नागपूर पदवीधर मतदारसंघात नितेश कराळे आज भरणार उमेदवारी अर्ज, बंडखोरीचा दावा त्यांनी फेटाळला

नागपूर पदवीधर मतदारसंघाच्या निवडणुकीत आता चुरस वाढली आहे. या निवडणुकीसाठी काँग्रेस आणि भाजप या दोन मोठ्या पक्षांनी आपापले उमेदवार जाहीर केले आहेत. काँग्रेसने अभिजीत वंजारी यांना उमेदवारी दिली आहे, तर भाजपने सुधाकर कोहळे यांचे नाव जाहीर केले आहे. या दोन मोठ्या पक्षांनी उमेदवार जाहीर केल्यानंतर आता बंडखोरीला सुरुवात झाली आहे.

भाजपचे अनिल सोले यांनी उमेदवारी अर्ज दाखल करणार असल्याचे जाहीर केले आहे. तसेच शरद पवार गटाचे नितेश कराळे यांनीही नागपूर पदवीधर मतदारसंघासाठी उमेदवारी अर्ज दाखल करणार असल्याचे सांगितले आहे.

कराळे आज, सोमवारी, उमेदवारी अर्ज दाखल करणार आहेत. त्यासाठी ते नागपूरच्या संविधान चौकातून रॅली काढणार आहेत. कराळे यांनी अर्ज भरण्याची घोषणा केल्यामुळे महाविकास आघाडीत बंडखोरी झाल्याचा दावा केला जात आहे. मात्र खुद्द नितेश कराळे यांनी हा दावा फेटाळला आहे.

पदवीधर विधानपरिषदेच्या निवडणुकीत पक्षाचे चिन्ह नसते, त्यामुळे याला बंडखोरी म्हणता येणार नाही, असे मत कराळे गुरुजींनी व्यक्त केले. आपल्याला मोठ्या संख्येने मतदारांचा प्रतिसाद मिळत आहे, असा विश्वासही कराळे मास्तरांनी व्यक्त केला.

राष्ट्रवादीसह काँग्रेस, शिवसेना, भाजप आणि सर्वपक्षीय अनेकांचा पाठिंबा आपल्याला आहे, असा विश्वास कराळे यांनी व्यक्त केला. हा पदवीधरांचा मतदारसंघ आहे आणि तिथे पदवीधरांसाठी लढणारा माणूस असला पाहिजे, असे ते म्हणाले.

सध्याच्या व्यवस्थेत एखादा प्रस्थापित माणूसच पाठवला जातो, असा आरोप कराळे यांनी केला. त्यांच्या म्हणण्यानुसार, असा माणूस आपल्या शाळा-कॉलेज वाचवण्यासाठी तिथे जातो, किंवा एखादा माजी आमदार आपले प्रस्थ टिकवण्यासाठी सीट मिळवतो आणि घराणेशाही चालवतो. असे प्रस्थापित लोक पदवीधरांचे प्रश्नच मांडत नाहीत, असेही कराळे यांचे म्हणणे आहे.

शेतकऱ्याच्या पोरासाठी, बेरोजगार युवकासाठी आणि कर्मचाऱ्यांचे मुद्दे घेऊन लढणारा एखादा सुशिक्षित पदवीधर माणूस तिथे गेला, तर तो चांगले मुद्दे मांडू शकेल, असे कराळे यांनी सांगितले. त्यामुळे याला बंडखोरी म्हणता येणार नाही, असेही त्यांनी पुन्हा म्हटले आहे.

कराळे मास्तर काही आठवड्यांपूर्वी तुरुंगातून जामिनावर बाहेर आले आहेत. एका विधानामुळे त्यांच्यावर अॅट्रोसिटीचा गुन्हा दाखल करण्यात आला होता. त्यानंतर काही आठवड्यांनी ते जामिनावर बाहेर आले. तुरुंगातून बाहेर आल्यानंतर समाजकार्य आणि राजकारण सुरूच ठेवणार असल्याचे कराळे मास्तरांनी जाहीर केले होते. त्यावेळी त्यांनी सत्ताधाऱ्यांवर गंभीर आरोप केले होते.