दुष्काळग्रस्तांना दिवाळीपूर्वी मदत, पण जीआर उद्या; फडणवीसांची घोषणा

राज्यात यंदा मोठा दुष्काळ पडला असून शेतकऱ्यांना दिलासा देण्यासाठी सरकारने पावलं उचलली आहेत. कोरड्या दुष्काळाचा शासन आदेश म्हणजे जीआर शनिवारी काढला जाणार असल्याची घोषणा मुख्यमंत्री देवेंद्र फडणवीस यांनी केली आहे. यामुळे शेतकऱ्यांना मदत मिळण्याचा रस्ता मोकळा होईल असं बोललं जात असलं तरी प्रत्यक्षात चित्र वेगळं असल्याचं समोर आलं आहे. मुख्यमंत्र्यांनी स्वत: सांगितलं की शेतकऱ्यांना दिवाळीच्या आधी मदत दिली जाईल. याचा अर्थ शेतकऱ्यांना अजून काही काळ वाट पाहावी लागणार आहे, हे स्पष्ट झालं आहे.

मुख्यमंत्री फडणवीस गेले दोन दिवस दुष्काळग्रस्त भागांचा दौरा करत आहेत. काल त्यांनी लातूर आणि धाराशिव जिल्ह्यातील परिस्थितीची पाहणी केली. आज सकाळी वाशिम जिल्ह्यातील दुष्काळी भागांना भेट दिल्यानंतर ते अमरावतीत पोहोचले. तिथेच त्यांनी दिवाळीपूर्वी मदत देण्याची घोषणा केली.

दुष्काळाच्या कायद्यानुसार ट्रिगर एक या निकषाखाली येणाऱ्या काही भागांत दुष्काळ जाहीर करण्याचा शासन आदेश उद्या काढला जाईल, असं फडणवीस यांनी सांगितलं. शेतकऱ्यांच्या पिकांचं मोठं नुकसान झालं असून त्यांना दिलासा कसा द्यायचा यावर सरकारचे प्रयत्न सुरू असल्याचं ते म्हणाले. एखादा भाग या यादीतून वगळला गेला तर ट्रिगर तीन या निकषानुसार त्याचा समावेश केला जाईल आणि जिथे दुष्काळाची स्थिती दिसते तो भाग दुष्काळी म्हणून जाहीर केला जाईल, असंही त्यांनी नमूद केलं.

शेतकऱ्यांना वेगवेगळ्या पद्धतीने मदत करावी लागणार असल्याचं मुख्यमंत्र्यांनी सांगितलं. चारा टंचाई आणि पाणी टंचाईबाबत सरकार कार्यवाही करणार आहे, तसंच अन्नधान्याच्या कमतरतेचंही व्यवस्थापन केलं जाणार आहे. हेक्टरनिहाय मदतही दिली जाणार आहे. मुलांच्या शिक्षणात खंड पडू नये यासाठी आवश्यक त्या उपाययोजना केल्या जातील, तसंच जिथे रब्बीचा पेरा शक्य आहे अशा भागांनाही मदत करण्याचा सरकारचा प्रयत्न असल्याचं त्यांनी सांगितलं.

कर्जमाफीबाबत बोलताना फडणवीस म्हणाले की, केंद्राच्या पैशांसाठी सरकार आजवर थांबलेलं नाही, स्वत:च्या भरवशावर मदत केली जात आहे आणि केंद्रही भरघोस मदत करेल याबाबत शंका नाही. कर्जमाफीचे पैसे मोठ्या प्रमाणावर शेतकऱ्यांच्या खात्यांत जमा होत असल्याचं त्यांनी सांगितलं. वाशिम जिल्ह्यात एकूण 52 हजार शेतकऱ्यांपैकी 42 हजार शेतकऱ्यांच्या खात्यात कर्जमाफीचे पैसे आधीच जमा झाले असून उरलेल्या शेतकऱ्यांच्या खात्यातही लवकरच पैसे जमा होतील, असं त्यांनी स्पष्ट केलं.

यावेळी फडणवीस यांनी उद्धव ठाकरे यांच्यावरही टीका केली. दुष्काळावर बोलणाऱ्यांनी थोडं भूतकाळात डोकावून पाहावं, त्यांच्या काळात कोणते निर्णय घेतले गेले, त्यासाठी किती वेळ लागला आणि कशा पद्धतीने मदत दिली गेली हे तपासावं, असं ते म्हणाले. मागे वळून पाहिल्यास आपलं सरकार त्यांच्यापेक्षा चांगलं काम करत असल्याचं लक्षात येईल, असा दावा त्यांनी केला. मात्र मागणी करण्याचा प्रत्येकाला अधिकार असल्याने त्यावर टीका करणार नाही, असंही त्यांनी नमूद केलं.

सोयाबीन खरेदीबाबत बोलताना मुख्यमंत्री म्हणाले की, संपूर्ण सोयाबीन खरेदी करावी लागली तरी सरकार ती करेल. मात्र यंदा शासकीय दरापेक्षा खासगी बाजारात सोयाबीनला जास्त दर मिळण्याची शक्यता असल्याचं त्यांनी सांगितलं. सोयाबीनची नोंदणी लवकरच सुरू केली जाईल असं सांगत, शेतकऱ्यांना दिवाळीपूर्वीच मदत दिली जाईल, असा पुनरुच्चार त्यांनी केला.