आशुतोष रांका, सौरव दास तुरुंगात; ज्ञानेश कुमारांना वाचवण्यासाठी सगळं, अभिजीत दिपकेंचा सवाल

सीजेपी प्रमुख अभिजीत दिपके यांनी दिल्लीत झालेल्या पत्रकार परिषदेत मुख्य निवडणूक आयुक्त ज्ञानेश कुमार आणि पंतप्रधान नरेंद्र मोदी यांच्यावर घणाघाती टीका केली. एका ज्ञानेश कुमारांना वाचवण्यासाठी एवढं सगळं का केलं जातंय, असा त्यांचा सवाल होता.

बुधवारी सकाळी जंतरमंतरवर तिरंगा फडकावल्याप्रकरणी सीजेपीचे प्रवक्ते आशुतोष रांका आणि सौरव दास यांना तुरुंगात पाठवण्यात आलं. त्यावरून दिपके यांनी थेट केंद्र सरकारला धारेवर धरलं. या पत्रकार परिषदेला विद्यार्थी संघटनेची अध्यक्षा नेहा बोरा, ज्येष्ठ वकील प्रशांत भूषण, ज्येष्ठ अभिनेते प्रकाश राज आणि अनेक विद्यार्थी उपस्थित होते. नेहा बोरा आणि अभिजीत दिपके या दोघांनीही केंद्रातील मोदी सरकारवर जोरदार निशाणा साधला.

कॉकरोच जनता पार्टीच्या १० ऑक्टोबरच्या आंदोलनापूर्वी देशातील सर्व रेल्वे बंद करण्यात आल्या, असं दिपके म्हणाले. देशाच्या इतिहासात पहिल्यांदाच असं झालं असावं, आणीबाणीच्या काळातही असं झालं नव्हतं, असं ते म्हणाले. रेल्वे बंद करून मन भरलं नाही म्हणून दिल्लीची मेट्रो स्टेशन्स बंद केली, त्यातही मन भरलं नाही म्हणून जम्मू-काश्मीर आणि नक्षल भागातून लष्कराच्या जवानांना बोलावण्यात आलं, असा त्यांचा दावा आहे. हे सगळं एका ज्ञानेश कुमारांसाठी करण्यात आलं, असं ते म्हणाले.

दिपके म्हणाले की, आशुतोष आणि सौरव यांनी सकाळी जंतरमंतरवर तिरंगा फडकावला तर त्यांना उचलून ताब्यात घेण्यात आलं आणि न्यायालयीन कोठडीत पाठवण्यात आलं. तिरंगा फडकावणं कायद्याचं उल्लंघन असल्याचं सांगण्यात आलं, तेही फक्त ज्ञानेश कुमारांना वाचवण्यासाठी, असं ते म्हणाले. ज्ञानेश कुमार नरेंद्र मोदींना नेमकं काय देत आहेत, असा प्रश्न त्यांनी केला. दिल्ली ठप्प केली, रेल्वे आणि मेट्रो बंद केल्या, दिल्लीला पाकिस्तानची बॉर्डर करून टाकलं, असंही ते म्हणाले.

विद्यार्थ्यांना आणि तरुणांना रस्त्यावर फरफटत नेलं, विरोधी पक्षनेते आणि माजी मुख्यमंत्र्यांनाही अशीच वागणूक दिली, असा आरोप दिपके यांनी केला. ज्ञानेश कुमार मोदींसाठी एवढे महत्त्वाचे का आहेत, असा सवाल त्यांनी केला. ज्ञानेश कुमार नरेंद्र मोदींना निवडणूक जिंकून देत आहेत, असं आम्ही का मानू नये, आणि निवडणूक जिंकून देत नसते तर मोदींनी त्यांना वाचवण्यासाठी एवढे प्रयत्न केले असते का, असंही त्यांनी विचारलं.

मुख्य निवडणूक आयुक्त ज्ञानेश कुमार कोणाचंच ऐकत नाहीत, फक्त आपल्या राजकीय नेत्यांचं ऐकतात, असं दिपके म्हणाले. त्यांना वाचवण्यासाठी पंतप्रधान मोदींनी आपली सगळी मशिनरी कामाला लावली, असं ते म्हणाले. तेव्हापासून देशभरातील सर्व विद्यार्थी संघटना आणि तरुण दिल्लीच्या रस्त्यांवर लढत आहेत, असं त्यांनी सांगितलं. नेहा, आयशा, विराज, इशारा यांना ओढत नेलं गेलं, तसंच ममता बॅनर्जी, अरविंद केजरीवाल आणि पिनाराई विजयन या माजी मुख्यमंत्र्यांनाही दिल्लीच्या रस्त्यांवरून फरफटत नेलं गेलं, असा दावा दिपके यांनी केला.