राज्यातील ३५८ पैकी २६५ तालुक्यांत दुष्काळ जाहीर, यादीत कोणते तालुके

राज्य सरकारने राज्यातील ३५८ पैकी तब्बल २६५ तालुक्यांमध्ये अधिकृतपणे दुष्काळाची घोषणा केली आहे. म्हणजेच जवळपास ७५ टक्के महाराष्ट्रात आता दुष्काळ जाहीर झाला असून, यावरून राज्यातील परिस्थिती किती गंभीर आहे याचा अंदाज येतो.

राज्यभरातून दुष्काळ जाहीर करण्याची मागणी सातत्याने होत होती. या पार्श्वभूमीवर मुख्यमंत्री देवेंद्र फडणवीस यांच्यासह दोन्ही उपमुख्यमंत्री आणि विरोधी पक्षांतील काही प्रमुख नेत्यांनी दुष्काळग्रस्त भागांचा दौरा केला होता. त्यानंतर विरोधकांकडूनही दुष्काळ जाहीर करून शेतकऱ्यांना तातडीने मदत देण्याची मागणी लावून धरण्यात आली होती. या सगळ्या घडामोडींनंतर आज सकाळी राज्यातील २६५ तालुक्यांत दुष्काळ जाहीर करण्यात आला. ७५ टक्के भागात दुष्काळ जाहीर झाल्यामुळे आता दुष्काळावरील विविध उपाययोजना प्रत्यक्षात राबवल्या जाणार आहेत. दुष्काळ जाहीर झाल्याने बाधित भागातील शेतकऱ्यांना सरकारी सवलती, कर्ज पुनर्गठन आणि दुष्काळी उपाययोजनांचा फायदा मिळणार आहे. राज्यातील दुष्काळसदृश परिस्थितीचा आढावा घेतल्यानंतर विविध जिल्ह्यांतील तालुक्यांचा या यादीत समावेश करण्यात आला असून, आपल्या तालुक्याचे नाव यादीत आहे की नाही, हे शेतकऱ्यांना आता तपासता येणार आहे.

पुणे विभागात पुणे जिल्ह्यातील हवेली, मुळशी, भोर, मावळ, जुन्नर, आंबेगाव अशा ६ तालुक्यांचा समावेश आहे. सांगली जिल्ह्यातील शिराळा, वाळवा, तासगाव, खानापूर, पलूस, कडेगाव या ६ तालुक्यांचा, साताऱ्यातील कराड, वाई, कोरेगाव, पाटण, जावळी या ५ तालुक्यांचा, तर कोल्हापूर जिल्ह्यातील करवीर, कागल, शिरोळ, हातकणंगले, गगनबावडा, शाहूवाडी या ६ तालुक्यांचा यात समावेश आहे.

कोकण विभागात ठाणे जिल्ह्यातील ठाणे, कल्याण, अंबरनाथ, भिवंडी, शहापूर, उल्हासनगर, मुरबाड या ७ तालुक्यांचा आणि पालघर जिल्ह्यातील पालघर, वसई, वाडा, जव्हार, मोखाडा, डहाणू, तलासरी, विक्रमगड या ८ तालुक्यांचा समावेश आहे. रायगड जिल्ह्यातील अलिबाग, पनवेल, पेण, कर्जत, खालापूर, उरण, सुधागड, माणगाव, रोहा, मुरूड, म्हसळा, महाड, पोलादपूर, तळा अशा तब्बल १४ तालुक्यांचा यात समावेश असून, रत्नागिरी जिल्ह्यातील मंडणगड, दापोली, खेड, चिपळूण, गुहागर, लांजा या ६ तालुक्यांचाही समावेश आहे. सिंधुदुर्ग जिल्ह्यातील सर्वच्या सर्व ८ तालुके यादीत आहेत, तर मुंबई उपनगरातील अंधेरी, बोरिवली, कुर्ला या ३ प्रशासकीय तालुक्यांचाही समावेश करण्यात आला आहे.

नाशिक विभागात नाशिक जिल्ह्यातील नाशिक, चांदवड, निफाड, त्र्यंबकेश्वर, दिंडोरी या ५ तालुक्यांचा समावेश आहे. धुळे जिल्ह्यातील सर्व ४, जळगाव जिल्ह्यातील सर्व १५, नंदुरबार जिल्ह्यातील सर्व ६ आणि अहिल्यानगर जिल्ह्यातील सर्व १४ तालुक्यांचा या यादीत समावेश करण्यात आला आहे.

नागपूर विभागात वर्धा जिल्ह्यातील कारंजा या १ तालुक्याचा, भंडारा जिल्ह्यातील साकोली, तुमसर, मोहाडी, लाखनी या ४ तालुक्यांचा आणि गोंदिया जिल्ह्यातील गोंदिया, अर्जुनी-मोरगाव, आमगाव, सडक-अर्जुनी, सालेकसा, गोरेगाव, देवरी या ७ तालुक्यांचा समावेश आहे. चंद्रपूर जिल्ह्यातील भद्रावती, राजुरा, बल्लारपूर, जिवती या ४ तालुक्यांचा, तर गडचिरोली जिल्ह्यातील अहेरी, आरमोरी, सिरोंचा, एटापल्ली, कोरची, कुरखेडा, धानोरा, देसाईगंज (वडसा), भामरागड, मुलचेरा अशा १० तालुक्यांचाही यात समावेश आहे.

सोलापूर जिल्ह्यातील सर्वच्या सर्व ११ तालुक्यांचा या यादीत समावेश करण्यात आला आहे. छत्रपती संभाजीनगर विभागात छत्रपती संभाजीनगर, जालना, बीड, लातूर, धाराशिव आणि हिंगोली जिल्ह्यांतील अनेक तालुक्यांचा दुष्काळग्रस्त क्षेत्रात समावेश असल्याचे नमूद करण्यात आले आहे. उपलब्ध माहितीनुसार, नांदेड जिल्ह्यातील माहूर आणि धर्माबाद या दोन तालुक्यांचा, तसेच परभणी जिल्ह्यातील बसमत तालुक्याचाही या यादीत समावेश असल्याचे नमूद करण्यात आले आहे.