जंतरमंतरकडे निघालेले राहुल गांधी दिल्ली पोलिसांच्या ताब्यात, प्रियंका गांधींनाही पोलिसांनी रोखलं

मुख्य निवडणूक आयुक्त ज्ञानेश कुमार यांनी राजीनामा द्यावा, या मागणीसाठी इंडिया आघाडीच्या खासदारांसह जंतरमंतर मैदानावरच्या आंदोलनाकडे निघालेले काँग्रेस नेते राहुल गांधी यांना दिल्ली पोलिसांनी रोखून ताब्यात घेतलं, अशी माहिती आहे. आंदोलनात सहभागी झालेल्या प्रियंका गांधी यांच्यासह इतर खासदारांनाही पोलिसांनी ताब्यात घेतलं.

मिळालेल्या माहितीनुसार, इंडिया आघाडीचे जवळपास २०० खासदार जंतरमंतरच्या दिशेने निघाले होते. हे सगळे तीन बसमधून प्रवास करत होते. जंतरमंतर मैदानापासून सुमारे १०० मीटर अंतरावर पोलिसांनी या तिन्ही बस अडवल्या.

बस अडवल्यानंतर राहुल गांधी यांनी त्याच जागी रस्त्यावर ठिय्या मांडला. प्रियंका गांधीही त्यांच्यासोबत रस्त्यावर बसल्या. आंदोलनाला जाण्यापासून परावृत्त करण्यासाठी पोलिसांनी राहुल गांधी यांच्याशी चर्चा करण्याचा प्रयत्न केला. पण राहुल गांधी आपल्या आंदोलनाच्या भूमिकेवर ठाम राहिले.

त्यानंतर दिल्ली पोलिसांनी राहुल गांधी यांना ताब्यात घेतलं. पाठोपाठ प्रियंका गांधी आणि इतर खासदारांनाही ताब्यात घेतल्याचं काँग्रेसकडून सांगण्यात आलं आहे. पोलिसांनी आपल्याला आणि इतर खासदारांना मारहाण केली, असा आरोप प्रियंका गांधी यांनी केला आहे.

राहुल गांधी यांना ताब्यात घेण्याची ही पहिलीच वेळ नाही. याआधी मंगळवारी त्यांनी निवडणूक आयोगाच्या कार्यालयावर मोर्चा काढला होता. त्या वेळी दिल्ली पोलिसांनी त्यांना अडवलं. त्यानंतर राहुल गांधी यांनी आकाशवाणी भवनजवळ तब्बल आठ तास ठिय्या मांडला आणि रात्रीच्या सुमारास पोलिसांनी त्यांना ताब्यात घेतलं होतं.

त्यानंतर काँग्रेसचे राष्ट्रीय अध्यक्ष मल्लिकार्जुन खर्गे यांच्या निवासस्थानी इंडिया आघाडीच्या खासदारांसाठी स्नेहभोजनाचं आयोजन करण्यात आलं होतं. हा कार्यक्रम आटोपल्यावर खासदार तीन बसमधून जंतरमंतरकडे निघाले होते.

ज्ञानेश कुमार यांच्या राजीनाम्याबरोबरच इंडिया आघाडीने SIR प्रक्रियेबाबतही काही मागण्या केल्या आहेत. मुख्य निवडणूक आयुक्त ज्ञानेश कुमार यांना हटवण्यासाठी संसदेत प्रस्ताव आणावा, अशी पहिली मागणी आहे. SIR प्रक्रियेत मतदार यादीतून वगळलेली नावं सार्वजनिक करावीत, असंही आघाडीचं म्हणणं आहे. कुठल्याही मतदाराचं नाव वगळण्यापूर्वी त्या मतदाराला नोटीस द्यावी आणि अपील करण्याची संधी मिळावी, अशी आणखी एक मागणी आहे. शिवाय ईव्हीएमऐवजी मतपत्रिकेद्वारे निवडणुका घ्याव्यात, अशीही मागणी करण्यात आली आहे.

राहुल गांधी यांनी ज्ञानेश कुमार यांच्या कार्यपद्धतीवर प्रश्न उपस्थित करत त्यांच्या राजीनाम्याची मागणी केली आहे. ज्ञानेश कुमार यांच्या भूमिकेमुळे देशाची लोकशाही धोक्यात आली आहे, असा आरोपही राहुल गांधी यांनी केला.

निवडणूक आयोगाच्या प्रक्रियेवरून काँग्रेस आणि इतर विरोधी पक्ष सातत्याने प्रश्न उपस्थित करत आहेत. ज्ञानेश कुमार यांच्या राजीनाम्याची मागणी आणि SIR चा मुद्दा यामुळे सत्ताधारी आणि विरोधक यांच्यातला संघर्ष आणखी तीव्र झाला आहे.