नागपूर पदवीधर निवडणूक: चौघांचे अर्ज दाखल, कोहळे यांच्या अर्जासाठी भाजपची रॅली रद्द

विधानपरिषदेच्या नागपूर विभाग पदवीधर मतदारसंघाच्या निवडणुकीसाठी उमेदवारी अर्ज भरण्याचा दिवस चांगलाच गजबजलेला होता. काँग्रेसचे अभिजित वंजारी आणि भाजपचे सुधाकर कोहळे यांनी अर्ज भरले. भाजपचे दोन बंडखोर अनिल सोले आणि अॅड. रमण सेनाड, तसेच राष्ट्रवादी शरद पवार गटाचे बंडखोर कराळे यांनीही अर्ज दाखल केले. त्यांच्याशिवाय आणखी काही उमेदवारांनीही समर्थकांसह येऊन अर्ज भरले.

विभागीय आयुक्त कार्यालयाच्या परिसराला एखाद्या राजकीय कार्यक्रमाचे रूप आले होते. प्रमुख पक्षांच्या उमेदवारांनी सोमवारी अर्ज भरणार असल्याचे आधीच जाहीर केले होते. त्यामुळे प्रशासनाने तिथे व्यवस्था केली होती आणि संपूर्ण परिसरात पोलीस बंदोबस्त कडक ठेवण्यात आला होता. विभागीय आयुक्त आणि निवडणूक निर्णय अधिकारी विजयालक्ष्मी बिदरी यांच्याकडे सर्व अर्ज सादर झाले.

काँग्रेस महाविकास आघाडीचे उमेदवार वंजारी यांची रॅली राष्ट्रवादी काँग्रेसचे (शप) नेते अनिल देशमुख यांच्या जीपीओ परिसरातील घरातून निघाली. या रॅलीतून काँग्रेसने एकजूट दाखवली. प्रदेशाध्यक्ष हर्षवर्धन सपकाळ, माजी प्रदेशाध्यक्ष नाना पटोले, काँग्रेस विधिमंडळ पक्षनेते विजय वडेट्टीवार, आमदार विकास ठाकरे, माजी मंत्री सुनील केदार, राजेंद्र मुळक आणि रणजित कांबळे रॅलीत होते. आमदार संजय मेश्राम, माजी आमदार अशोक धवड, अतुल लोंढे, अतुल कोटेचा, राष्ट्रवादीचे शहराध्यक्ष दुनेश्वर पेठे, इतर प्रमुख पदाधिकारी आणि नगरसेवकही सहभागी झाले. वंजारी यांनी दुपारी बारा वाजता अर्ज भरला. त्यानंतर जवाहर विद्यार्थीगृह येथे त्यांच्या प्रचाराचा श्रीगणेशा झाला. निवडणुकीत जागा दाखवू, असे वंजारी म्हणाले.

भाजपने कोहळे यांच्या अर्जासाठी जोरदार तयारी केली होती. सिव्हिल लाईन्समधील स्वागत लॉनपासून रॅली निघणार होती. पण पालकमंत्री चंद्रशेखर बावनकुळे यांनी दुष्काळाच्या पार्श्वभूमीवर अर्ज साधेपणाने भरावा, अशी सूचना केली आणि रॅली रद्द झाली. बावनकुळे, राज्यमंत्री आशिष जयस्वाल व पंकज भोयर, प्रदेश उपाध्यक्ष उपेंद्र कोठेकर, शहराध्यक्ष दयाशंकर तिवारी, आमदार प्रवीण दटके, विष्णु चागदे आणि कार्यकर्ते मात्र एकत्र जमले होते.

कोहळे हे माजी आमदार आहेत. अनिल सोले यांनी अर्ज भरला असला तरी शेवटी ते पक्षाच्या हितासाठी माघार घेतील, अशी अपेक्षा त्यांनी व्यक्त केली. सोले माझे राजकीय गुरू आहेत आणि पक्षनेतृत्वासह सगळे पदाधिकारी व कार्यकर्ते आपल्यासोबत आहेत, असा दावा कोहळे यांनी केला.

सोले, सेनाड आणि राष्ट्रवादी काँग्रेसचे (शप) बंडखोर नितेश कराळे हे तिघे दहा-पंधरा मिनिटांच्या अंतराने अर्ज भरायला आले. सोले यांचे आगमन होताच कार्यकर्त्यांनी घोषणा देऊन परिसर दणाणून सोडला. सेनाड यांच्यासोबतही बऱ्यापैकी समर्थक होते. कराळे यांनी संविधान चौकातून रॅली काढली. ते पगडी घालून आले होते आणि महात्मा गांधी यांच्या वेशातील एक कार्यकर्ता तसेच काही महिला कार्यकर्त्याही त्यांच्यासोबत होत्या.