चंद्रपुरात काँग्रेसचा मोर्चा, मुख्य निवडणूक आयुक्तांच्या राजीनाम्याची मागणी

चंद्रपुरात काँग्रेस पक्षाच्या वतीने 'वोट बचाओ - देश बचाओ' हे जनआंदोलन झाले. अखिल भारतीय काँग्रेस कमिटीच्या निर्देशानुसार सुरू असलेल्या 'लोकतंत्र बचाओ सप्ताह' अंतर्गत हे आंदोलन आयोजित करण्यात आले होते. शहरातील ऐतिहासिक गांधी चौकातून निघालेला पायी मोर्चा जिल्हाधिकारी कार्यालयापर्यंत गेला.

मोर्चाचे नेतृत्व खासदार प्रतिभाताई धानोरकर, काँग्रेसचे जिल्हाध्यक्ष व माजी आमदार सुभाषभाऊ धोटे आणि शहर जिल्हा काँग्रेस अध्यक्ष शिवा राव पोलशेट्टी यांनी केले.

जिल्हाधिकारी कार्यालयासमोर झालेल्या जाहीर सभेत खासदार प्रतिभा धानोरकर यांनी केंद्र सरकारवर टीका केली. "केंद्र सरकारच्या मनमानी कारभारामुळे आणि हुकूमशाही प्रवृत्तीमुळे आज संपूर्ण देशात अराजकता पसरली आहे. निवडणूक प्रक्रियेतील पारदर्शकता संपुष्टात आली असून लोकशाही व्यवस्था आणि संविधानाने प्रत्येक नागरिकाला दिलेले मूलभूत अधिकार धोक्यात आले आहेत," असे त्या म्हणाल्या. या अराजकतेला आणि पारदर्शकतेच्या अभावाला जबाबदार असणारे मुख्य निवडणूक आयुक्त ज्ञानेश कुमार यांनी तात्काळ राजीनामा द्यावा, असे त्यांनी सांगितले. ते राजीनामा देईपर्यंत काँग्रेस पक्ष शांत बसणार नाही आणि हा संघर्ष असाच तीव्र राहील, असा इशारा त्यांनी दिला.

उपस्थितांना संबोधित करताना धानोरकर पुढे म्हणाल्या, "'वोट बचाओ - देश बचाओ' हा केवळ एक नारा नसून सध्याच्या परिस्थितीत लोकशाहीच्या रक्षणासाठी आपण सर्वांनी पुकारलेला लढा आहे. लोकशाही ही केवळ निवडणुकांपुरती मर्यादित नसून ती नागरिकांच्या अधिकारांशी आणि संविधानिक मूल्यांशी जोडलेली व्यवस्था आहे. मतदारांचा अधिकार सुरक्षित राहणे, निवडणूक प्रक्रिया पारदर्शक असणे आणि संविधानाने दिलेल्या लोकशाही मूल्यांचे संरक्षण होणे ही प्रत्येकाची जबाबदारी आहे. निवडणूक आयोगाची स्वायत्तता आणि निष्पक्षता टिकवून ठेवण्यासाठी मुख्य निवडणूक आयुक्त ज्ञानेश कुमार यांनी आपल्या पदाचा राजीनामा देणे अत्यंत आवश्यक आहे. यासाठी काँग्रेस पक्ष सातत्याने आवाज उठवत राहील."

काँग्रेसचे जिल्हाध्यक्ष व माजी आमदार सुभाषभाऊ धोटे यांनीही सभेत मत मांडले. लोकशाही व संविधानाच्या रक्षणासाठी पक्षाचे नेते मा. राहुलजी गांधी, प्रियंकाजी गांधी, काँग्रेस पक्ष आणि 'इंडिया' आघाडी सातत्याने जनतेच्या प्रश्नांवर आवाज उठवत आहेत, असे ते म्हणाले. नागरिकांनीही आपल्या अधिकारांसाठी जागृक राहणे आवश्यक आहे, असेही त्यांनी सांगितले.

सभा संपल्यानंतर खासदार प्रतिभा धानोरकर यांच्या नेतृत्वाखालील शिष्टमंडळाने जिल्हाधिकाऱ्यांची भेट घेतली. मुख्य निवडणूक आयुक्तांच्या राजीनाम्यासह विविध प्रमुख मागण्यांचे निवेदन महामहिम राष्ट्रपती द्रौपदी मुर्मुजी यांच्या नावे या शिष्टमंडळाने सादर केले.

या आंदोलनात आमदार ॲड. अभिजित वंजारी, माजी जिल्हाध्यक्ष विनायक बांगडे, सुभाषसिंग गौर, विनोद दत्तात्रय, संतोष लहामगे, गडचिरोली काँग्रेस जिल्हाध्यक्ष महेंद्र ब्राम्हणवाडे, युवक काँग्रेस जिल्हाध्यक्ष शंतनू धोटे, शहर जिल्हाध्यक्ष राजेश अडुर, महिला काँग्रेस जिल्हाध्यक्षा कुंदाताई जेनेकर, महिला काँग्रेस शहर अध्यक्षा चांदाताई वैरागडे, प्रमोद बोरीकर, दिपक वाढई, उमाकांत धांडे, सपना मोरे, पवन भगत, सुनीता गोवर्धन, नगराध्यक्ष अरुण धोटे, माजी महापौर संगीता अमृतकर, गटनेते सुरेंद्र अडबाले, नगराध्यक्षा दिप्ती सोनटक्के, राजु रेड्डी, दिनेश चोखारे, तालुकाध्यक्ष विजय गावंडे, प्रमोद चौधरी, अनिल नरुले, रंजन लांडे, गोविंदा उपरे, शहराध्यक्ष अब्दुल करीम शेख, निर्मला कुडमेथे, तसेच युवक काँग्रेसचे सौरभ टिपले, नरेश गुलप्ल्ली, मंगेश बावणे, अभिजीत गोंगले आणि आशिष बोंडे सहभागी झाले. त्यांच्यासह काँग्रेसचे सर्व प्रमुख पदाधिकारी, कार्यकर्ते आणि नागरिक मोठ्या संख्येने उपस्थित होते.