नागपूर पदवीधरमध्ये अनिल सोले अपक्ष अर्ज भरणार; फडणवीस यांचे बंडखोरांना आवाहन

विधान परिषदेच्या पदवीधर आणि शिक्षक मतदारसंघांच्या निवडणुकीआधी महायुतीतले अंतर्गत मतभेद समोर आले आहेत. नागपूर पदवीधर मतदारसंघासाठी भाजपने माजी आमदार सुधाकर कोहळे यांना उमेदवारी दिली आहे. त्यावर भाजपचेच माजी आमदार अनिल सोले यांनी नाराजी व्यक्त केली असून ते अपक्ष म्हणून निवडणूक लढवणार आहेत.

सोले आज, ५ ऑक्टोबर रोजी दुपारी १.३० वाजता अपक्ष उमेदवारी अर्ज दाखल करणार आहेत, अशी माहिती त्यांनी स्वतः दिली. कोहळे यांची उमेदवारी जाहीर होताच सोले यांच्या समर्थकांनी सोशल मीडियावर नाराजी बोलून दाखवली. कार्यकर्त्यांच्या आग्रहामुळे अपक्ष लढण्याचा निर्णय घेतला, असे सोले यांनी सांगितले. त्यामुळे नागपूर पदवीधर मतदारसंघात भाजपसमोर पक्षातूनच आव्हान उभे राहिले आहे.

पुणे शिक्षक मतदारसंघातही भाजप आणि शिंदे गट यांच्यात उघड मतभेद आहेत. भाजपने या जागेसाठी कौस्तुभ गावडे यांना उमेदवारी दिली आहे. शिंदे गटानेही मंगेश चिवटे यांना रिंगणात उतरवण्याची तयारी सुरू केली आहे. एकनाथ शिंदे यांच्या सूचनेनुसार आपण उमेदवारी अर्ज दाखल करण्याचा निर्णय घेतला, असे चिवटे यांनी सांगितले आहे.

यामुळे महायुतीतला जागावाटपाचा प्रश्न पुन्हा समोर आला आहे. भाजप आणि शिवसेना या दोघांनी स्वतंत्र उमेदवार उभे केले, तर पुणे शिक्षक मतदारसंघात महायुतीतले हे दोन्ही घटक पक्ष एकमेकांसमोर येण्याची शक्यता आहे.

या सगळ्यात मुख्यमंत्री देवेंद्र फडणवीस काय भूमिका घेतात, याकडे लक्ष लागले आहे. उमेदवारी जाहीर झाल्यानंतर सुधाकर कोहळे यांनी फडणवीस यांची भेट घेतली होती. सोले यांची नाराजी दूर करण्याचे प्रयत्न होतात का आणि पुण्यातला उमेदवारीचा तिढा कसा सुटतो, याकडेही राजकीय वर्तुळाचे लक्ष आहे.

फडणवीस यांनी बंडखोरांना आवाहन केले आहे. पक्षाने ज्यांना उमेदवारी दिली आहे, त्यांनीच निवडणूक लढवावी आणि इतरांनी माघार घ्यावी, असे ते म्हणाले. विधान परिषदेसाठी भाजपने तीन जागांवर उमेदवार दिले असून या तिन्ही जागा जिंकू, असा आपला विश्वास आहे, असेही त्यांनी सांगितले. उर्वरित जागेवर मित्रपक्ष लढतील आणि तेही जिंकतील, असा विश्वास असल्याचे फडणवीस यांनी म्हटले. त्यानंतरही जे बंडखोरी करतील, त्यांच्याशी चर्चा करू, असेही फडणवीस यांनी नमूद केले.

निवडणुकीचा कार्यक्रम असा आहे. उमेदवारी अर्ज दाखल करण्याची अंतिम तारीख ६ ऑक्टोबर आहे. अर्जांची छाननी ७ ऑक्टोबर रोजी होईल, तर अर्ज मागे घेण्याची अंतिम तारीख ९ ऑक्टोबर आहे. मतदान २३ ऑक्टोबर रोजी होणार असून मतमोजणी २७ ऑक्टोबर रोजी होणार आहे.