आगरझरी तलावाजवळ शेतात काम करणाऱ्या 60 वर्षीय महिलेचा वाघाच्या हल्ल्यात मृत्यू

ताडोबा-अंधारी व्याघ्र प्रकल्पाच्या मोहर्ली वनपरिक्षेत्रातील आगरझरी तलाव परिसरात सोमवारी, 5 ऑक्टोबर रोजी दुपारी वाघाने केलेल्या हल्ल्यात एका 60 वर्षीय महिलेचा मृत्यू झाला. ही घटना दुपारी सुमारे 2.35 वाजता घडली.

तलावाला लागून असलेल्या शेतात ही महिला खताची पिशवी धुत होती. त्या वेळी तलावाच्या दिशेने अचानक आलेल्या वाघाने तिच्यावर हल्ला केला. वाघाने तिला काही अंतर ओढत नेल्याची प्राथमिक माहिती आहे.

मृत महिलेचे नाव सौ. मंदाबाई सूर्यभान मंगाम (वय अंदाजे 60 वर्षे) असे असून त्या आगरझरी येथील रहिवासी होत्या. त्यांच्या पश्चात एक मुलगा आणि एक मुलगी आहे. वन विभागाने दिलेल्या माहितीनुसार, ही घटना सर्वे क्रमांक 10/4, कंपार्टमेंट क्रमांक 187 परिसरात घडली. ग्रामस्थांच्या म्हणण्यानुसार, आगरझरी परिसरात वाघाच्या हल्ल्याची ही आतापर्यंतची तिसरी घटना आहे.

घटनेची खबर मिळताच मृतदेह पाहण्यासाठी ग्रामस्थांनी घटनास्थळी मोठी गर्दी केली. त्याच वेळी परिसरातच असलेल्या वाघाने जमावाच्या दिशेने चार्ज केला आणि लोकांमध्ये घबराट पसरली. वाघापासून वाचण्यासाठी पळताना काही ग्रामस्थ खाली पडले. झाडावर चढलेली एक व्यक्तीही खाली पडल्याची माहिती आहे.

परिस्थिती गंभीर झाल्याचे लक्षात येताच वन विभागाचे कर्मचारी तत्काळ घटनास्थळी पोहोचले आणि त्यांनी ग्रामस्थांना सुरक्षित अंतरावर हलवले. वन कर्मचाऱ्यांच्या सतर्कतेमुळे परिस्थिती नियंत्रणात आली आणि पुढचा अनर्थ टळला.

या घटनेनंतर वन विभागाने परिसरात ट्रॅप कॅमेरे बसवले असून वाघाच्या हालचालींवर लक्ष ठेवायला सुरुवात केली आहे. नागरिकांच्या सुरक्षेसाठी वन कर्मचाऱ्यांची गस्त आणि निगराणीही वाढवण्यात आली आहे.

आगरझरीच्या ग्रामस्थांनी वन विभागाचे वाहन अडवले आणि वाघाला पिंजरा लावून पकडण्याची मागणी केली. तलाव परिसरातील कचरा साफ करावा, शेतकऱ्यांना शेतीच्या कामासाठी सुरक्षितपणे शेतात जाण्यास मदत करावी आणि गरज असेल तिथे वन कर्मचाऱ्यांनी सोबत यावे, अशाही मागण्या त्यांनी केल्या. मृत महिलेच्या मुलाला वन विभागात रोजगाराची संधी द्यावी, अशी मागणीही करण्यात आली.

मोहर्लीचे वनपरिक्षेत्र अधिकारी संतोष थिपे यांनी ग्रामस्थांशी बोलून त्यांच्या मागण्या जाणून घेतल्या. वाघाची हालचाल लक्षात घेता परिसरात नळ सुरू करताना वन कर्मचारी सोबत ठेवणे, परिसरातील कचरा साफ करणे आणि शेतकऱ्यांना शेतीच्या कामासाठी आवश्यक ती मदत करणे, याबाबत कार्यवाही करण्याचे आश्वासन त्यांनी दिले. दुर्गापूर पोलीस ठाण्याचे पोलीस निरीक्षक एस. बी. शेगावकर यांनीही ग्रामस्थांशी बोलून परिस्थिती शांत करण्याचा प्रयत्न केला.

वन विभागाने मृत महिलेच्या कुटुंबीयांना तात्काळ मदत म्हणून 50 हजार रुपयांची आर्थिक मदत दिली. मृतदेह शवविच्छेदनासाठी चंद्रपूर येथे पाठवण्यात आला आहे.

घटनास्थळी आगरझरीचे क्षेत्र सहाय्यक ए. पी. तिजारे, मोहर्ली वनपरिक्षेत्रातील वन कर्मचारी, दुर्गापूर पोलीस ठाण्याचे पोलीस निरीक्षक एस. बी. शेगावकर, जाकीर कुरेशी, नरेश एलपुलवार यांच्यासह पोलीस कर्मचारी उपस्थित होते. पोलीस पाटील सौ. सिंधुबाई आत्राम आणि आगरझरीचे ग्रामस्थही तिथे हजर होते.

वन विभागाने नागरिकांना तलाव आणि जंगलालगतच्या भागात विनाकारण गर्दी न करण्याचे आवाहन केले आहे. एकट्याने शेतात किंवा जंगलालगतच्या भागात जाऊ नये, असेही सांगण्यात आले आहे. वाघाच्या हालचालींवर लक्ष ठेवून नागरिकांच्या सुरक्षेसाठी आवश्यक उपाययोजना सुरू ठेवण्यात आल्या आहेत.