सिंदेवाहीत वाघाच्या हल्ल्यात महिला शेतकरी ठार; दोन दिवसांत दुसरा बळी

चंद्रपूर जिल्ह्यातील सिंदेवाही तालुक्यात वाघाच्या हल्ल्यात आणखी एका शेतकऱ्याचा जीव गेला आहे. तालुक्यातील भेंडाळा येथे ४० वर्षांच्या महिला शेतकरी प्रेमिला पुंडलिक महाडोले यांचा वाघाच्या हल्ल्यात मृत्यू झाला. त्यांचा मृतदेह त्यांच्या शेतातच सापडला. या घटनेमुळे संपूर्ण परिसरात भीतीचे वातावरण पसरले आहे.

प्रेमिला महाडोले तिळाचे पीक कापण्यासाठी आपल्या शेतात गेल्या होत्या. त्याच वेळी दबा धरून बसलेल्या वाघाने त्यांच्यावर हल्ला केला, अशी प्राथमिक माहिती सिंदेवाहीच्या वनपरिक्षेत्र अधिकारी (RFO) अंजली सायंकार यांनी दिली. या प्राथमिक माहितीनुसार त्यांनी हल्ल्याला दुजोरा दिला आहे.

ही घटना घडल्यानंतर गावकऱ्यांमध्ये तीव्र संताप आणि भीती पसरली आहे. चालू वर्षात माणूस आणि वन्यजीव यांच्यातील संघर्षात गेलेला हा ३५ वा बळी आहे. तालुक्यात वाघाचा मुक्काम आणि वन्यजीवांचे हल्ले सातत्याने सुरूच असून, एकापाठोपाठ एक घटना घडत असल्याने सगळीकडे दहशतीचे सावट आहे.

विशेष म्हणजे गेल्या दोन दिवसांतच तालुक्यात वाघाच्या हल्ल्यात दोन शेतकऱ्यांचा मृत्यू झाला आहे. २४ ऑक्टोबर रोजी सिंदेवाही तालुक्यातील पळसगाव जाट येथे शेतात गेलेले शेतकरी नाना कांबडी यांना दबा धरून बसलेल्या वाघाने ठार केले होते. त्यानंतर आज पुन्हा सिंदेवाही तालुक्यातच एका महिला शेतकऱ्याचा बळी गेला.

एकामागून एक घटना घडत असल्याने शेतकरी, शेतमजूर आणि पशुपालक यांच्यात मोठी दहशत आहे. आपल्याच मालकीच्या शेतात पोटासाठी काम करायला जाणे जिवावर बेतत असल्याने शेतकरी हवालदिल झाले आहेत. शेतातली कामे कशी करायची, असा प्रश्न त्यांच्यासमोर उभा राहिला आहे.

माणूस आणि वन्यजीव यांच्यातील वाढता संघर्ष रोखण्यात वनविभाग अपयशी ठरत असल्याचा आरोप गावकऱ्यांनी केला आहे. त्यांनी तीव्र चिंता व्यक्त केली असून, वनविभागाने तातडीने कठोर उपाययोजना कराव्यात आणि सुरक्षेची हमी द्यावी, अशी मागणी त्यांनी केली आहे. मानवी जीवांचे रक्षण करण्यासाठी वनविभागाने ठोस पावले उचलावीत, अशी आक्रमक मागणी नागरिकांकडून होत आहे.