पूर्णेकर हत्येचा तपास: मिरा रोडमधून तीन महिलांसह पाच जण पोलिसांच्या ताब्यात

ठाणे : शिवसेना (ठाकरे गट) विभागप्रमुख प्रदीप उर्फ बाळू पूर्णेकर यांच्या हत्येचा तपास पुढे सरकत असताना पोलिसांच्या हाती नवे धागेदोरे लागत आहेत. मिरा रोड परिसरातून तीन महिलांसह एकूण पाच जणांना पोलिसांनी चौकशीसाठी ताब्यात घेतले आहे.

या तिन्ही महिलांचा मुख्य संशयित पप्या शिंदे याच्याशी संपर्क असल्याचा पोलिसांना संशय आहे. हत्येच्या कटात त्यांची काही भूमिका होती का, याचा तपास सुरू आहे. ताब्यात घेतलेल्या महिलांचा पप्या शिंदेशी संपर्क होता, अशी माहिती पोलिसांच्या तपासात समोर आली आहे.

पूर्णेकर आणि पप्या शिंदे यांच्यात पूर्वी जवळचे संबंध होते, असेही तपासातून पुढे आले आहे. त्यामुळे या महिलांचा पूर्णेकर यांच्याशी जुना वाद होता का, किंवा हत्येच्या आधी त्यांच्यात काही संपर्क झाला होता का, या दिशेने पोलीस चौकशी करत आहेत.

पप्या शिंदे याला पोलिसांनी या प्रकरणात अटक केली आहे. तो पूर्णेकर यांचा पूर्वीचा जवळचा सहकारी असल्याचे पोलिसांनी सांगितले. हल्ल्याच्या वेळी तो घटनास्थळी हजर होता, अशीही पोलिसांची माहिती आहे.

प्रकरणाचे गांभीर्य पाहून विशेष तपास पथक म्हणजेच SIT स्थापन करण्यात आले आहे. गुन्हे शाखेचे पोलीस उपायुक्त अमरासिंह जाधव यांच्या नेतृत्वाखाली हे पथक तपास करत आहे. दिलेल्या माहितीनुसार या पथकात सहायक पोलीस आयुक्त, वरिष्ठ पोलीस निरीक्षक, सहायक पोलीस निरीक्षक, पोलीस उपनिरीक्षक आणि इतर कर्मचारी धरून एकूण २३ अधिकारी आहेत.

हत्येतील आरोपींची नेमकी भूमिका ठरवण्यासाठी सीसीटीव्ही फुटेज, तांत्रिक माहिती आणि इतर उपलब्ध पुरावे तपासले जात आहेत. आरोपींच्या शोधासाठी पोलिसांनी याआधीच अनेक पथके रवाना केली आहेत.

दरम्यान, पूर्णेकर यांच्या कुटुंबीयांनी माजी ठाणे महापौर मीनाक्षी शिंदे आणि त्यांचे पती राजेंद्र शिंदे यांच्यावर हत्येच्या कटात सहभागी असल्याचा आरोप केला आहे. या आरोपांनंतर पोलिसांनी पुरवणी जबाबात या दोघांची नावे घेतल्याचे वृत्त आहे. मीनाक्षी शिंदे यांनी मात्र हे आरोप फेटाळले आहेत. आपल्याला या प्रकरणात गोवण्याचा प्रयत्न होत आहे, असे त्यांनी म्हटले आहे.

पप्या शिंदेपासून ते आता ताब्यात घेतलेल्या पाच जणांपर्यंत आणि कुटुंबीयांनी केलेल्या आरोपांपर्यंत तपास कोणत्या दिशेने जातो, याकडे सगळ्यांचे लक्ष लागले आहे.

हत्येनंतर परिसरात तणावाचे वातावरण होते. पूर्णेकर यांच्या कुटुंबीयांनी आरोपींवर कारवाई करा, अशी मागणी करत मृतदेह ताब्यात घेण्यास नकार दिला होता. पोलीस ठाण्याबाहेर समर्थकांची गर्दी जमल्यानंतर मोठा बंदोबस्त लावण्यात आला होता. मीनाक्षी शिंदे यांच्या निवासस्थानाबाहेरही सुरक्षा वाढवण्यात आल्याची माहिती आहे. हत्येमागचा नेमका कट, आरोपींची भूमिका आणि इतर संबंधित लोकांचा सहभाग याचा तपास SIT करत आहे.