ज्ञानेश कुमार महाराष्ट्रात आले तर तोंडाला काळं फासू, हर्षवर्धन सपकाळ यांचा इशारा

महाराष्ट्र प्रदेश काँग्रेस कमिटीचे अध्यक्ष हर्षवर्धन सपकाळ यांनी मुख्य निवडणूक आयुक्त ज्ञानेश कुमार यांच्यावर गंभीर आरोप केले आहेत. कुमार महाराष्ट्रात आले तर आंदोलन करू, असा इशाराही त्यांनी दिला. ज्ञानेश कुमार यांच्या विरोधात काँग्रेस आता चांगलीच आक्रमक झाली आहे.

सपकाळ म्हणाले, "ज्ञानेश कुमार महाराष्ट्रात आले तर काँग्रेस कार्यकर्ते त्यांना पाय ठेवू देणार नाहीत. आला तर त्याच्या तोंडाला काळं फासू." या वक्तव्यामुळे राज्यातील राजकीय वातावरण तापण्याची शक्यता आहे.

सपकाळ यांचा आरोप असा आहे की ज्ञानेश कुमार निवडणूक प्रक्रियेत पक्षपातीपणे वागत आहेत. त्यांच्या म्हणण्यानुसार, मुख्य निवडणूक आयुक्त हे संविधानिक पदावर असूनही भाजपच्या एजंटप्रमाणे काम करत आहेत.

मतदार यादीतील बदल, SIR (Special Intensive Revision) आणि मतदारांचे हक्क या मुद्द्यांवर काँग्रेसकडून सातत्याने प्रश्न उपस्थित केले जात आहेत. याच मुद्द्यांवर काँग्रेसने देशभर आंदोलनाची भूमिका घेतली आहे.

ज्ञानेश कुमार यांच्या राजीनाम्याची मागणी देशभरातून होत आहे, असा दावा सपकाळ यांनी केला. राहुल गांधी यांच्या नेतृत्वाखाली विरोधी पक्षातील खासदारांनी निवडणूक आयोगाच्या कार्यालयाकडे मोर्चा काढण्याचा प्रयत्न केला होता. त्या आंदोलनात राहुल गांधी आणि इतर नेत्यांना पोलिसांनी ताब्यात घेतल्याचे वृत्त आहे.

सपकाळ यांनी फॉर्म ६ मध्ये बेकायदा बदल करण्यात आल्याचाही आरोप केला. त्यामुळे १८ वर्षे पूर्ण झालेल्या तरुणांना मतदानाच्या अधिकारापासून वंचित ठेवले गेले, असा दावा त्यांनी केला. मतदारांच्या हक्कांसाठी आणि निष्पक्ष निवडणूक प्रक्रियेसाठी काँग्रेस संघर्ष सुरूच ठेवणार, असेही सपकाळ यांनी सांगितले.

दुसरीकडे, SIR प्रक्रियेवर विरोधकांकडून आक्षेप घेतले जात असताना, मतदार यादीची फेरतपासणी आवश्यक आहे, अशी भूमिका निवडणूक आयोगाने मांडली आहे.

दरम्यान, ज्ञानेश कुमार यांचा ७ आणि ८ ऑक्टोबरचा छत्तीसगड दौरा स्थगित करण्यात आला आहे. छत्तीसगडच्या मुख्य निवडणूक अधिकाऱ्यांच्या कार्यालयाने हा दौरा 'अपरिहार्य कारणांमुळे' पुढे ढकलल्याचे सांगितले असून नवीन तारीख अद्याप जाहीर झालेली नाही.

मुंबईसह महाराष्ट्रातही ज्ञानेश कुमार यांच्या विरोधातील राजकीय आंदोलनाला वेग आला आहे. याआधी उद्धव ठाकरे आणि राज ठाकरे यांच्या नेतृत्वाखाली मुंबईत मुख्य निवडणूक आयुक्तांच्या विरोधात मोर्चा काढण्यात आला होता. सपकाळ यांच्या वक्तव्यामुळे राज्यातील राजकीय संघर्ष आणखी तीव्र होण्याची चिन्हे आहेत, आणि काँग्रेस व सत्ताधारी भाजप यांच्यातील संघर्ष आणखी पेटण्याची शक्यता आहे.