नागपुरात डिलिव्हरी बॉयच्या वेशात लूटमारीचा प्रयत्न करणाऱ्या तरुणाचा नागरिकांच्या मारहाणीत मृत्यू

नागपूर : डिलिव्हरी बॉय बनून घरात शिरलेल्या आणि एका वृद्ध महिलेला लुटण्याचा प्रयत्न करताना रंगेहाथ पकडल्या गेलेल्या अपराधी प्रवृत्तीच्या तरुणाला नागरिकांनी बेदम मारहाण केली. त्याला रुग्णालयात नेत असताना त्याचा मृत्यू झाला. या घटनेमुळे नागपूर शहर पोलीस दलात खळबळ उडाली आहे. पोलीस अधिकारी या घटनेची माहिती देण्याचे टाळत आहेत.

ही घटना मंगळवारी दुपारी बेलतरोडी पोलीस स्टेशनच्या हद्दीतील पृथ्वीराज सोसायटीत घडली. मृत तरुण नरसाळा येथील रहिवासी असून त्याचे नाव सुमेध राजेंद्र गजभिये (वय 28) असल्याचे सांगितले जाते. त्याचा साथीदार दीपक पाटील हाही जखमी झाल्याची माहिती आहे. मात्र तो घटनास्थळावरून पळून गेल्यामुळे त्याचा जीव वाचला आहे.

पोलीस सूत्रांच्या म्हणण्यानुसार सुमेध चोरीच्या गुन्ह्यांत गुंतलेला आहे. मंगळवारी दुपारी अडीचच्या सुमारास तो आपला साथीदार दीपक पाटील याच्यासोबत बाईकवरून पृथ्वीराज सोसायटीत आला. त्यांनी 61 वर्षांच्या उषा देवीदास धार्मिक यांच्या घराचा दरवाजा वाजवला. दोघांनीही फूड डिलिव्हरी एजंटसारखे टी-शर्ट घातले होते. पार्सल द्यायचे आहे, असे सांगून त्यांनी उषा यांना दरवाजा उघडायला लावला. हे दोघे डिलिव्हरी बॉय आहेत, असे समजून उषा यांनी दरवाजा उघडला.

दरवाजा उघडताच सुमेध घरात शिरला, तर दीपक पाटील बाहेरच थांबला होता. सुमेधने उषा धार्मिक यांना चाकू दाखवून धमकावले आणि त्यांची चेन ओढण्याचा प्रयत्न केला. त्यामुळे उषा यांनी आरडाओरडा सुरू केला. त्यांचा आवाज ऐकून घरात असलेला त्यांचा मुलगा मदतीला धावला आणि त्याने सुमेधला पकडले. त्याने मदतीसाठी शेजाऱ्यांनाही हाक मारली. शेजारी धावत आले आणि नेमके काय झाले हे समजल्यावर परिसरातील इतर नागरिकही तिथे जमा झाले. त्यांनी सुमेध आणि दीपक यांना घेरले.

भरदिवसा लूटमार होत असल्याचे कळल्याने नागरिक संतापले. त्यांनी दोघांनाही लाथाबुक्क्यांनी मारले. दीपक पाटील जीव वाचवून पळून गेला, पण सुमेध नागरिकांच्या तावडीत सापडला आणि त्यालाही मारहाण झाली. घटनेची माहिती मिळताच बेलतरोडी पोलीस तिथे पोहोचले. त्यांनी सुमेधला मेडिकलमध्ये नेले, पण तिथे त्याला मृत घोषित करण्यात आले.

या प्रकाराला नागरिक पोलिसांच्या 'स्लो रिस्पॉन्स'ला जबाबदार धरत आहेत. बेलतरोडी पोलिसांना घटनास्थळी पोहोचायला जवळपास अर्धा तास लागला, असे त्यांचे म्हणणे आहे. या काळात मारहाणीमुळे जखमी झालेल्या सुमेधची प्रकृती नाजूक झाली. सुमेधविरुद्ध चोरीचा गुन्हा दाखल असल्याचे समजले आहे. प्रकरण अतिशय संवेदनशील असल्यामुळे पोलिसांचीही झोप उडाली आहे.