ज्ञानेश कुमारांच्या हकालपट्टीसाठी मुंबईत ठाकरे बंधूंचा गर्जना मोर्चा, एसआयआर रद्द करण्याची मागणी

मुख्य निवडणूक आयुक्त ज्ञानेश कुमार यांच्याविरोधात रविवारी मुंबईत ठाकरे बंधूंच्या नेतृत्वाखाली 'गर्जना मोर्चा' काढण्यात आला. हुकूमशहाचा पहिला पराभव महाराष्ट्रातूनच होणार, असा निर्धार व्यक्त करत निवडणूक आयोगाविरोधात आवाज उठवण्यात आला. ज्ञानेश कुमार यांची हकालपट्टी करावी, संपूर्ण एसआयआर प्रक्रिया रद्द करावी आणि पुढच्या निवडणुका बॅलेट पेपरवर घ्याव्यात, अशी एकमुखी मागणी मोर्चातून झाली.

हा मोर्चा मेट्रो सिनेमा ते मुंबई महापालिका मुख्यालय असा निघाला. या मार्गावर लाखो आंदोलक उपस्थित होते. महाविकास आघाडीसह इतर विरोधी पक्षांचे नेते आणि कार्यकर्तेही मोठ्या संख्येने सहभागी झाले होते.

उद्धव ठाकरे यांनी निवडणूक आयुक्तांच्या निवड प्रक्रियेवरच प्रश्न उपस्थित केला. राष्ट्रपतिपदासाठी निवडणूक होते, मग निवडणूक आयुक्तांसाठी का नाही, असा सवाल त्यांनी केला. भारत देश ज्ञानेश कुमारांच्या बापाचा नाही, असे म्हणत त्यांनी केंद्र सरकारवरही टीका केली. हा लढा कोणत्याही जातीपातीचा किंवा धर्माचा नसून स्वातंत्र्य आणि लोकशाही वाचवण्याचा आहे, असे ठाकरे म्हणाले. देशभरातील मतदार याद्यांतून कोट्यवधी मतदार वगळले गेल्याचा आरोप करत त्यांनी निवडणूक आयोगाच्या रचनेतील बदलांवरही आक्षेप घेतला. सरन्यायाधीशांना निवड समितीतून वगळून केंद्रीय गृहमंत्री अमित शहा यांना त्यात घेतले आणि त्यानंतर ज्ञानेश कुमार यांची नियुक्ती झाली, असा आरोप त्यांनी केला. मेक इन इंडियाच्या माध्यमातून हुकूमशहा तयार होत असेल, तर त्यांना गाडून टाकल्याशिवाय राहणार नाही, असा इशाराही उद्धव ठाकरे यांनी दिला.

मनसे अध्यक्ष राज ठाकरे यांनी दोन मागण्या मांडल्या. महाराष्ट्रात आतापर्यंत झालेली संपूर्ण एसआयआर प्रक्रिया रद्द करावी आणि आगामी निवडणुका बॅलेट पेपरवर घ्याव्यात, असे ते म्हणाले. एसआयआर बेकायदेशीर असल्याचा दावा करताना त्यांनी माजी केंद्रीय गृहसचिव आर. के. सिंह यांच्या भूमिकेचा संदर्भ दिला. विधानसभा निवडणुकीआधी राज्यातील मतदारसंख्या ४० ते ६० लाखांनी वाढली आणि आता एसआयआरमधून सुमारे दोन कोटी मतदार वगळले गेले, असा दावा राज यांनी केला. हे दोन कोटी लोक कोण होते, आपले मतदार होते का, असा प्रश्न त्यांनी विचारला. २०१७-१८ पासून आपण निवडणूक प्रक्रिया आणि मतदार याद्यांमधील घोळाबद्दल बोलत आहोत, असे सांगत त्यांनी भाजपच्या मतवाढीवरही प्रश्न केला. कोणत्याही परिस्थितीत मतदान यंत्रे बंद झाली पाहिजेत, असेही ते म्हणाले.

काँग्रेसचे ज्येष्ठ नेते बाळासाहेब थोरात यांनी देशात मतांची चोरी होत असल्याचा आरोप केला. आयोगाच्या नियुक्ती प्रक्रियेतून सरन्यायाधीशांना बाजूला केल्यानंतर आयोगावर सत्तेचे नियंत्रण वाढले, असे ते म्हणाले. लोकशाही वाचवावी लागेल, असे आवाहन करत त्यांनी ज्ञानेश कुमार यांचा राजीनामा आणि निवडणूक प्रक्रियेची चौकशी अशा मागण्या केल्या.

ठाकरे गटाचे आमदार भास्कर जाधव यांनी भाजपवर थेट आरोप केला. भाजप चोरीत सामील आहे, असे ते म्हणाले. निवडणूक आयोगाच्या कथित गैरप्रकाराचा फायदा सत्ताधाऱ्यांना होतो, म्हणून भाजप आयोगाच्या बाजूने उभा राहतो, असा त्यांचा दावा होता. चोराचे भागीदार बाजूने उभे राहणारच, असा टोला त्यांनी लगावला.

राष्ट्रवादी काँग्रेस शरदचंद्र पवार पक्षाचे अनिल देशमुख यांनी मतदार याद्यांमध्ये मोठ्या प्रमाणात घोळ होत असल्याचा आरोप केला. "जो डाले वोट पे डाका, उसका नाम ग्यानू काका" अशी घोषणा देत त्यांनी ज्ञानेश कुमार यांच्यावर टीका केली. कुमार यांनी राजीनामा द्यावा, त्यांच्यावर एफआयआर दाखल करून कारवाई व्हावी आणि पुढच्या निवडणुका बॅलेट पेपरवर घ्याव्यात, अशी मागणी त्यांनी केली.

या आंदोलनात राजकीय पक्षांचे झेंडे वापरायला परवानगी नव्हती. कार्यकर्ते आणि समर्थकांना फक्त राष्ट्रध्वज तिरंगा सोबत ठेवायला सांगण्यात आले होते. शिवाजी पार्कमध्ये मुख्य निवडणूक आयुक्तांविरोधात झालेल्या 'जेल भरो आंदोलना'च्या दोन दिवसांनंतर हे प्रदर्शन झाले.