कॉकरोच जनता पार्टीच्या आंदोलनात अभिनेता इम्रान खान आणि तुषार गांधी पोलिसांच्या ताब्यात

मुंबईतील ऑगस्ट क्रांती मैदानावर कॉकरोच जनता पार्टीचे (CJP) आंदोलन सुरू आहे. निवडणूक अधिकारी ज्ञानेश कुमार यांनी राजीनामा द्यावा, अशी आंदोलकांची मागणी आहे. याच मागणीसाठी दिल्लीत जंतर मंतरसमोरही आंदोलन चालू असून त्याचे पडसाद मुंबई आणि पुण्यात उमटताना दिसत आहेत.

मुंबईतल्या आंदोलनाला पाठिंबा देण्यासाठी बॉलीवूड अभिनेता इम्रान खान मैदानावर पोहोचला होता. तिथे 400 पेक्षा जास्त आंदोलक जमले होते. माध्यमांशी बोलत असतानाच पोलिसांनी इम्रान खान यांना ताब्यात घेतले.

त्यांनी यावर स्पष्ट शब्दांत प्रतिक्रिया दिली. आपल्या देशात इतकी तैनाती का आहे, असा सवाल त्यांनी केला. आंदोलनाला येणाऱ्या लोकांचे येणे-जाणे सरकार बंद करत आहे, असे सांगून अशा लोकांपासून काय धोका आहे, ज्याला हे सरकार घाबरत आहे, असेही इम्रान खान यांनी म्हटले.

या आंदोलनात विद्यार्थी मोठ्या संख्येने सहभागी होत आहेत, तसेच सिनेअभिनेतेही पाठिंबा देताना दिसत आहेत. दिल्लीत आंदोलनाला वेगळे वळण लागल्यामुळे आता ठिकठिकाणी आंदोलन चिघळण्याची शक्यता व्यक्त होत आहे.

पुण्यातही कॉकरोच जनता पार्टीच्या समर्थनार्थ आंदोलन झाले. लष्कर पोलीस ठाण्याबाहेर विद्यार्थ्यांची मोठी गर्दी जमली होती. या आंदोलनात हजारो विद्यार्थी सहभागी झाले होते.

महात्मा गांधी यांचे पणतू तुषार गांधी यांनाही पोलिसांनी ताब्यात घेतले आहे. त्यानंतर शिवसेनेच्या उबाठा गटाने आणि मनसेने पोलीस स्टेशनबाहेर ठिय्या मांडला आहे. तुषार गांधी यांना सोडत नाहीत, तोपर्यंत पोलीस स्टेशनजवळ बसून राहणार, असे सांगितले जात आहे.

तुषार गांधी यांना सोडले नाही, तर पुन्हा गर्दी होण्याची शक्यता वर्तवली जात आहे. त्यामुळे मुंबई आणि पुण्यातील या घडामोडींकडे सगळ्यांचे लक्ष लागले आहे. ज्ञानेश कुमार यांच्या राजीनाम्याची मागणी घेऊन उतरलेल्या आंदोलकांना पाठिंबा वाढताना दिसतो आहे, तर पोलिसांनी ताब्यात घेण्याची कारवाई सुरू ठेवली आहे.