पोलीस व्हॅनच्या खिडकीतून निसटताना तरुणी आत राहिली, फोन आणि बॅग गेली; सीजेपी आंदोलनाचा व्हिडिओ चर्चेत

दिल्लीत काॅकरोच जनता पार्टीच्या, म्हणजेच सीजेपीच्या, आंदोलनादरम्यान पोलीस व्हॅनमधून निसटण्याचा प्रयत्न करणाऱ्या एका तरुणीचा फोन आणि बॅग तिच्या हातातून गेली. या प्रसंगाचा व्हिडिओ सोशल मीडियावर शेअर करण्यात आला असून त्यावर चांगलीच चर्चा सुरू आहे.

निवडणुकीतील घोटाळ्याला आळा घालण्यासाठी आणि त्याबाबत आवाज उठवण्यासाठी सीजेपीने आपले नवे आंदोलन जाहीर केले होते. पहिल्या आंदोलनाच्या यशानंतर दुसऱ्या आंदोलनातही आंदोलक उत्स्फूर्तपणे सहभागी झाले. मात्र पोलिसांनी कडक निर्बंध घातल्यामुळे या आंदोलनाचा शेवट अगदी सुरुवातीलाच झाला. आंदोलनाचे अनेक व्हिडिओ सोशल मीडियावर शेअर करण्यात आले.

१० ऑक्टोबर २०२६ रोजी काॅकरोच जनता पार्टीने आयोजित केलेल्या आंदोलनाला दिल्ली पोलिसांनी स्पष्टपणे नकार दिला होता. कोणत्याही परवानगीशिवाय आंदोलन करणे मान्य नाही, असे म्हणत दिल्ली पोलिसांनी घटनास्थळी मोठा बंदोबस्त ठेवला. चारही बाजूंनी बॅरिकेड्स लावण्यात आले, ४५ पेक्षा जास्त मेट्रो स्टेशन बंद ठेवण्यात आली आणि अनेक रेल्वे गाड्या रद्द करण्यात आल्या. इतकेच नव्हे तर मध्य दिल्लीत इंटरनेट सेवांवरही निर्बंध आणण्यात आले होते.

जंतर-मंतरवर आंदोलनासाठी आलेल्या सर्वांना पोलिसांनी व्हॅनमध्ये भरून दुसऱ्या ठिकाणी नेले. त्या वेळी संतापलेल्या आंदोलकांनी पोलीस व्हॅनच्या खिडकीतून बाहेर पडून आपली सुटका करून घेण्याचा प्रयत्न केला.

असाच प्रयत्न एका तरुणीनेही केला, पण त्यात तिचे मोठे नुकसान झाले. पोलीस व्हॅनबाहेर गर्दी जमली होती आणि तरुणीने आपली बॅग व फोन खिडकीतून बाहेर जमलेल्या लोकांच्या हातात दिला. त्यानंतर ती स्वतः खिडकीतून बाहेर पडू लागली, तेवढ्यात पोलिसांनी तिला पकडले आणि पुन्हा व्हॅनमध्ये बसवून नेले. म्हणजे ती व्हॅनबाहेर तर पडू शकली नाहीच, शिवाय फोन आणि बॅगही लोकांना देऊन बसली. गोंधळ आणि चेंगराचेंगरीत तिचा मोबाईल हरवल्याचे सांगण्यात येत आहे.

या घटनेमुळे सोशल मीडियावर चर्चेला उधाण आले आहे. अनेक यूजर्सनी व्हिडिओवर कमेंट्स करून आपल्या प्रतिक्रिया दिल्या. एका यूजरने म्हटले, "आंदोलनात कूल बनायला आली होती पण बॅग आणि फोन चोरी झाला". दुसऱ्या यूजरने लिहिले, "आता ती पुन्हा कधी आंदोलनात सामील होण्याचा विचारही करणार नाही". आणखी एका यूजरने लिहिले, "ती शायनिंग मारायला आली होती पण आयुष्यभरासाठी हे नुकसान ती लक्षात ठेवेल".

आंदोलनानंतर सुटका झाल्यावर सीजेपीच्या नेत्यांनी शांततापूर्ण आंदोलनासाठी पुन्हा परवानगी मागण्याचा आणि संघर्ष सुरू ठेवण्याचा निर्धार व्यक्त केला आहे.