राहुल गांधींना पोलिसांनी ताब्यात घेतल्यानंतर हर्षवर्धन सपकाळ यांचा सरकारला इशारा

मुख्य निवडणूक आयुक्त ज्ञानेश कुमार यांनी राजीनामा द्यावा, या मागणीवरून काँग्रेस आणि INDIA आघाडीने आक्रमक पवित्रा कायम ठेवला आहे. ही मागणी घेऊन दिल्लीतील जंतरमंतर मैदानावर आंदोलन करण्यासाठी काँग्रेसचे खासदार आणि INDIA आघाडीचे जवळपास 200 खासदार निघाले होते. मात्र जंतरमंतरपासून अवघ्या 100 मीटर अंतरावर पोलिसांनी त्यांच्या बस अडवल्या.

आंदोलनाला निघण्यापूर्वी काँग्रेसचे राष्ट्रीय अध्यक्ष मल्लिकार्जुन खर्गे यांच्या निवासस्थानी INDIA आघाडीच्या खासदारांसाठी स्नेहभोजनाचे आयोजन करण्यात आले होते. त्यानंतर हे खासदार तीन बसमधून जंतरमंतरकडे निघाले. पण जंतरमंतर मैदानापासून जवळपास 100 मीटर अंतरावरच पोलिसांनी या बस थांबवल्या आणि त्यानंतर राहुल गांधींना आंदोलन करण्यापासून रोखण्यात आले.

काँग्रेस नेते राहुल गांधी आंदोलनासाठी पुढे जाण्याचा प्रयत्न करत असताना पोलिसांनी त्यांना ताब्यात घेतले. त्यानंतर राहुल गांधींनी त्याच ठिकाणी ठिय्या मांडला. प्रियंका गांधी यांनीही पोलिसांच्या कारवाईचा निषेध करत रस्त्यावर ठिय्या दिला. पोलिसांनी आपल्याला आणि इतर खासदारांना मारहाण केली, असा आरोप राहुल गांधी आणि इतर नेत्यांनी केला आहे.

याच मुद्द्यावरून महाराष्ट्र काँग्रेसचे प्रदेशाध्यक्ष हर्षवर्धन सपकाळ यांनी सरकारवर जोरदार टीका केली. राहुल गांधींना पोलिसांनी ताब्यात घेतल्यानंतर त्यांनी सोशल मीडियावर आक्रमक प्रतिक्रिया दिली. "याद रखना, हिसाब होगा..!" असे ट्वीट करून त्यांनी सरकारला थेट इशारा दिला.

आपली भूमिकाही सपकाळ यांनी मांडली. "INDIA आघाडी जंतर-मंतरवर, वोट चोर ज्ञानेश कुमार यांना राजीनामा द्यावाच लागेल," असे ते म्हणाले. देशात लोकशाहीची हत्या होत आहे, असा आरोप करत राहुल गांधींचा आवाज दाबता येणार नाही, असेही त्यांनी म्हटले आहे. संघर्ष आता आणखी तीव्र होणार आहे, असा इशाराही सपकाळ यांनी दिला.

दरम्यान, ज्ञानेश कुमार यांच्या राजीनाम्याची मागणी आता आणखी तापण्याची शक्यता आहे. कालही राहुल गांधींसह अनेक खासदारांना पोलिसांनी ताब्यात घेतले होते. त्यामुळे काँग्रेस आणि सरकार यांच्यातील हा संघर्ष पुढच्या काही दिवसांत आणखी चिघळण्याची चिन्हे आहेत.