निगडीतील शिवमंदिरात अल्पवयीन मुलीवर अतिप्रसंगाचा प्रयत्न, आरोपी पोलिसांच्या ताब्यात

पुण्यातील पिंपरी-चिंचवड शहरातील निगडी परिसरात एक संतापजनक घटना उघडकीस आली आहे. शिवमंदिरात देवाचे दर्शन घेण्यासाठी गेलेल्या एका अल्पवयीन मुलीवर अतिप्रसंग करण्याचा प्रयत्न करण्यात आल्याचे समोर आले आहे. मंदिरातील सीसीटीव्ही कॅमेऱ्यात हा संपूर्ण प्रकार कैद झाला आहे. या घटनेमुळे निगडी परिसरासह संपूर्ण पिंपरी-चिंचवड शहरात तीव्र संताप व्यक्त होत आहे.

मिळालेल्या माहितीनुसार, निगडी परिसरातील एका स्थानिक शिवमंदिरात ही मुलगी नेहमीप्रमाणे दर्शनासाठी गेली होती. गाभाऱ्यात महादेवासमोर तिने डोकं टेकवून नमस्कार केला. ती पाया पडून उठत असतानाच, तिच्यावर पाळत ठेवून मागोमाग मंदिरात शिरलेल्या आरोपीने अचानक झेप घेतली आणि तिला हाताला धरून कोपऱ्यात ओढण्याचा प्रयत्न केला, असा आरोप आहे.

मुलीने प्रसंगावधान दाखवत तिथून स्वतःची सुटका करून घेतली. मंदिरात लावलेल्या सीसीटीव्ही कॅमेऱ्यात हा सगळा प्रकार स्पष्टपणे दिसला असून, त्या चित्रफितीमुळे आरोपीचे कृत्य समोर आले आहे.

घटनेची माहिती मिळताच निगडी पोलिसांनी तातडीने हालचाल करून आरोपीला ताब्यात घेतले आहे. एफआयआरनुसार आरोपीचे नाव विशाल सिंग असे आहे. तो मंदिराच्या जवळच सुरू असलेल्या मेट्रोच्या उभारणीच्या कामावर कंत्राटी कामगार म्हणून काम करणारा परप्रांतीय तरुण आहे.

या प्रकरणी निगडी पोलीस स्टेशनमध्ये आरोपीविरुद्ध भारतीय न्याय संहितेतील विनयभंगाच्या कलमांतर्गत तसेच बालकांचे लैंगिक अपराधांपासून संरक्षण कायद्यांतर्गत, म्हणजेच पोक्सो कायद्यांतर्गत गुन्हा दाखल करण्यात आला आहे.

निगडी पोलीस स्टेशनचे वरिष्ठ पोलीस निरीक्षक महेश बनसोडे यांनी याबाबत माहिती दिली. ते म्हणाले, "घटनेचे गांभीर्य लक्षात घेऊन आम्ही आरोपीला तात्काळ बेड्या ठोकल्या आहेत. त्याच्यावर विनयभंग आणि पोक्सो कायद्यांतर्गत गुन्हा दाखल करण्यात आला असून, पोलीस या प्रकरणी पुढील कायदेशीर तपास वेगाने करत आहेत."

पोलिसांनी पालकांना आवाहनही केले आहे. प्रत्येक आई-वडिलांनी आपल्या मुलांशी बोलावे आणि अशा प्रसंगी तातडीच्या मदतीसाठी 112 (आपत्कालीन हेल्पलाइन) आणि 1098 (चाइल्डलाइन) या क्रमांकांची माहिती त्यांना द्यावी, असे पोलिसांनी म्हटले आहे.

या घटनेनंतर सार्वजनिक आणि पायाभूत सुविधांच्या मोठ्या प्रकल्पांवर काम करणाऱ्या कामगारांच्या पार्श्वभूमी तपासणीचा मुद्दा पुन्हा एकदा गंभीरपणे समोर आला आहे. अशा कंत्राटी कामगारांची पोलीस पडताळणी झाली होती का, तसेच कंत्राटदार आणि प्रशासनाने या सुरक्षेकडे दुर्लक्ष केले आहे का, असे संतप्त सवाल आता नागरिक उपस्थित करत आहेत.