दुष्काळग्रस्त शेतकऱ्यांसाठी शिंदेंचे आवाहन: सणांवरील खर्च कमी करा, बचतीतून शेतकऱ्यांना मदत करा

राज्यात दुष्काळासारखी भीषण परिस्थिती निर्माण झाली आहे. अशा वेळी अन्नदात्याच्या पाठीशी खंबीरपणे उभे राहण्यासाठी येणारा नवरात्रोत्सव आणि इतर धार्मिक-सांस्कृतिक कार्यक्रम अगदी साधेपणाने साजरे करावेत, असे आवाहन उपमुख्यमंत्री एकनाथ शिंदे यांनी केले आहे. मुंबईतून केलेल्या या आवाहनात त्यांनी शिवसेनेचे पदाधिकारी, सार्वजनिक मंडळे आणि नागरिकांना उद्देशून सांगितले की, या उत्सवांमध्ये जो निधी वाचेल तो थेट दुष्काळग्रस्त शेतकऱ्यांना मदत म्हणून द्यावा.

यंदा विदर्भ, मराठवाडा आणि राज्यातील इतर भागांत पावसाने ओढ दिली आहे. त्यामुळे बहुतांश ठिकाणी दुष्काळाचे सावट पसरले आहे. निसर्गाच्या कोपामुळे उभी पिके करपून गेल्याने हजारो शेतकरी हवालदिल झाले आहेत. या बिकट परिस्थितीवर बोलताना शिंदे यांनी "राज्याच्या तिजोरीवर पहिला हक्क आमच्या बळीराजाचा आहे," या आपल्या भूमिकेचा पुन्हा एकदा उल्लेख केला.

अशा संकटाच्या काळात महायुती सरकार आणि शिवसेना पक्ष पूर्ण ताकदीने शेतकऱ्यांच्या पाठीशी ठामपणे उभा आहे, असे शिंदे यांनी सांगितले. सरकारी पातळीवर सर्वतोपरी मदतीच्या उपाययोजना सुरू आहेतच. पण एक समाज म्हणूनही प्रत्येकाने पुढे येऊन या परिस्थितीत आपले योगदान देणे गरजेचे आहे, असेही त्यांनी नमूद केले.

शेतकरी बांधव संकटात आणि चिंतेत असताना येणारे सण-उत्सव मोठ्या थाटामाटात आणि धुमधडाक्यात साजरे करणे योग्य ठरणार नाही, असे त्यांचे म्हणणे आहे. म्हणूनच सार्वजनिक मंडळे, शिवसेनेचे सर्व पदाधिकारी, सामाजिक संस्था आणि नागरिक यांनी उत्सव अगदी साधेपणाने साजरे करावेत, असे ते म्हणाले. उत्सवांवर होणाऱ्या अवाढव्य खर्चाला फाटा देऊन वाचलेला निधी दुष्काळग्रस्त शेतकरी बांधवांच्या थेट मदतीसाठी आणि पुनर्वसनासाठी वर्ग करावा, असेही त्यांनी सांगितले.

आपला अन्नदाता संकटात असताना आपण सर्वजण त्याच्या मदतीला धावून गेलो, तर या नैसर्गिक आपत्तीवर मात करणे सहज शक्य होईल, असा विश्वास उपमुख्यमंत्री एकनाथ शिंदे यांनी व्यक्त केला आहे. उत्सवाच्या खर्चात बचत करून जर आपण एका जरी शेतकऱ्याच्या डोळ्यांतील अश्रू पुसू शकलो आणि त्याच्या चेहऱ्यावर हास्य आणू शकलो, तर तीच आदिशक्ती जगदंबेची खरीखुरी सेवा ठरेल, असेही ते म्हणाले.