नागपूर पदवीधर मतदारसंघासाठी भाजपची उमेदवारी जाहीर; सुधाकर कोहळे यांना संधी, अनिल सोले अपक्ष लढण्याच्या तयारीत

विधान परिषदेच्या नागपूर विभाग पदवीधर मतदारसंघासाठी भाजपने आपला उमेदवार ठरवला आहे. पक्षाने सुधाकर कोहळे यांच्या नावाची घोषणा केली आहे. पण उमेदवारी जाहीर होताच भाजपमध्ये बंडाची शक्यता निर्माण झाली आहे.

माजी आमदार अनिल सोले हे अपक्ष म्हणून निवडणूक लढवण्याच्या तयारीत असल्याची माहिती समोर आली आहे. भाजपकडून उमेदवारीसाठी सुधाकर कोहळे आणि अनिल सोले हे दोघेही इच्छुक होते. अखेर पक्षाने कोहळे यांच्या नावावर शिक्कामोर्तब केले. त्यानंतर सोले यांनी निवडणुकीच्या रिंगणात उतरण्याची तयारी सुरू केली आहे.

सूत्रांच्या माहितीनुसार, सोले सोमवारी दुपारी अपक्ष उमेदवार म्हणून उमेदवारी अर्ज दाखल करण्याची शक्यता आहे. म्हणजेच भाजपने उमेदवार जाहीर केल्यानंतर पक्षाचा एक माजी आमदारच वेगळी वाट धरण्याच्या तयारीत असल्याचे सांगितले जात आहे.

मागच्या पदवीधर निवडणुकीतही भाजपने ऐनवेळी अनिल सोले यांना डावलून संदीप जोशी यांना उमेदवारी दिली होती. सोले हे केंद्रीय मंत्री नितीन गडकरी यांचे निकटवर्तीय मानले जातात. त्यांनी नागपूरचे महापौरपदही भूषवले आहे. त्यामुळे सोले आता पुढे काय भूमिका घेतात, याकडे भाजपसह राजकीय वर्तुळाचे लक्ष लागले आहे.