आशुतोष रांका, सौरव दास यांच्या अटकेविरोधात १६ ऑक्टोबरला कॅनॉट प्लेसवर तिरंगा आंदोलनाची हाक

कॉकरोच जनता पार्टीचे (सीजेपी) प्रमुख अभिजीत दिपके यांनी १६ ऑक्टोबरला 'लेहरा दो तिरंगा' मोहिमेची हाक दिली आहे. पक्षाचे प्रवक्ते आशुतोष रांका आणि सौरव दास यांना दिल्ली पोलिसांनी अटक केली आणि त्यांना पाच दिवसांची न्यायालयीन कोठडी सुनावण्यात आली. त्याच्या निषेधार्थ हे आंदोलन होणार आहे.

जंतरमंतरवर तिरंगा फडकावल्याच्या आणि घोषणाबाजी केल्याच्या प्रकरणात रांका आणि दास यांना अटक झाली. पक्षाचे राष्ट्रीय प्रवक्ते आशुतोष रांका, सौरव दास आणि त्यांचे सहकारी अजिंक्य शिंदे या तिघांनाही दिल्ली पोलिसांनी अटक करून तुरुंगात पाठवले. मंदिर मार्ग पोलिस ठाण्यातील विशेष कार्यकारी दंडाधिकाऱ्यांनी तिघांना पाच दिवसांची न्यायालयीन कोठडी सुनावली. या अटकेवरून संताप व्यक्त करण्यात आला आहे.

अभिजीत दिपके यांनी आपल्या अधिकृत एक्स खात्यावर व्हिडीओ शेअर करून दिल्लीसह देशभरातील तरुणांना या मोहिमेत सहभागी होण्याचे आवाहन केले. त्यांनी म्हटले, "हॅलो मित्रांनो, सौरव दास आणि आशुतोष रांका यांना फक्त तिरंगा फडकवल्यामुळे तुरुंगात टाकण्यात आले. पण आता जे लोक देशभक्त आहेत, जे लोक तिरंग्यावर प्रेम करतात, त्यांना माझी विनंती आहे की, येत्या १६ ऑक्टोबरला सायंकाळी पाच वाजता सेंट्रल पार्क, कॅनॉट प्लेस याठिकाणी आपापले तिरंगे घेऊन या, तिथे आपण सर्वजण एकत्र मिळून तिरंगा फडकवूया आणि तिरंगा फडकावणे हा गुन्हा नाही, हे आपण यांना (केंद्र सरकारला) दाखवून देऊयात."

जे लोक दिल्लीत येऊ शकत नाहीत, त्यांनी आपापल्या शहरांत तिरंगा मार्च काढावा, असेही दिपके यांनी सांगितले. तिरंगा हा आपला अभिमान आहे आणि तो फडकावणे हा गुन्हा नाही, हे "या हुकुमशाहांना" दाखवून देऊ, असे ते म्हणाले. "कदाचित यानंतर मलाही तुरुंगात टाकले जाऊ शकते, पण मला त्याची पर्वा नाही, तिरंगा हा माझा अभिमान आहे आणि तो मी फडकावणारच," असा खुला इशारा त्यांनी दिला आहे.

दिपके यांनी आणखी एक इशारा दिला आहे. "केवळ राष्ट्रध्वज हातात घेतल्यामुळे आमच्या सहकाऱ्यांना तुरुंगात टाकले गेले. आता संपूर्ण देश हातात तिरंगा घेऊन कॅनॉट प्लेसवर उत्तर देईल," असे ते म्हणाले.

रांका आणि दास यांच्या अटकेवरून लोकसभेतील विरोधी पक्षनेते राहुल गांधी यांच्यासह 'इंडिया' आघाडीनेही निषेध व्यक्त केला. इंडिया आघाडीने या आंदोलनाला पाठिंबा दिल्यानंतर आता सीजेपीच्या या मोहिमेमुळे दिल्लीतील राजकीय आणि सामाजिक वातावरण तापण्याची शक्यता निर्माण झाली आहे.

जंतरमंतरवर जमावबंदी आणि आंदोलनांना बंदी असतानाही सौरव दास आणि आशुतोष रांका यांनी तिरंगा फडकावून घोषणाबाजी केली होती. आता सीजेपीने मध्य दिल्लीतील वर्दळीच्या कॅनॉट प्लेस येथे आंदोलनाची हाक दिली आहे. सोशल मीडियावर #LehraDoTricolour आणि #CJPProtest हे हॅशटॅग वेगाने ट्रेंड होताना दिसत आहेत. देशातील विविध विद्यार्थी संघटना आणि तरुण १६ ऑक्टोबरच्या या मोहिमेत सहभागी होण्यासाठी सज्ज झाल्याची माहितीही समोर आली आहे.