ठाण्यात ठाकरे गटाच्या विभाग प्रमुखावर गोळीबार, उपचारादरम्यान मृत्यू

ठाण्यात मंगळवारी रात्री झालेल्या गोळीबाराच्या घटनेमुळे शहरातील राजकीय आणि सामाजिक वर्तुळात एकच खळबळ उडाली आहे. शिवसेना (उद्धव बाळासाहेब ठाकरे गट) यांचे पदाधिकारी प्रदीप पूर्णेकर यांच्यावर अज्ञात हल्लेखोरांनी गोळीबार केला. या हल्ल्यात गंभीर जखमी झालेल्या पूर्णेकर यांचा रुग्णालयात उपचार सुरू असताना मृत्यू झाला. घटनेनंतर पोलिसांनी तपासाला वेग दिला आहे. हल्लेखोरांचा शोध घेण्यासाठी पोलीस परिसरातील CCTV फुटेज आणि इतर पुरावे तपासत आहेत.

ही घटना कपूरबावडी पोलीस स्टेशनच्या हद्दीतील मनोरमानगर-गणेशनगर परिसरात मंगळवारी रात्री सुमारे 9 वाजता घडली. अज्ञात हल्लेखोरांनी पूर्णेकर यांच्यावर 2 राउंड फायर केले आणि ते लगेच घटनास्थळावरून पसार झाले. काही प्रत्यक्षदर्शींच्या माहितीनुसार, हल्लेखोरांनी आपले चेहरे झाकलेले होते.

गोळीबारात गंभीर जखमी झालेल्या पूर्णेकर यांना तातडीने आर मॉलजवळ असलेल्या 'इन्फिनिटी हॉस्पिटल'मध्ये (Infinity Hospital) उपचारासाठी दाखल करण्यात आले. तिथे डॉक्टरांनी त्यांना वाचवण्यासाठी शर्थीचे प्रयत्न केले. पण गंभीर दुखापतींमुळे उपचारादरम्यान त्यांचा मृत्यू झाला. पोलिसांनीही त्यांच्या मृत्यूच्या बातमीला अधिकृत दुजोरा दिला आहे.

प्रदीप पूर्णेकर हे ठाण्यात शिवसेना उबाठाचे विभाग प्रमुख म्हणून सक्रियपणे काम करत होते. त्यांच्या हत्येची बातमी वाऱ्यासारखी पसरताच राजकीय आणि सामाजिक वर्तुळात प्रचंड खळबळ उडाली आहे.

घटनेची माहिती मिळताच कपूरबावडी पोलीस आणि वरिष्ठ पोलीस अधिकारी तातडीने घटनास्थळी धावले. कायदा व सुव्यवस्थेचा प्रश्न निर्माण होऊ नये म्हणून परिसरात मोठा पोलीस बंदोबस्त लावण्यात आला आहे. फॉरेन्सिक टीमनेही घटनास्थळी पोहोचून महत्त्वाचे पुरावे गोळा करण्याचे काम सुरू केले आहे.

हल्लेखोरांची ओळख पटवण्यासाठी आणि ते कोणत्या मार्गाने पळून गेले हे शोधण्यासाठी पोलीस परिसरातील CCTV कॅमेऱ्यांचे फुटेज बारकाईने तपासत आहेत. तसेच प्रत्यक्षदर्शींची चौकशी केली जात असून, आरोपींना पकडण्यासाठी ठाण्यातील प्रमुख रस्त्यांवर कडक नाकाबंदी करण्यात आली आहे.

या हत्येमागचे नेमके कारण अजून स्पष्ट झालेले नाही. संभाव्य राजकीय वाद किंवा वैयक्तिक वैमनस्य अशा सर्वच बाजूंनी पोलीस या प्रकरणाचा तपास करत आहेत. हल्लेखोर कोण होते, त्यांची संख्या किती होती आणि हत्येचा कट कोणी रचला होता, या सर्व प्रश्नांची उत्तरे पोलीस तपासानंतरच समोर येतील. पुढील तपास वेगाने सुरू आहे.