नागपूर पदवीधरसाठी कोहळेंना उमेदवारी, सोले आणि सेनाड आज अर्ज भरणार असल्याची माहिती

नागपूर पदवीधर मतदारसंघाच्या निवडणुकीसाठी भाजपने सुधाकर कोहळे यांना उमेदवारी दिली आहे. त्यांची लढत काँग्रेसच्या अभिजित वंजारी यांच्याशी होणार आहे. हा मतदारसंघ अतिशय प्रतिष्ठेचा मानला जातो. तिथला विजय मिळवण्यासाठी भाजपने मोठी मोर्चेबांधणी केली आहे.

पक्षातील अनेक नावे ही निवडणूक लढवण्यासाठी इच्छुक होती. मात्र पक्षाशी एकनिष्ठ राहिलेल्या आणि पेशाने शिक्षक असलेल्या कोहळे यांच्यावर भाजपने विश्वास दाखवून त्यांना उमेदवारी दिली आहे.

याच मतदारसंघातून इच्छुक असलेले दुसरे नाव म्हणजे माजी आमदार अनिल सोले. पक्षाने उमेदवारी दिली नाही, म्हणून त्यांनी बंडखोरीचा पवित्रा घेतला आहे. त्यामुळे सोले आज दुपारी अपक्ष म्हणून उमेदवारी अर्ज भरणार असल्याची माहिती आहे.

सोले यांच्यापाठोपाठ संघपरिवारातील पदाधिकारी रमण सेनाड यांनीही बंडखोरी केली आहे. भाजपकडून कोहळे यांची उमेदवारी जाहीर झालेली असताना सेनाड हेदेखील आज आपला अर्ज भरत असल्याची माहिती आहे.

सेनाड हे विश्व हिंदू परिषदेच्या मंदिर आयामचे विदर्भसह प्रांतप्रमुख आहेत. ते म्हणाले की, मी गेली पन्नास वर्षे संघपरिवारात काम करतो आणि तीस वर्षांपासून भाजपमध्ये काम करत आहे. अनेक वेळा उमेदवारी मागितली, पण पक्षाने तिकीट नाकारले. तरीही प्रामाणिकपणे पक्षाचे आणि संघाचे काम सुरू ठेवले. आता कार्यकर्त्यांच्या आग्रहामुळे उमेदवारी अर्ज भरत असल्याचे सेनाड यांनी सांगितले.

या बंडखोरीमुळे नागपूर विभाग पदवीधर मतदारसंघात भाजपची डोकेदुखी वाढली आहे. पक्ष या बंडखोरांची समजूत कशी काढतो, हे पाहणे महत्त्वाचे ठरणार आहे.

दुसरीकडे, अधिकृत उमेदवार सुधाकर कोहळे आज आपला नामांकन अर्ज भरणार आहेत. महसूल मंत्री चंद्रशेखर बावनकुळे आणि नागपूर विभागातील इतर पदाधिकाऱ्यांच्या उपस्थितीत ते सकाळी १० वाजता नागपूरच्या विभागीय आयुक्त कार्यालयात नामांकन दाखल करणार आहेत.

कोहळे यांनी प्रतिक्रिया दिली की, नागपूर पदवीधर मतदारसंघासाठी पक्षाने माझ्यावर विश्वास टाकला, हे पक्षनिष्ठेचे फळ आहे. गेल्या वेळी या मतदारसंघात ५७ वर्षांनंतर पराभव झाला होता, यावेळी त्याचा बदला घ्यायची वेळ आहे. आम्ही ज्या प्रकारे मतदार नोंदणी केली, त्यामुळे विजय आमचाच असेल, असेही कोहळे यांनी सांगितले.

विधानपरिषद निवडणुकीचे वेळापत्रक असे आहे. अधिसूचना २९ सप्टेंबर २०२६ रोजी जारी झाली. उमेदवारी अर्ज भरण्याची अंतिम तारीख ६ ऑक्टोबर २०२६ आहे. अर्जांची छाननी ७ ऑक्टोबर २०२६ रोजी होईल, तर अर्ज मागे घेण्याची अंतिम तारीख ९ ऑक्टोबर २०२६ आहे. मतदान २३ ऑक्टोबर २०२६ रोजी सकाळी ८ ते दुपारी ४ या वेळेत होईल आणि मतमोजणी व निकाल २७ ऑक्टोबर २०२६ रोजी लागणार आहे.