राज्यात दुष्काळ जाहीर करण्याची प्रक्रिया सुरू, सहकारमंत्री बाबासाहेब पाटील यांची माहिती

राज्यातील शेतकऱ्यांसाठी एक महत्त्वाची बातमी समोर आली आहे. राज्यात १०० टक्के दुष्काळ जाहीर करण्याची प्रक्रिया सुरू झाली असल्याचं सहकारमंत्री बाबासाहेब पाटील यांनी सांगितलं आहे. गेल्या दीड महिन्यापासून पावसाने दिलेल्या उसंतीमुळे शेतकरी मोठ्या अडचणीत सापडले आहेत आणि राज्यातील बहुतांश भागातील खरीप पिकांची स्थिती अत्यंत बिकट झाली आहे.

बाबासाहेब पाटील यांनी सांगितलं की, "एवढा दुष्काळ मी माझ्या आयुष्यात कधी पाहिला नाही. यंदा राज्यात कोणतीही पिके आलेली नाही, सोयाबीन, कापूसच नाही तर ऊसही गेला आहे. दुष्काळ तर जाहीर होणार आहे. एनडीआरएफच्या नियमांप्रमाणे शासन मदत करणार आहे. दुष्काळ १०० टक्के जाहीर होणार आहे." असं ते म्हणाले.

पुरेसा पाऊस न पडल्यामुळे सोयाबीन, कापूस आणि ऊसाचे पीक पूर्णपणे करपून गेले असून अनेक शेतकऱ्यांवर दुबार पेरणीचे संकट ओढावले आहे. या परिस्थितीची दखल घेत राज्य सरकारने आधीच दुष्काळाचा ट्रिगर १ लागू केला आहे. विरोधी पक्षांकडूनही दुष्काळ जाहीर करण्याची मागणी सतत होत असताना, राज्य सरकारने यासंदर्भात ही महत्त्वाची अपडेट दिली आहे.

राज्यातील २० जिल्ह्यांत पावसाचे प्रमाण कमी राहिल्यामुळे खरीप पिके करपून गेली आहेत, आणि दुष्काळ जाहीर करून शेतकऱ्यांना तातडीने मदत जाहीर करावी अशी मागणी वाढत आहे. याच पार्श्वभूमीवर राज्य सरकारने दुष्काळ जाहीर करण्याची प्रक्रिया सुरू केली असल्याचं बाबासाहेब पाटील यांनी नमूद केलं.

राज्यातील अनेक भागांत पावसाने ओढ दिल्यामुळे दुष्काळसदृश परिस्थिती निर्माण झाली आहे. दुष्काळ जाहीर करण्यासाठी सध्याची पिकांची स्थिती, जमिनीतील ओलावा तसंच धरणांमधील पाणीसाठ्याची आकडेवारी तपासली जाणार आहे. या सर्व बाबींचा आढावा घेतल्यानंतरच पुढील निर्णय घेतला जाणार आहे.

महसूलमंत्री चंद्रशेखर बावनकुळे यांनीही काही दिवसांपूर्वी राज्यातील दुष्काळी परिस्थिती गंभीर असल्याची प्रतिक्रिया दिली होती. दुष्काळ जाहीर करण्यासाठी केंद्र सरकारकडे प्रस्ताव पाठवावा लागेल आणि राज्य सरकारकडूनही आवश्यक ती मदत केली जाईल, असं बावनकुळे यांनी म्हटलं होतं.

दरम्यान, राष्ट्रवादी काँग्रेसचे अध्यक्ष शरद पवार यांनीही दुष्काळाच्या मुद्द्यावर आक्रमक भूमिका घेतली आहे. शरद पवार २८ सप्टेंबर रोजी राज्यातील दुष्काळग्रस्त भागाचा दौरा करणार आहेत. या दौऱ्यात ते प्रत्यक्ष परिस्थितीचा आढावा घेणार असून शेतकऱ्यांशी संवाद साधणार आहेत.

काही दिवसांपूर्वी शरद पवार यांनी मुख्यमंत्री देवेंद्र फडणवीस यांना पत्र लिहून राज्यात कोरडा दुष्काळ जाहीर करण्याची मागणी केली होती. त्यामुळे आता राज्य सरकार दुष्काळाबाबत नेमका कोणता निर्णय घेतं, याकडे सगळ्यांचं लक्ष लागलं आहे.