विधान परिषद निवडणूक: नागपुरात अनिल सोले रिंगणातच, पुण्यात मंगेश चिवटे यांची माघार

महाराष्ट्रात विधान परिषदेच्या पाच जागांसाठी होत असलेल्या निवडणुकीत उमेदवारी अर्ज मागे घेण्याची शेवटची मुदत शुक्रवारी संपली. मुदत संपताच निवडणुकीचे चित्र स्पष्ट झाले आहे. नागपुरात भाजपमधील बंडखोरी मात्र कायम आहे.

नागपूर पदवीधर मतदारसंघातून भाजपचे बंडखोर उमेदवार अनिल सोले रिंगणात ठाम आहेत. त्यांनी अर्ज मागे घ्यावा म्हणून त्यांची मनधरणी करण्याचे बरेच प्रयत्न झाले, पण ते नॉट रिचेबल झाले आहेत. नागपूर विभागाच्या या पदवीधर मतदारसंघातून भाजपने सुधाकर कोहळे यांना अधिकृत उमेदवार जाहीर केले आहे. त्यामुळे या जागेवर तिरंगी लढत होणार हे आता निश्चित मानले जात आहे. काँग्रेसने पुन्हा एकदा अभिजीत वंजारी यांना उमेदवारी दिली आहे.

दरम्यान, जनसंघाचे माजी राष्ट्रीय अध्यक्ष बच्छराज व्यास यांचे पुत्र गिरीश व्यास यांनी भाजपचे प्राथमिक सदस्यत्व आणि पक्षातील आपली सर्व पदे सोडली आहेत. नागपूर पदवीधर निवडणुकीत भाजपचे बंडखोर उमेदवार अनिल सोले यांना पाठिंबा देत असल्याचे त्यांनी जाहीर केले आहे. महाल परिसरात सोले यांच्या प्रचारासाठी त्यांनी कार्यालयही सुरू केले आहे. यामुळे नागपुरात भाजपला मोठा धक्का बसला आहे.

पुण्यात मात्र चित्र वेगळे राहिले. पुणे शिक्षक मतदारसंघात शिंदे गटाचे उमेदवार मंगेश चिवटे यांनी आपला उमेदवारी अर्ज मागे घेतला. या मतदारसंघात एकनाथ शिंदे यांना माघार घ्यावी लागली, असे म्हटले जात आहे. चिवटे यांच्या माघारीमुळे पुण्यात महायुतीतील अंतर्गत लढत टळली आहे. या जागेवर भाजपने कौस्तुभ गावडे यांना उमेदवारी दिली आहे.

पुणे पदवीधर मतदारसंघातही राष्ट्रवादीच्या सुनेत्रा पवार गटाचे बंडखोर भैया माने यांनी अर्ज मागे घेतला. या जागेवर भाजपने स्मिता जाधव यांना उमेदवार केले आहे. वैद्यकीय शिक्षणमंत्री हसन मुश्रीफ, जनसुराज्य शक्ती पक्षाचे नेते विनय कोरे आणि समित कदम यांनी केलेल्या विनंतीनंतर माने यांनी माघार घेतल्याची माहिती आहे.

या निवडणुकीत पुणे शिक्षक मतदारसंघ, पुणे, नागपूर आणि छत्रपती संभाजीनगर पदवीधर मतदारसंघ, तसेच अमरावती शिक्षक मतदारसंघ अशा पाच जागा आहेत. या पाचही जागांसाठी शुक्रवार हा नामनिर्देशन मागे घेण्याचा अखेरचा दिवस होता.

ज्या जागांवर बंडखोरी झाली होती, त्यापैकी काही ठिकाणी बंडखोरांनी अर्ज मागे घेतले. काही ठिकाणी मात्र बंडखोर आपल्या उमेदवारीवर कायम आहेत. त्यामुळे महाविकास आघाडी आणि महायुतीच्या अधिकृत उमेदवारांमधील तणाव वाढण्याची शक्यता आहे. अर्ज मागे घेण्याची मुदत संपल्याने आता निवडणुकीचे चित्र स्पष्ट झाले आहे.