आठ तासांच्या ठिय्यानंतर दिल्लीत राहुल गांधी, प्रियंका गांधी पोलिसांच्या ताब्यात
मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी आंदोलन करणाऱ्या राहुल गांधी, प्रियंका गांधी आणि केसी वेणुगोपाल यांना दिल्ली पोलिसांनी आकाशवाणी भवनमधून ताब्यात घेतलं.
नवी दिल्ली : देशाचे मुख्य निवडणूक आयुक्त ज्ञानेश कुमार यांनी राजीनामा द्यावा, या मागणीसाठी दिल्लीत आंदोलन करणारे काँग्रेस नेते राहुल गांधी यांना अखेर दिल्ली पोलिसांनी ताब्यात घेतलं. त्यांच्यासोबत काँग्रेस नेत्या प्रियंका गांधी, केसी वेणुगोपाल आणि इंडिया आघाडीच्या इतर नेत्यांनाही पोलिसांनी ताब्यात घेतलं. आकाशवाणी भवनमध्ये आठ तासांपेक्षा जास्त वेळ ठिय्या मांडल्यानंतर ही कारवाई करण्यात आली.
या सगळ्याची सुरुवात मंगळवारी सकाळपासून झाली. इंडिया आघाडीच्या खासदारांनी निवडणूक आयोगाच्या विरोधात आंदोलन करण्याची भूमिका घेतली होती. राहुल गांधी आणि इतर खासदार निवडणूक आयोगाच्या कार्यालयाच्या दिशेने निघाले, तेव्हा दिल्ली पोलिसांनी त्यांना वाटेतच अडवलं.
पोलिसांनी रस्त्यावर बॅरिकेड्स लावले होते. ते लावल्यानंतर राहुल गांधी यांनी बॅरिकेड्सवर चढून तिरंगा फडकावला. त्यानंतर पोलिसांनी त्यांना ताब्यात घेण्याची कारवाई सुरू केली.
राहुल गांधी यांना घेऊन जाणाऱ्या पोलिसांच्या गाडीला इंडिया आघाडीच्या खासदारांनी घेराव घातला. त्यानंतर राहुल गांधी आणि प्रियंका गांधी तिथून बाहेर पडले आणि जवळच असलेल्या आकाशवाणी भवनमध्ये पोहोचले. निवडणूक आयोगाच्या कार्यालयापासून आकाशवाणी भवन फक्त 300 मीटर अंतरावर आहे.
राहुल गांधी यांनी याच ठिकाणी ठिय्या मांडला आणि मुख्य निवडणूक आयुक्त ज्ञानेश कुमार यांची भेट घ्यावी, ही मागणी लावून धरली. मुख्य निवडणूक आयुक्तांना भेटून काही प्रश्न विचारायचे आहेत, या भूमिकेवर राहुल गांधी ठाम होते.
दुसरीकडे, इथे आंदोलन करता येणार नाही, त्यामुळे ते थांबवावं, असं दिल्ली पोलिसांकडून वारंवार सांगितलं जात होतं. तरीही राहुल गांधी आणि काँग्रेसच्या खासदारांनी आठ तासांपेक्षा जास्त वेळ ठिय्या दिला. राहुल गांधी यांनी आकाशवाणी भवनमध्येच रात्र घालवण्याची तयारी दाखवली होती. पण त्याआधीच दिल्ली पोलिसांनी त्यांना ताब्यात घेतलं.
राहुल गांधी यांच्यासोबत प्रियंका गांधी, केसी वेणुगोपाल आणि काँग्रेसच्या इतर नेत्यांनाही पोलिसांनी ताब्यात घेतलं. नेत्यांना ताब्यात घेतल्यानंतर पोलिसांनी परिसरातले बॅरिकेड्स काढले आणि रस्ता वाहतुकीसाठी मोकळा केला.
निवडणूक आयोगाच्या विरोधातल्या या आंदोलनामुळे दिल्लीतलं राजकीय वातावरण चांगलंच तापलं आहे. राहुल गांधी आणि इंडिया आघाडीच्या नेत्यांनी मुख्य निवडणूक आयुक्त ज्ञानेश कुमार यांच्या राजीनाम्याची मागणी लावून धरली आहे.
ही बातमी प्रकाशित झाली आहे पण थेट मालिका सुरू झालेली नाही. डेस्कने अपडेट दाखल करताच तो इथे दिसेल.
