सुषमा अंधारे: 'शेतकरी उपाशी मरतोय, नेते काजू-बदामावर ताव मारतायत'; सरकारवर हल्लाबोल

राज्यात यंदा पावसाने मोठा खंड दिल्यामुळे खरीप हंगाम पुरता अडचणीत सापडला आहे. अनेक भागांत सलग बरेच दिवस पाऊसच न पडल्यामुळे सोयाबीन, कापूस आणि इतर पिकांना मोठा फटका बसला आहे. काही ठिकाणी तर उभी सोयाबीनची पिकं वाळून चाललेली दिसतायत. राज्य सरकारकडून सध्या दुष्काळी परिस्थितीचा आढावा घेतला जात असला, तरी विरोधकांकडून मात्र थेट दुष्काळ जाहीर करण्याची मागणी जोर धरू लागली आहे.

याच मुद्द्यावरून शिवसेना ठाकरे गटाच्या नेत्या सुषमा अंधारे यांनी सरकारला चांगलंच धारेवर धरलं आहे. स्वतःच्या शेतातील सोयाबीनची शेंग हातात घेऊन त्यांनी सध्याची परिस्थिती किती गंभीर आहे हे दाखवून दिलं. एका शेंगेत जेमतेम दोन दाणेसुद्धा भरलेले नसल्याचं सांगत, सरकारने औपचारिकता म्हणून नव्हे तर प्रत्यक्ष परिस्थिती लक्षात घेऊन दुष्काळ जाहीर करावा, अशी मागणी त्यांनी केली.

अंधारे म्हणाल्या, "ही माझ्या शेतातील सोयाबीनची शेंग आहे. यामध्ये दोन दाणेसुद्धा भरलेले नाहीत. ही परिस्थिती पाहता दुष्काळ फक्त औपचारिकता म्हणून जाहीर करण्याची गरज नाही, तर प्रत्यक्षात दुष्काळी परिस्थिती आहे."

सरकारकडून सध्या पाहणी दौरे आणि आढावा बैठका घेतल्या जात असल्याचं त्यांनी नमूद केलं. या पाहणी दौऱ्यांमध्ये आणि बैठकांमध्ये सरकार वेळ घालवत असलं, तरी प्रत्यक्षात शेतकऱ्यांच्या हातात मदत कधी पडणार, असा थेट सवाल त्यांनी उपस्थित केला. दुष्काळी परिस्थितीचा आढावा घेण्यासाठी झालेल्या एका बैठकीत काजू-बदामासारख्या पदार्थांवरून देखील विरोधकांनी सरकारवर निशाणा साधला आहे. अशा बैठकांमध्ये शेतकऱ्यांच्या प्रश्नांऐवजी इतर बाबींवर लक्ष दिलं जात असल्याचा आरोप यातून पुढे आला आहे.

याशिवाय आढावा बैठकीदरम्यान अधिकारी सोशल मीडियावर व्यस्त असल्याचा आरोपही अंधारेंनी केला. मात्र यात अधिकाऱ्यांची चूक नसून, त्यांच्यावर सत्ताधाऱ्यांचा धाक असतो, असं सांगत त्यांनी सरकारच्या एकूण कामकाजावरच प्रश्नचिन्ह उपस्थित केलं. म्हणजेच अधिकारी स्वतःहून हलगर्जीपणा करत नसून, वरून येणाऱ्या दबावामुळेच बैठकांचं गांभीर्य हरवत चाललं आहे, असं त्यांचं म्हणणं आहे.

दरम्यान, राज्यातील अनेक भागांत पावसाच्या खंडामुळे खरीप पिकांचं मोठं नुकसान झाल्याचं समोर आलं आहे. काही भागांत तब्बल ४० ते ४५ दिवस पाऊसच न पडल्याची नोंद झाली आहे. इतके दिवस पाऊस न पडल्यामुळे जमिनीतील ओलावा पूर्णपणे संपून पिकं वाळण्याच्या मार्गावर आहेत. यामुळे शेतकऱ्यांकडून नुकसानभरपाई आणि तातडीच्या मदतीची मागणी सातत्याने होत आहे. अशा परिस्थितीत सरकार दुष्काळ जाहीर करून शेतकऱ्यांना तातडीची मदत देणार का, याकडे आता सगळ्यांचं लक्ष लागून राहिलं आहे.