वडेट्टीवारांचा सरकारवर हल्लाबोल, जरांगेंच्या मुंबई आंदोलनावरून टीका

मुंबईत मनोज जरांगे पाटील यांच्या आंदोलनाची घोषणा झाल्यापासून राज्यातलं राजकीय वातावरण चांगलंच तापलंय. गणेशोत्सवाच्या ऐन काळात हे आंदोलन होणार असल्यामुळे मुंबईतली गर्दी आणि कायदा-सुव्यवस्थेचा प्रश्न ऐरणीवर आलाय. याच पार्श्वभूमीवर काँग्रेसचे ज्येष्ठ नेते विजय वडेट्टीवार यांनी राज्य सरकारवर जोरदार निशाणा साधलाय.

गणेशोत्सवामुळे मुंबईत मोठी गर्दी होणार असून सरकार हे आंदोलन कसं हाताळतं हे बघावं लागेल, असं वडेट्टीवार म्हणाले. सोबतच सरकार ओबीसी विरुद्ध हिंदू असा वाद उभा करायचा प्रयत्न करतंय, असा गंभीर आरोपही त्यांनी केला.

मनोज जरांगे पाटलांशी बोलायला सरकारचे मंत्री ज्या पद्धतीनं जातात त्यावर वडेट्टीवारांनी बोचरी टीका केली. मंत्री इतकी मान वाकवून जरांगेंकडे जातात की त्यांची मान कशी तुटत नाही, असा खोचक सवाल त्यांनी विचारला. सरकार जरांगेंसमोर झुकत असल्यामुळे त्यांना स्वतःला बादशहा झाल्यासारखं वाटतंय, असा टोलाही वडेट्टीवारांनी लगावला. सरकार झुकतंय आणि त्यामुळेच याचा फायदा घेतला जातोय, असंही ते म्हणाले.

ओबीसींच्या प्रश्नांकडे सरकार गांभीर्यानं बघत नसल्याचा आरोप वडेट्टीवारांनी केला. नोकरी आणि स्थानिक स्वराज्य संस्थांमध्ये ओबीसींच्या प्रतिनिधित्वाचा मुद्दाही त्यांनी उपस्थित केला.

एक्स या सोशल मीडिया प्लॅटफॉर्मवर पोस्ट करत वडेट्टीवार म्हणाले की, मनोज जरांगे पाटलांच्या आंदोलनापुढे हे सरकार वारंवार मान झुकवत आलंय. त्यामुळे जरांगे पाटील स्वतःला बादशहा समजायला लागलेत. आता पुन्हा ते मुंबईत आंदोलन करणार आहेत. आम्ही त्यात पडणार नाही, महायुती सरकार कायदा आणि सुव्यवस्था बघून घेईल, असं त्यांनी नमूद केलं.

सरकारमध्ये दम असेल तर त्यांनी जरांगेंचं आंदोलन हाणून पाडावं, असं थेट आव्हान वडेट्टीवारांनी दिलं. आंदोलन करण्याला आपला विरोध नाही, पण सरकारनं कायदा-सुव्यवस्था आणि ओबीसींच्या प्रश्नांवर ठोस भूमिका घ्यावी, अशी मागणी त्यांनी केली.

सरकारवर उपरोधिक शब्दांत आणखी टीका करताना वडेट्टीवार म्हणाले की, जरांगे मोठमोठ्या नेत्यांवर बोलत असतील तर सरकारनं त्यांच्यावर कारवाई करावी. सरकारमध्ये कारवाईची हिंमत नसेल तर पुन्हा मंत्र्यांना पाठवावं आणि आंदोलकांचे पाय चेपून द्यावेत, असा टोला त्यांनी लगावला. जरांगे पाटलांच्या पायाची मसाज करून द्या, म्हणजे ते सरकारचं ऐकतील, असा खोचक टोलाही त्यांनी लगावला. सध्या राज्यात जे काही सुरू आहे ते संपूर्ण महाराष्ट्र बघतोय, असंही ते म्हणाले.

दरम्यान, ओबीसींच्या प्रश्नांवर सरकारनं गांभीर्यानं भूमिका घ्यावी अशी मागणी करत वडेट्टीवारांनी येत्या काळात हा मुद्दा आणखी आक्रमकपणे मांडण्याचे संकेत दिलेत.