मैनपुरीत कंटेनरच्या चाकात अडकलेली दुचाकी तीन किमी फरफटली; आईसह दोन चिमुकल्या मुलींचा मृत्यू

उत्तर प्रदेशातील मैनपुरी जिल्ह्यात मंगळवारी पहाटे भीषण आणि काळजाचा ठोका चुकवणारा अपघात झाला. बेवर परिसरातून जाणाऱ्या राष्ट्रीय महामार्गावर भरधाव कंटेनरने पुढे चाललेल्या दुचाकीला मागून जोरदार धडक दिली. धडकेनंतर दुचाकी कंटेनरच्या मागच्या चाकात अडकली आणि तब्बल तीन किलोमीटरपर्यंत फरफटत गेली. या दुर्घटनेत दुचाकीवरील महिला आणि तिच्या दोन चिमुकल्या मुलींचा जागीच मृत्यू झाला, तर दुचाकी चालवणारे वडील गंभीर जखमी झाले.

मैनपुरी कोतवाली परिसरातील कछपुरा गावात राहणारे ३२ वर्षांचे बाबी जिल्हाधिकारी कार्यालयात सफाई कर्मचारी म्हणून काम करतात. सोमवारी ते पत्नी सुमन आणि दोन मुलींना घेऊन सासरी, म्हणजे नगला टांकन येथे गेले होते. मंगळवारी पहाटे सव्वाचारच्या सुमारास बाबी हे पत्नी सुमन, चार वर्षांची प्रियांशी आणि एक वर्षाची दिव्यांशी यांना घेऊन दुचाकीवरून गावी परत येत होते. बनकिया गावाजवळ पोहोचताच मागून आलेल्या भरधाव कंटेनरने त्यांच्या दुचाकीला जोरदार धडक दिली आणि दुचाकी कंटेनरच्या मागच्या चाकात अडकली.

अपघातानंतर कंटेनरच्या चालकाने गाडी थांबवण्याऐवजी ती भरधाव वेगाने पुढे नेल्याचा आरोप आहे. त्यामुळे दुचाकीसह सुमन आणि त्यांच्या दोन्ही चिमुकल्या मुली तब्बल तीन किलोमीटरपर्यंत फरफटत गेल्या. या भीषण प्रकारात त्यांच्या मृतदेहांची मोठ्या प्रमाणात विटंबना झाली आणि रस्त्यावर अवशेष पसरले. दरम्यान, घर्षणामुळे दुचाकी आणि कंटेनरला अचानक आग लागली. कंटेनरमध्ये स्पोर्ट्स शूजचा साठा असल्याने आगीने काही क्षणांतच रौद्र रूप धारण केले.

कंटेनरला आग लागल्याचे लक्षात येताच चालकाने कंटेनर घटनास्थळीच सोडला आणि अंधाराचा फायदा घेत पळ काढल्याचे सांगण्यात येत आहे. घटनेची माहिती मिळताच पोलीस आणि अग्निशमन दल घटनास्थळी पोहोचले. सुमारे २० मिनिटांच्या प्रयत्नांनंतर आगीवर नियंत्रण मिळवण्यात आले. त्यानंतर पोलिसांनी कंटेनरच्या चाकात अडकलेले तिघांचे छिन्नविछिन्न मृतदेह बाहेर काढले आणि ते शवविच्छेदनासाठी पाठवले.

अपघातात गंभीर जखमी झालेल्या बाबी यांना प्रथम बेवर येथील स्थानिक आरोग्य केंद्रात दाखल करण्यात आले. मात्र त्यांची प्रकृती चिंताजनक असल्याने त्यांना पुढील उपचारासाठी जिल्हा रुग्णालयात हलवण्यात आले असून तिथे त्यांच्यावर उपचार सुरू आहेत.

पोलिसांनी अपघातग्रस्त कंटेनर जप्त केला असून फरार चालकाविरोधात गुन्हा दाखल करण्यात आला आहे. त्याचा शोध घेण्यासाठी पोलिसांकडून तपास सुरू आहे. एकाच कुटुंबातील आई आणि दोन चिमुकल्या मुलींचा अशा प्रकारे मृत्यू झाल्याने मैनपुरी परिसरात शोककळा पसरली आहे.