चंद्रपूर तालुक्यात दुष्काळामुळे खरीप पिकांचे पंचनामे सुरू, 17 हजार हेक्टरची पाहणी होणार

चंद्रपूर तालुक्यात दुष्काळामुळे झालेल्या पीक नुकसानीचे पंचनामे सुरू झाले आहेत. शासनाने दुष्काळग्रस्त तालुक्यांची यादी जाहीर केली आणि त्यात चंद्रपूर तालुक्याचा समावेश झाला. त्यानंतर खरीप पिकांच्या नुकसानीचे सर्वेक्षण सुरू करण्यात आले.

तालुक्यात यंदाच्या खरीप हंगामात सुमारे 17 हजार हेक्टर क्षेत्रावर वेगवेगळ्या पिकांची लागवड झाली होती. या सगळ्या क्षेत्रातील पिकांची प्रत्यक्ष पाहणी करून पंचनामे केले जाणार आहेत.

हे पंचनामे ग्राम महसूल अधिकारी, ग्रामपंचायत अधिकारी आणि कृषी सहाय्यक मिळून संयुक्तपणे करत आहेत. संबंधित पथक प्रत्यक्ष शेतात जाऊन पिकांची पाहणी करणार आहे. सर्वेक्षण आणि पंचनाम्याची प्रक्रिया शेतकऱ्यांच्या उपस्थितीत पूर्ण होईल. कोणताही शेतकरी पंचनाम्यापासून वंचित राहू नये, असा यामागचा उद्देश आहे.

वलनी येथे उपविभागीय अधिकारी विशालकुमार मेश्राम यांनी नुकसान झालेल्या धान पिकाची पाहणी केली. ही पाहणी शेतकरी संतोष आत्राम यांच्या शेतात झाली. तेव्हा चंद्रपूरचे उपविभागीय अधिकारी विशालकुमार मेश्राम, तहसीलदार विजय पवार, नायब तहसीलदार ओंकार ठाकरे, तालुका कृषी अधिकारी अनिकेत माने, मंडळ अधिकारी विशाल कुरेवार, तलाठी रमेश झिटे, पोलिस पाटील अशोक मेश्राम आणि ई-पीक पाहणी सर्व्हेअर विशाल गेडाम उपस्थित होते. शेतकरी सुखदेव पेंदराम, वनपाल गेडाम आणि रोहित पेंद्राम हेही त्या वेळी हजर होते.

दुष्काळी परिस्थितीत शेतकऱ्यांच्या पिकांच्या नुकसानीची वस्तुनिष्ठ नोंद व्हावी, कोणताही नुकसानग्रस्त शेतकरी पंचनाम्यापासून वंचित राहू नये आणि शासनाला अचूक माहिती मिळावी, यासाठी ही कार्यवाही सुरू आहे. महसूल, ग्रामविकास आणि कृषी विभाग एकमेकांच्या समन्वयाने हे काम करत आहेत.

काम नियोजनबद्ध आणि वेगाने पूर्ण व्हावे, म्हणून चंद्रपूर तालुक्यात एकूण 11 पथक प्रमुख नेमण्यात आले आहेत. मंडळ अधिकारी आणि तालुका कृषी अधिकारी यांच्याकडे पथक प्रमुख म्हणून जबाबदारी दिली आहे. त्यांच्या देखरेखीखाली त्या त्या गावांमध्ये संयुक्त पथके शेतपिकांच्या नुकसानीचे सर्वेक्षण आणि पंचनामे करतील. प्रक्रियेत पारदर्शकता राहावी, प्रत्यक्ष नुकसानीची योग्य नोंद व्हावी आणि पात्र शेतकऱ्यांची माहिती अचूक गोळा व्हावी, यासाठी पंचनामे करताना संबंधित शेतकऱ्यांची उपस्थिती निश्चित केली जाणार आहे. सर्वेक्षणात पिकांची सध्याची स्थिती आणि नुकसान याबद्दल आवश्यक माहिती नोंदवली जाईल.

पंचनामे पूर्ण झाल्यावर संयुक्त पथकांनी तयार केलेल्या याद्या त्या त्या गावाच्या चावडीवर प्रसिद्ध केल्या जाणार आहेत. त्यामुळे आपल्या नुकसानीची पंचनाम्यात नोंद झाली आहे की नाही, हे शेतकऱ्यांना गावातच समजू शकेल.