दुष्काळात शेतकरी हवालदिल, मंत्र्यांच्या मुलाचा वाढदिवस मात्र थाटामाटात; विरोधकांचा संताप

राज्यात सध्या पावसाने पाठ फिरवल्यामुळे अनेक भागांत दुष्काळाची भीषण परिस्थिती निर्माण झाली आहे. पाऊस वेळेवर न पडल्याने राज्याच्या कानाकोपऱ्यात दुष्काळाची छाया पसरली असून, शेतकऱ्यांची हाताशी आलेली पिके डोळ्यांदेखत करपून जात आहेत. यासोबतच जनावरांच्या चारा आणि पाण्याचा प्रश्नही अत्यंत गंभीर बनला आहे. या परिस्थितीमुळे पूर्णपणे हतबल झालेला शेतकरी टोकाचे पाऊल उचलत असल्याचे चित्र सध्या राज्यात दिसत आहे.

याच काळात राज्याचे मंत्री जयकुमार रावल यांनी आपल्या मुलाच्या वाढदिवसानिमित्त भव्य कार्यक्रमाचे आयोजन केले होते, ज्यामध्ये अनेक सेलिब्रिटी सहभागी झाले होते. धुळे जिल्ह्यातून समोर आलेले या कार्यक्रमाचे व्हिडिओ सोशल मीडियावर मोठ्या प्रमाणात व्हायरल झाले आहेत. याच धुळे जिल्ह्यात कुणाल पाटील यांच्या वाढदिवसानिमित्त आयोजित करण्यात आलेल्या कार्यक्रमातही नृत्यांगना गौतमी पाटील यांचा नृत्याचा कार्यक्रम पार पडला, जो देखील मोठ्या प्रमाणात चर्चेत आला.

या दोन्ही कार्यक्रमांवरून राज्यातील राजकीय वातावरण तापले असून विरोधकांनी सरकारवर टीकेची झोड उठवली आहे. काँग्रेसचे ज्येष्ठ नेते विजय वडेट्टीवार यांनी याबाबत प्रतिक्रिया देताना म्हटले की, राज्यात शेतकरी दुष्काळाच्या भीषण संकटाचा सामना करत असताना सरकारमधील एका मंत्र्यांच्या मुलाचा वाढदिवस मात्र थाटामाटात साजरा केला जातो, हे अत्यंत दुर्दैवी आहे. एका बाजूला पावसाअभावी शेतकऱ्यांची पिके करपली आहेत आणि जनावरांच्या चारा-पाण्याचा प्रश्न गंभीर झाला आहे, तर दुसऱ्या बाजूला सत्तेत बसलेल्यांकडून अशा प्रकारचे जल्लोषाचे कार्यक्रम केले जात आहेत, असे वडेट्टीवार यांनी आपल्या पोस्टमध्ये नमूद केले. शेतकऱ्यांच्या डोळ्यात अश्रू असताना वाढदिवसाचा हा थाट करण्याची गरज होती का, दुष्काळाची गंभीर परिस्थिती असताना सरकारने संवेदनशीलता दाखवून सर्वप्रथम शेतकऱ्यांच्या मदतीला धावून जाणे अपेक्षित होते, असा सवालही त्यांनी आपल्या पोस्टमधून उपस्थित केला.

राष्ट्रवादी काँग्रेस शरदचंद्र पवार पक्षाचे विकास लवांडे यांनीही याच मुद्द्यावरून सरकारवर निशाणा साधला. त्यांनी आपल्या पोस्टमध्ये म्हटले की, महाराष्ट्रावर दुष्काळाचे भीषण सावट असल्यामुळे राज्यातील शेतकरी दुष्काळात होरपळतोय, अशा भयावह परिस्थितीत मंत्री जयकुमार रावल यांच्या मुलाचा वाढदिवस सेलिब्रिटींना बोलावून थाटामाटात मनोरंजनाचा कार्यक्रम आयोजित करून साजरा होतो. एकीकडे शेतकऱ्यांचा जीव जात असताना दुसरीकडे सत्ताधाऱ्यांच्या घरात सेलिब्रेशनचा झगमगाट सुरु आहे, एवढी असंवेदनशीलता येते कुठून, असा थेट प्रश्न लवांडे यांनी आपल्या पोस्टमधून विचारला.

मंत्री जयकुमार रावल यांच्या मुलाच्या वाढदिवसाचा हा वादग्रस्त कार्यक्रम आणि त्यावर विरोधी पक्षांकडून उमटलेल्या तीव्र प्रतिक्रिया यामुळे राज्यात सध्या राजकीय चर्चेला उधाण आले आहे. या संपूर्ण प्रकरणावर मंत्री रावल किंवा राज्य सरकारकडून अद्याप कोणतेही अधिकृत स्पष्टीकरण देण्यात आलेले नाही.