नागपूर पदवीधर निवडणूक: सोलेंचे नाव मतपत्रिकेवर कायम, वंजारी यांना विजयाचा विश्वास

नागपूर विभाग पदवीधर मतदारसंघाच्या निवडणुकीसाठी आज मतदान होत आहे. भाजपमध्ये झालेली ऐतिहासिक बंडखोरी शांत करण्यात पक्षाच्या श्रेष्ठींना यश आले आहे. बंडखोर उमेदवार अनिल सोले यांनी पक्षाचे अधिकृत उमेदवार सुधाकर कोहळे यांना आपला पाठिंबा जाहीर केला आहे. तरीही मतपत्रिकेवर सोले यांचे नाव दिसत आहे.

यामागचे कारण असे की, उमेदवारी अर्ज मागे घेण्याची मुदत 9 ऑक्टोबरला संपली आणि त्यानंतर सोले यांनी कोहळे यांना पाठिंबा जाहीर केला. सगळी घडामोड मुदतीनंतर झाल्यामुळे निवडणूक यंत्रणेने नियमानुसार सोले यांचे नाव मतपत्रिकेवर छापले. एकूण 38 उमेदवारांच्या यादीत ते 36व्या क्रमांकावर आहेत. एखाद्या मतदाराला त्यांना मतदान करायचे असेल, तर तो ते करू शकतो, कारण नाव मतपत्रिकेवर आहे.

यापूर्वीही नागपूर पदवीधर मतदारसंघाच्या निवडणुकीत अशाच प्रकारे पाठिंबा जाहीर केलेल्या उमेदवाराला काही हजार मते पडल्याचे उदाहरण घडले आहे. त्यामुळे भाजप उमेदवाराला पाठिंबा देऊन स्वतःला रिंगणाबाहेर असल्याचे सांगणारे सोले आजच्या मतदानात किती मते घेतात, याकडे सगळ्यांचे लक्ष असेल.

काँग्रेसचे उमेदवार अभिजीत वंजारी यांनी मतदार यादीबद्दल चिंता व्यक्त केली. माझ्यासह 8,500 मतदारांची नावे यादीत दोनदा आहेत, ही चिंतेची बाब आहे, अशी प्रतिक्रिया त्यांनी दिली. सोले यांना कोहळे यांच्या समर्थनात उभे करण्यात भाजप यशस्वी झाले असले, तरी त्यांचे नाव मतपत्रिकेवर कायम आहे, याकडे वंजारी यांनी लक्ष वेधले. भाजपच्या कार्यपद्धतीवर नाराज असलेले भाजपचे मतदार आणि सोले यांचा चाहता वर्ग त्यांना मोठ्या प्रमाणात मतदान करेल, असा विश्वास वंजारी यांनी बोलून दाखवला. संघटनेच्या पातळीवर आमचे काम मोठ्या प्रभावीपणे झाले आहे, त्यामुळे आपला विजय निश्चित आहे, असेही काँग्रेस उमेदवार वंजारी म्हणाले.

आज नागपूर विभाग पदवीधर मतदारसंघात 2 लाख 55 हजार 603 मतदार मतदानाचा हक्क बजावू शकतील. विभागातील सहा जिल्ह्यांत मिळून 445 मतदान केंद्रे उभारण्यात आली आहेत. सर्वाधिक 1 लाख 44 हजार 466 मतदार नागपूर जिल्ह्यात आहेत. त्यानंतर चंद्रपूर जिल्ह्यात 32 हजार 265, गोंदिया जिल्ह्यात 22 हजार 176, वर्धा जिल्ह्यात 21 हजार 742, भंडारा जिल्ह्यात 21 हजार 349 आणि गडचिरोली जिल्ह्यात 13 हजार 608 मतदार आहेत.

या निवडणुकीत एकूण 38 उमेदवार रिंगणात आहेत. त्यापैकी भाजपचे सुधाकर कोहळे, काँग्रेसचे अभिजीत वंजारी, वंचित बहुजन आघाडीचे मंगेश वानखेडे आणि शिक्षक भारतीचे अतुल देशमुख हे प्रमुख उमेदवार आहेत. मतदान सुरळीत पार पडावे म्हणून राज्य सरकारचे 2 हजार 535 अधिकारी व कर्मचारी निवडणूक ड्युटीवर नेमण्यात आले आहेत. केंद्र सरकारच्या 476 अधिकाऱ्यांकडेही निवडणुकीची जबाबदारी सोपवण्यात आली आहे.