अभिजित दिपके ताब्यात; राज ठाकरे म्हणतात, मोदी आणि शाह यांच्या डोक्यात पराकोटीची हुकूमशाही

मुख्य निवडणूक आयुक्त ज्ञानेश कुमार यांनी राजीनामा द्यावा, या मागणीसाठी देशभरात आंदोलने सुरू आहेत. दिल्लीत आधी AISF ने आणि त्यानंतर INDIA आघाडीने जोरदार आंदोलन केले. आज, शनिवार 10 ऑकटोबर रोजी कॉकरोच जनता पार्टीचे (CJP) आंदोलन जंतर मंतर येथे होणार होते.

पण त्याआधीच दिल्ली पोलिसांनी CJP चे अभिजित दिपके, आशुतोष रांका आणि सौरव दास यांच्यासह इतर पदाधिकाऱ्यांना ताब्यात घेतले. या घटनेवरून देशभरातून प्रतिक्रिया उमटू लागल्या आहेत. त्यातच मनसे प्रमुख राज ठाकरे यांनी मोठी प्रतिक्रिया देत केंद्र सरकारवर निशाणा साधला आहे.

राज ठाकरे यांनी आपल्या सोशल मीडिया पोस्टमध्ये पंतप्रधान नरेंद्र मोदी आणि गृहमंत्री अमित शाह यांच्यावर टीका केली. "मोदी आणि शाह या जोडीच्या मनात आणि डोक्यात अत्यंत पराकोटीची हुकूमशाही बसली आहे," असे त्यांनी म्हटले आहे.

पोस्टची सुरुवात त्यांनी भारतरत्न डॉ. बाबासाहेब आंबेडकर यांच्या एका वाक्याने केली. "No nation can be grateful at the cost of its liberty" हे उद्गार बाबासाहेबांनी नोव्हेंबर 1949 मध्ये राज्यघटनेचा मसुदा सादर करताना काढले होते, असे ठाकरे यांनी सांगितले. एखाद्या नेत्याच्या आंधळ्या भक्तीसाठी किंवा त्याच्या तऱ्हेवाईक वागण्याला खतपाणी घालण्यासाठी देशाचे स्वातंत्र्य आणि अभिव्यक्ती ही मूल्ये पणाला लागता कामा नयेत, असे ते म्हणाले.

ठाकरे यांच्या म्हणण्यानुसार, या जोडीने देशातील सर्व यंत्रणा ताब्यात घेऊन सत्ता मिळवली आणि ती सत्ता फक्त मूठभर उद्योगपतींच्या हितासाठी राबवली जात आहे. सत्तेच्या मस्तीला विरोध करणाऱ्या आंदोलकांना चिरडले जाणार असेल आणि अटक केली जाणार असेल, तर या बेबंदशाहीला खालपासून वरपर्यंत उखडूनच काढले पाहिजे, असे त्यांनी लिहिले आहे.

"या देशात आंदोलने करायचीच नाहीत का? तुम्हाला प्रश्न विचारायचेच नाहीत का?" असा सवाल त्यांनी केला. ज्ञानेश कुमार यांच्या राजीनाम्याच्या मागणीसाठी 3 ऑक्टोबरपासून दिल्लीत आंदोलने सुरू आहेत, असे सांगून त्यांनी म्हटले की, सरकार दिल्ली पोलिसांना हाताशी धरून आंदोलकांना चिरडत होते आणि आंदोलन कव्हर करणाऱ्या महिला पत्रकारांचाही छळ करत होते. पोलिसांनी स्थानबद्ध केल्यावर आपला छळ केला, अशा तक्रारी या महिला पत्रकारांच्या आहेत, असेही त्यांनी नमूद केले.

दिल्लीत आंदोलनाच्या भीतीने मेट्रो सेवा बंद केली, रस्ते अडवले, इंटरनेट सेवा आणि बस सेवा थांबवली आणि आंदोलकांना विमानातून उचलून नेले जात आहे, असा दावा ठाकरे यांनी केला. कलम 19 (1) (अ) आणि (ब) नुसार नागरिकांना शांततेत निदर्शने करण्याचा पूर्ण अधिकार आहे, असे सांगून त्यांनी म्हटले की, काल सर्वोच्च न्यायालयानेही "माशी मारायला हातोडा कशाला वापरताय?" असे विचारले होते. आंदोलकांना ताब्यात घेऊन सोडून देणे असे महाराष्ट्रात पोलीस डिपार्टमेंट सहसा करते, असेही ते म्हणाले.

ज्ञानेश कुमार यांच्याबद्दल इतके प्रेम का, असा प्रश्न विचारत ठाकरे यांनी लिहिले की, निवडणूक आयोग ही स्वायत्त संस्था आहे आणि प्रमुखाने गोंधळ घातला असेल तर त्याचा राजीनामा व्हायलाच हवा. त्यांनी असेही म्हटले की, राजीनामा द्यावा लागला आणि त्यांनी मतचोरीचे करवते धनी कोण ते सांगितले, तर आतापर्यंतच्या सत्तेचे बिंग फुटेल अशी भीती वरच्या दोघांना आहे का?

तरुणांनी तुम्हाला झुकवून धर्मेंद्र प्रधान यांचा राजीनामा घ्यायला लावला, हा राग अजून शमलेला दिसत नाही, असे ठाकरे यांनी म्हटले. अण्णा हजारे यांच्या आंदोलनाच्या वेळी मोदी आणि शाह गुजरातमध्ये आंदोलने होऊ देत होते, कारण ती फायद्याची होती; पण सत्तेच्या काळात त्याच गुजरातमध्ये त्यांनी आपल्या सरकारविरोधातील अनेक आंदोलने चिरडली, असा आरोप त्यांनी केला. त्यामुळे हे बेगडी आणि दुटप्पी आहेत, असे स्पष्ट दिसते, असे ते म्हणाले.

नेटफ्लिक्सवरील "How to Become a Tyrant" ही डॉक्युमेंट्री अमित शाह रोज गांभीर्याने बघत असावेत, असे दिसते, असे ठाकरे यांनी म्हटले. महात्मा गांधी यांनी शांततेत केलेल्या आंदोलनांबद्दल आणि स्वातंत्र्य चळवळीबद्दल थोडे वाचा, असेही ते म्हणाले. आज सत्तेत आहोत म्हणजे अनंत काळ राहू, अशी अपेक्षा बाळगू नका, तुम्ही सत्तेचा अमरपट्टा घेऊन जन्माला आलेले नाही, असे सांगत त्यांनी पोस्टचा शेवट केला. आंदोलन करण्याचा अधिकार अबाधितच राहिला पाहिजे, असे ते म्हणाले.

राज ठाकरे यांच्या या पोस्टमुळे SIR प्रक्रियेवरून सुरू असलेल्या राजकीय वादाला आणखी धार मिळाली आहे. दिल्लीतील आंदोलन, CJP पदाधिकाऱ्यांना ताब्यात घेण्याची घटना आणि निवडणूक आयोगाची भूमिका यावरून आता राजकीय आरोप-प्रत्यारोप वाढण्याची शक्यता आहे.