नागपूर पदवीधर जागा: कोहले यांच्या नावानंतर अनिल सोले अपक्ष लढणार, भाजपात बंडखोरीची जुनी परंपरा

विधान परिषदेच्या नागपूर विभाग पदवीधर मतदारसंघासाठी भाजपने सुधाकर कोहले यांचे नाव जाहीर केले आणि लगेचच पक्षात नाराजी उफाळली. माजी आमदार आणि माजी महापौर अनिल सोले यांनी सोशल मीडियावर सांगितले की ते अपक्ष उमेदवार म्हणून आपला उमेदवारी अर्ज भरणार आहेत.

निवडणुकीच्या वेळी प्रत्येक पक्षात उमेदवारीसाठी इच्छुक अनेक असतात, पण तिकीट एकालाच मिळते. मग काही इच्छुक बंडाचा मार्ग धरतात. भाजपसारख्या शिस्तबद्ध पक्षात इतर पक्षांपेक्षा असे कमी दिसते, असे म्हटले जाते. यावेळी मात्र सोले यांच्या निर्णयामुळे ते नागपूरमधील भाजपच्या काही बंडखोरांच्या यादीत गेले आहेत.

पक्षात मोठी खळबळ उडाली आहे. अभाविपमधून राजकारणाची सुरुवात करणारे, पाच वेळा नगरसेवक झालेले, महापौर झालेले आणि 2014 मध्ये याच जागेवरून विधान परिषदेत पोहोचलेले सोले यांच्यासारखे ज्येष्ठ नेते पक्षाच्या लाइनबाहेर कसे जाऊ शकतात, अशी चर्चा सुरू आहे.

सोले यांनी तिकिटाची मागणी केली होती आणि तयारी खूप आधीपासून सुरू केली होती. मतदार नोंदणी सुरू झाल्यापासून ते सतत मतदारांच्या संपर्कात होते. गेले दोन महिने त्यांनी या जागेवर आपला दावा मांडला होता. केंद्रीय मंत्री नितीन गडकरी यांच्या उपस्थितीत सोले यांच्या समर्थकांनी शक्तिप्रदर्शन करून त्यांचा दावा कायम ठेवला. सुमारे आठवडाभरापूर्वी सोले यांनी निवडणूक लढवण्याचा संकल्पही बोलून दाखवला होता. त्यानंतर त्यांच्या समर्थकांनी सोशल मीडियावर "आमचं ठरलं" अशा पोस्ट टाकून बंडाचा इशारा आधीच दिला होता.

सोले सोमवारी दुपारी 1.30 वाजता अर्ज भरणार आहेत. 2020 मध्ये त्यांनी पुन्हा तिकीट मागितले होते, पण विद्यमान आमदार असूनही त्यांचे तिकीट कापून संदीप जोशी यांना उमेदवारी देण्यात आली होती. जोशी ती निवडणूक हरले. आता सोले यांनी पुन्हा दावा केला होता.

सोले यांच्या निर्णयाने भाजप नेत्यांना धक्का बसला असून नुकसान टाळण्यासाठी पक्षात धावपळ सुरू झाली आहे. त्यांची समजूत काढण्याचे प्रयत्न केले जाणार आहेत. दोन-तीन दिवसांत सोले आपला अर्ज मागे घेतील, असा विश्वास या कामात गुंतलेल्या पक्षाच्या रणनीतिकारांनी व्यक्त केला आहे. सोले भाजपच्या कोअर कमिटीचे सदस्य आहेत. रविवारी संध्याकाळी झालेल्या बैठकीला त्यांनाही बोलावण्यात आले होते, पण ते बैठकीला आले नाहीत. त्यांच्या उमेदवारीमुळे किती नुकसान होईल, याचा अंदाज घेतला जात असल्याचीही माहिती आहे.

अॅड. रमन सेनाड यांचीही समजूत काढली जाणार आहे. राष्ट्रीय स्वयंसेवक संघाच्या शिशू शाखेपासून संघकार्याशी जोडलेले असल्याचा दावा करत सेनाड यांनी अभाविप, विहिंप आणि भाजपमध्ये केलेल्या कामाचा हवाला देऊन उमेदवारी मागितली होती. त्यासाठी त्यांनी मुख्यमंत्री देवेंद्र फडणवीस आणि केंद्रीय मंत्री नितीन गडकरी यांची भेट घेऊन आग्रहही धरला होता. पक्षाने त्यांच्या मागणीकडे लक्ष दिले नाही, म्हणून ते लोकजागृती मोर्चाकडून अर्ज भरणार आहेत. तेही भाजपच्या अधिकृत उमेदवारासाठी अडचण वाढवतील, असे म्हटले जात आहे. हे बंडखोर नाव मागे घेतात की मैदानात टिकून राहतात, हे पाहावे लागेल.

भाजपमध्ये बंडखोरी याआधीही झाली आहे. 2009 मध्ये दक्षिण नागपूरची जागा शिवसेनेला गेली. मोहन मते यांना ते मान्य नव्हते आणि पक्षाचा अधिकृत निर्णय असूनही त्यांनी निवडणूक लढवण्याचे ठरवले. त्यांनी अपक्ष म्हणून अर्ज भरला आणि ते रिंगणात राहिले. नंतर त्यांना पक्षातून काढून टाकण्यात आले आणि सुमारे दहा वर्षे ते पक्षाबाहेर होते. 2014 नंतर त्यांना पुन्हा भाजपमध्ये घेण्यात आले आणि ते आता आमदार आहेत.

त्याच 2009 च्या विधानसभा निवडणुकीत गिरीश व्यास यांनीही तिकीट न मिळाल्याने बंड केले होते, पण मते यांच्यासारखी त्यांनी शेवटपर्यंत निवडणूक लढवली नाही. व्यास मध्य नागपूरच्या जागेसाठी इच्छुक होते, पण पक्षाने ती जागा विकास कुंभारे यांना दिली. त्यानंतर व्यास यांनी अपक्ष म्हणून अर्ज भरला. मात्र नितीन गडकरी यांची भेट घेतल्यानंतर त्यांनी आपले नाव मागे घेतले होते.