जंतरमंतर आंदोलन: सौरव दास आणि आशुतोष रांका यांना ५ दिवसांची न्यायालयीन कोठडी

दिल्लीतील जंतरमंतर परिसरात झालेल्या आंदोलनाच्या प्रकरणात कॉकरोच जनता पार्टीचे (CJP) नेते सौरव दास आणि आशुतोष रांका यांना न्यायालयाने ५ दिवसांची न्यायालयीन कोठडी सुनावली आहे. त्यांची रवानगी तिहार तुरुंगात करण्यात येणार आहे. आंदोलनासाठी घालून दिलेले निर्बंध मोडल्याचा आणि बाँडमधील अटींचे उल्लंघन केल्याचा आरोप त्यांच्यावर आहे.

मिळालेल्या माहितीनुसार, मंगळवारी CJP चे सौरव दास, आशुतोष रांका आणि अजिंक्य शिंदे हे तिघे जंतरमंतर परिसरात पोहोचले होते. त्यांनी भिंत ओलांडून आंदोलनस्थळी प्रवेश केल्याचा आरोप आहे. त्यानंतर रात्री पोलिसांनी तिघांनाही प्रतिबंधात्मक ताब्यात घेतले. बुधवारी सकाळी त्यांना मंदिर मार्ग येथील एसईएम न्यायालयात हजर करण्यात आले.

सुनावणीदरम्यान दिल्ली पोलिसांनी युक्तिवाद करताना असा आरोप केला की आरोपींनी सार्वजनिक शांतता भंग केली आणि बाँडमध्ये ठरवलेल्या अटींचे उल्लंघन केले. पोलिसांच्या म्हणण्यानुसार, आरोपींनी इतर नागरिकांना आंदोलनात सहभागी होण्याचे आवाहन केले होते. दोन्ही नेत्यांनी पुढील १ वर्ष अशा कोणत्याही गतिविधीत सहभागी होणार नसल्याचे लेखी आश्वासन दिले होते, मात्र त्यांनी अटी मोडल्या, असा दावा पोलिसांनी केला. या युक्तिवादानंतर न्यायालयाने दास आणि रांका यांना ५ दिवसांची न्यायालयीन कोठडी सुनावली. त्यानंतर त्यांना तिहार तुरुंगात पाठवण्याची प्रक्रिया सुरू करण्यात आली.

अजिंक्य शिंदे यांना मात्र जामीन बाँड भरून सोडण्यात येणार असल्याची माहिती समोर आली आहे. त्यांनी प्रथमच भारतीय न्याय संहितेच्या कलम १६३ चे उल्लंघन केल्याचा उल्लेखही करण्यात आला आहे.

CJP चे सौरव दास, आशुतोष रांका आणि अजिंक्य शिंदे यांच्या वतीने बाजू मांडणारे वकील अभिष्ट हेल यांनी पोलिसांच्या युक्तिवादावर आक्षेप घेतला. आरोपी भविष्यात एखादा गुन्हा करू शकतात, या शक्यतेच्या आधारे त्यांना न्यायालयीन कोठडी सुनावण्यात आल्याचे त्यांनी सांगितले. आरोपींनी नागरिकांना आंदोलनासाठी बोलावल्याचा पोलिसांचा दावा खोटा असल्याचे वकिलांनी म्हटले. आरोपींनी बाँडमधील अटींचे उल्लंघन केलेले नाही, असाही त्यांचा युक्तिवाद आहे. कनॉट प्लेसशी संबंधित वेगळ्या तक्रारीचा या प्रकरणात गैरवापर करण्यात आला, असा आरोपही त्यांनी केला. CJP च्या कार्यकर्त्यांनीही या कारवाईवर आक्षेप घेतला असून, पोलिसांनी न्यायालयात खोटी माहिती दिल्याचा दावा त्यांच्या वकिलांनी केला आहे.

या कारवाईनंतर अजिंक्य शिंदे यांनी सरकारवर आरोप केले. त्यांच्या म्हणण्यानुसार, सौरव दास, आशुतोष रांका आणि CJP चे स्वयंसेवक भारतीय तिरंगा घेऊन जंतरमंतरवर गेले होते. यावेळी त्यांनी 'भारत माता की जय'च्या घोषणाही दिल्या. या कृतीमुळे मोदी-शाह सरकारने दास आणि रांका यांना ५ दिवसांसाठी तुरुंगात पाठवल्याचा आरोप शिंदे यांनी केला. स्वातंत्र्यलढ्याच्या काळात ब्रिटिश सरकार क्रांतिकारकांना तिरंगा फडकवल्यामुळे आणि 'भारत माता की जय'च्या घोषणा दिल्यामुळे तुरुंगात टाकत असे, असा दाखलाही त्यांनी दिला. सध्याच्या सरकारची कार्यपद्धतीही हुकूमशाही स्वरूपाची असल्याची टीका त्यांनी केली.