नागपूरच्या वाठोड्यात भाडेकरूच्या फ्लॅटमध्ये बनावट नोटांचा साठा, घरमालकाने कुलूप तोडताच बिंग फुटले

नागपूरमधील वाठोडा पोलीस ठाण्याच्या हद्दीत येणाऱ्या चैतन्येश्वरनगर परिसरात एका भाडेकरूच्या खोलीत लाखो रुपयांच्या बनावट नोटा सापडल्या आहेत. या प्रकारामुळे परिसरात मोठी खळबळ उडाली आहे. घरमालकाने खोली उघडल्यानंतर हे सगळे समोर आले.

पोलिसांनी घटनास्थळावरून नोटांचे बंडल, प्रिंटर आणि इतर साहित्य जप्त केले आहे. याप्रकरणी गुन्हा दाखल करून पोलिसांनी तपास सुरू केला आहे.

पुष्पक भांडारकर उर्फ भेंडारकर उर्फ बेंडे असे संशयिताचे नाव आहे. तो चैतन्येश्वरनगर येथील रमेश हरडे यांच्या घरी भाड्याने राहत होता. गेल्या काही दिवसांपासून तो घरी परतला नव्हता. त्याच्याकडे काही महिन्यांचे भाडेही थकले होते. भाड्याबद्दल विचारले की तो शस्त्राचा धाक दाखवून दमदाटी करतो, अशी तक्रार हरडे यांनी याआधीच वाठोडा पोलिसांकडे केली होती.

पुष्पक बराच काळ घरी आला नाही, म्हणून हरडे यांनी त्याच्या खोलीचे कुलूप तोडले आणि ते आत गेले. तेव्हा त्यांना छापील नोटांसारखे दिसणारे कागदी बंडल आणि प्रिंटर दिसला. त्यांनी लगेच ही माहिती पोलिसांना दिली. पोलिसांचे पथक घटनास्थळी पोहोचले आणि त्यांनी सगळे साहित्य जप्त केले.

खोलीच्या तपासणीत ५०० रुपयांच्या ३७ लाखांच्या नोटा दोन्ही बाजूंनी छापलेल्या आढळल्या. ४८ लाखांच्या नोटा मात्र फक्त एका बाजूने छापलेल्या होत्या. संशयित पुष्पक मुंबईत असल्याची माहिती पोलिसांना मिळाली आहे. या प्रकरणाचा पुढील तपास सुरू आहे.

वाठोड्यातील थ्री स्टार को-ऑपरेटिव्ह सोसायटीमधील पहिल्या मजल्यावर हा वनबीएचके फ्लॅट होता. तो भांडारकर याने भाड्याने घेतला होता. तो फ्लॅट रिकामा करत नव्हता आणि घरमालक हरडे यांना धमकीही देत होता. भांडारकर परत आला नाही, तेव्हा हरडे यांनी दरवाजाचे कुलूप तोडून आत प्रवेश केला. त्यांना सोफ्यावर ५०० रुपयांच्या नोटांसारख्या दिसणाऱ्या नोटा इकडेतिकडे पडलेल्या दिसल्या.

आता भांडारकर कुठे आहे, त्याने या नोटा कुठे छापल्या, तो एखाद्या रॅकेटचा सदस्य आहे का आणि त्याचे इतर साथीदार कोण आहेत, या सगळ्याचा तपास पोलीस करत आहेत.