दिल्ली विमानतळाबाहेर अभिजीत दीपके यांच्याविरोधात घोषणाबाजी; सीआयएचे एजंट असल्याचा एका व्यक्तीचा आरोप

कॉकरोच जनता पार्टीचे (CJP) संस्थापक अभिजीत दीपके बुधवारी, १४ ऑक्टोबर रोजी दुपारी दिल्ली विमानतळावर पोहोचले. विमानतळाबाहेर पडत असताना एका व्यक्तीने त्यांच्याविरोधात घोषणाबाजी केली. गर्दीतल्या एकाने त्यांना "देश का बरबाद करत आहात?" असा प्रश्न विचारला.

इतकेच नाही, तर दीपके हे सीआयएचे एजंट असल्याचा आरोपही त्याच व्यक्तीने केला. दीपके यांनी मात्र या आरोपावर काही न बोलता शांतपणे हसत अंगठा दाखवला आणि ते तेथून पुढे निघून गेले.

दुसरीकडे, सीजेपीचे सहकारी सौरभ दास आणि आशुतोष रांका यांना पाच दिवसांची न्यायालयीन कोठडी सुनावण्यात आली होती. त्यानंतर ते पुन्हा दिल्लीत दाखल झाले आहेत. त्यांनी थेट केंद्र सरकारवर टीका केली. देशात तिरंगा फडकवणे हा गुन्हा झाला आहे का, असा सवाल त्यांनी उपस्थित केला.

अभिजीत दीपके यांनी सांगितले की, आशुतोष रांका आणि सौरभ दास यांना केवळ जंतर-मंतर येथे जाऊन राष्ट्रध्वज फडकवल्यामुळे पाच दिवसांसाठी तुरुंगात पाठवण्यात आले. ब्रिटिश राजवटीत सार्वजनिक ठिकाणी तिरंगा फडकवणाऱ्या स्वातंत्र्यसैनिकांना अटक केली जात असे, असेही सांगत त्यांनी सरकारवर निशाणा साधला.

या प्रकरणाची पार्श्वभूमी अशी की, १२ ऑक्टोबर २०२६ रोजी जंतर-मंतर परिसरात सीजेपीचे आंदोलन झाले. त्यानंतर केंद्र सरकारने जंतर-मंतरला आंदोलनस्थळांच्या यादीतून वगळण्याचा निर्णय जाहीर केला. १३ ऑक्टोबर रोजी सकाळी आशुतोष रांका आणि सौरभ दास यांनी CJP कार्यकर्त्यांसह जंतर-मंतरच्या प्रवेशद्वारावरून आत प्रवेश केला. त्यांनी राष्ट्रध्वज फडकवला आणि घोषणाबाजी केली. त्यानंतर पोलिसांनी त्यांना ताब्यात घेतले.

परवानगीशिवाय जंतर-मंतर परिसरात प्रवेश करणे आणि आदल्या दिवशी दिलेल्या जामीनपत्रातील अटींचे उल्लंघन करणे, असे आरोप त्यांच्यावर ठेवण्यात आल्याचे वृत्त आहे. यापूर्वी त्यांना एका वर्षापर्यंत शांतता राखण्याच्या अटीवर जामीन मिळाला होता.

दरम्यान, दीपके यांनी कनॉट प्लेस येथील सेंट्रल पार्कमध्ये राष्ट्रध्वज घेऊन नागरिकांनी जमण्याचे आवाहन केले आहे. सौरभ दास आणि आशुतोष रांका यांना केवळ तिरंगा फडकवल्यामुळे तुरुंगात टाकण्यात आल्याचा आरोप त्यांनी केला. सीजेपीने १६ ऑक्टोबरला 'लहरा दो तिरंगा' मोहिमेची घोषणा केली आहे.

ज्यांना दिल्लीला येणे शक्य नाही, त्यांनी आपापल्या शहरांत 'तिरंगा मार्च' काढावा, असेही आवाहन त्यांनी केले. आपल्यालाही अटक होण्याची शक्यता असल्याची भीती त्यांनी व्यक्त केली. "तिरंगा फडकवणे हा गुन्हा नाही, हे आम्ही दाखवून देऊ," असे दीपके यांनी 'एक्स'वरील पोस्टमध्ये म्हटले आहे.