा आरोपही राहुल गांधी यांनी केला. देशाच्या संविधानावर सातत्याने हल्ले होत असल्याचं आणि लोकसभा तसंच विधानसभा निवडणुकांमध्ये मतदानाच्या प्रक्रियेत हेराफेरी झाल्याचंही ते या वेळी म्हणाले.

ज्ञानेश कुमार यांची निवड पंतप्रधान नरेंद्र मोदी आणि केंद्रीय गृहमंत्री अमित शाह यांनी केली होती, याकडे राहुल गांधी यांनी आवर्जून लक्ष वेधलं. ज्ञानेश कुमार यांनी प्रत्येक निवडणुकीत फेरफार केल्याचा गंभीर आरोप त्यांनी या वेळी केला. सत्ताविरोधी लाट हे भारतीय राजकारणाचं वास्तव असून मतचोरी हे प्रत्येक भारतीय नागरिकाच्या हक्कांचं उल्लंघन आहे, असं मत राहुल गांधी यांनी या पत्रकार परिषदेत मांडलं.

भारतीय जनता पक्षाच्या विजयाची पोलखोल झाली असून मतचोरीचे पुरावे आता समोर येत आहेत, असंही राहुल गांधी या वेळी म्हणाले. निवडणूक आयोगातल्या त्या दोन आयुक्तांनीच ज्ञानेश कुमार यांची पोलखोल केली आहे, असा दावा त्यांनी केला. २०२४ मध्येही मतचोरी झाली होती आणि निवडणूक यंत्रणा उदध्वस्त करण्यास ज्ञानेश कुमार जबाबदार आहेत, असा गंभीर आरोप राहुल गांधी यांनी केला. हा देशाच्या संविधानावरचा हल्ला असल्याचंही त्यांनी या वेळी स्पष्टपणे सांगितलं.

नरेंद्र मोदी आणि अमित शाह हेच या कथित कटाचे मास्टरमाइंड आहेत, यात आपल्याला कोणतीही शंका नाही, असं राहुल गांधी यांनी ठामपणे सांगितलं. नरेंद्र मोदी आणि अमित शाह यांनी देशातल्या लोकशाहीवर हल्ला करून ती उदध्वस्त करण्याचा प्रयत्न केल्याचा गंभीर आरोपही राहुल गांधी यांनी याच पत्रकार परिषदेत केला.