पुढच्या वर्षीच्या पावसाला एल निनोचा धोका, जुलै 2027 पर्यंत धरणातील पाणी पिण्यासाठी राखीव ठेवण्याच्या तयारीत
राज्यातील 265 तालुक्यांत दुष्काळसदृश स्थिती असतानाच पुढच्या वर्षीच्या पावसावरही एल निनोचा परिणाम होण्याची शक्यता, मुख्यमंत्री देवेंद्र फडणवीस यांचे नागपुरात संकेत.
राज्यातील 265 तालुक्यांमध्ये दुष्काळसदृश स्थिती असतानाच पुढच्या वर्षीच्या पावसावरही एल निनोचा परिणाम होण्याची शक्यता समोर आली आहे. यंदा एल निनोमुळेच राज्याच्या बहुतांश भागात पुरेसा पाऊस पडला नाही, आणि त्याचा फटका आत्तापासूनच पाणीटंचाईच्या रूपात जाणवू लागला आहे. पुढील काळात एल निनोचा प्रभाव आणखी वाढू शकतो असा अंदाज असून तसे झाल्यास त्याचा विपरीत परिणाम पुढच्या वर्षीच्या पावसावर होऊ शकतो.
ही स्थिती लक्षात घेऊन राज्य सरकारने जुलै 2027 पर्यंतच्या पिण्याच्या पाण्याचे नियोजन करण्यासाठी पावले उचलण्यास सुरुवात केली आहे. प्रत्येक जिल्ह्याला तिथे उपलब्ध असलेला पाणीसाठा किती आहे आणि जुलै 2027 पर्यंत त्या जिल्ह्याला लागणारी पाण्याची गरज किती असेल, याचा आढावा घेऊन स्वतःचा स्वतंत्र आराखडा तयार करण्याच्या सूचना देण्यात आल्या आहेत. मुख्यमंत्री देवेंद्र फडणवीस यांनी सांगितले की, राज्यातील काही मोठ्या धरणांमध्ये सध्या पुरेसा पाणीसाठा शिल्लक आहे. अशा धरणांमधील पाणी जुलै 2027 पर्यंत केवळ पिण्यासाठीच राखीव ठेवून, त्यानंतर उरलेल्या पाण्याचा वापर उद्योगांसाठी आणि रब्बी पिकांसाठी करण्याचा निर्णय घेतला जाऊ शकतो, असे त्यांनी नमूद केले. रविवारी नागपुरात आयोजित करण्यात आलेल्या पत्रकार परिषदेत ते बोलत होते.
एल निनोबाबत बोलताना फडणवीस म्हणाले की, सध्याचा एल निनो अजून शिगेला पोहोचलेला नाही, तज्ज्ञांच्या अंदाजानुसार पुढच्या वर्षी फेब्रुवारी महिन्यात तो सर्वोच्च पातळीवर पोहोचेल आणि त्यानंतर तो हळूहळू कमी होत जाईल. पॅसिफिक महासागरातील उष्णतेमुळे एल निनो तयार होतो, आणि हा महासागर कुल डाऊन झाल्यावर वातावरणातही बदल होऊन एल निनोचा इफेक्ट कमी होईल, असे साधारण चित्र त्यांनी मांडले. मात्र तोपर्यंत सर्व प्रकारच्या तयारीत राहावे लागेल, आणि एल निनोचा इफेक्ट आणखी वाढलाच तर त्यातून येणाऱ्या अडचणींसाठीही सज्ज राहावे लागेल, असे त्यांनी स्पष्ट केले.
दुष्काळाच्या पार्श्वभूमीवर फडणवीस यांनी नागरिकांनी सामाजिक संवेदनशीलता दाखवण्याचे आवाहनही केले. अनावश्यक खर्च टाळून केवळ गरजेच्या बाबींवरच खर्च करावा, आणि प्रत्येकाने आपापल्या पातळीवर बचत करून दुष्काळग्रस्तांसाठी काही मदत करता येईल का, हे पाहावे, असे त्यांनी सांगितले.
यापूर्वी शनिवारी राज्य सरकारने महाराष्ट्रातील 265 तालुक्यांमध्ये ट्रिगर 1 दुष्काळ जाहीर केला होता, म्हणजेच राज्यातील 75 टक्के भागात दुष्काळ जाहीर झाला आहे. दुष्काळ जाहीर झाल्यामुळे आता विविध उपाययोजना जाहीर करून त्यांची अंमलबजावणी सुरू केली जाणार आहे.
ही बातमी प्रकाशित झाली आहे पण थेट मालिका सुरू झालेली नाही. डेस्कने अपडेट दाखल करताच तो इथे दिसेल.
