पूर्णेकर हत्येच्या तपासासाठी DCP अमरसिंह जाधव यांच्या नेतृत्वात SIT स्थापन, समतानगरमधून दोन मोटारसायकली जप्त

शिवसेना उबाठाचे विभाग प्रमुख प्रदीप ऊर्फ 'बाला' पूर्णेकर यांची निर्घृण हत्या झाली असून या घटनेने ठाणे शहरासह संपूर्ण महाराष्ट्र हादरला आहे. घटनेचे गांभीर्य लक्षात घेऊन ठाणे पोलिसांनी तपासाची चक्रे वेगाने फिरवली आहेत. या प्रकरणाचा सखोल आणि निष्पक्ष तपास व्हावा, यासाठी विशेष तपास पथकाची म्हणजे SIT ची स्थापना करण्यात आली आहे. गुन्हे शाखेचे पोलिस उपायुक्त (DCP) अमरसिंह जाधव यांच्या नेतृत्वात हे पथक काम करणार आहे.

गुरुवारी (1 ऑक्टोबर) सायंकाळपासूनच या पथकाने घटनास्थळी जाऊन पुरावे गोळा करायला सुरुवात केली. साडेचारच्या सुमारास SIT चे मुख्य पथक फॉरेन्सिक टीमसह तिथे पोहोचले. त्यांनी परिसराची बारकाईने पाहणी केली आणि काही महत्त्वाचे तांत्रिक सुराग व डिजिटल पुरावे ताब्यात घेतले.

तपासाला गती मिळावी म्हणून या पथकात पोलीस कर्मचाऱ्यांसह एकूण 23 अनुभवी अधिकाऱ्यांचा समावेश करण्यात आला आहे. त्यात 2 सहाय्यक पोलिस आयुक्त, 3 वरिष्ठ पोलिस निरीक्षक, 6 सहाय्यक पोलिस निरीक्षक आणि 3 पोलिस उपनिरीक्षक आहेत. सध्या या तपासासाठी पाच पथके सक्रिय आहेत.

घटनास्थळाची पाहणी झाल्यावर SIT च्या एका विशेष पथकाने लगेच समतानगर परिसरात जाऊन शोधमोहीम राबवली. या कारवाईत पोलिसांनी संशयित आरोपींच्या दोन मोटारसायकली जप्त केल्या आहेत. प्राथमिक अंदाजानुसार, हत्या केल्यानंतर आरोपींनी आपल्या दुचाकी समतानगर येथे सोडून दिल्या आणि तिथून आधीच ठरवलेल्या चारचाकी गाडीतून ते पसार झाले.

आरोपी ठाण्याबाहेर किंवा राज्याबाहेर पळून गेले असण्याची शक्यता लक्षात घेऊन SIT च्या तपासाची व्याप्ती वाढवण्यात आली आहे. गरज पडली तर हे पथक दुसऱ्या राज्यातही जाणार असल्याचे सूत्रांनी सांगितले.

सध्या पोलीस परिसरातील सगळे सीसीटीव्ही फुटेज, कॉल डिटेल्स रेकॉर्ड्स (CDR) आणि तांत्रिक विश्लेषण यांच्या आधारे संशयितांचा माग काढत आहेत. घटनेचे गांभीर्य लक्षात घेऊन SIT गठित करण्यात आली असून तपासाची दिशा स्पष्ट आहे, असे सांगण्यात आले. घटनास्थळावरून काही महत्त्वाचे सुराग मिळाले असून जप्त केलेल्या वाहनांवरूनही आरोपींचा शोध घेतला जात आहे.

या हत्येमागचा सूत्रधार आणि मुख्य आरोपी लवकरच पोलिसांच्या जाळ्यात असतील, अशी माहिती DCP अमरसिंह जाधव यांनी दिली.