नागपूर पदवीधर निवडणूक: डॉक्टरांच्या नावावर आधीच कुणीतरी सही केली, चौकशीची मागणी

नागपूर विभाग पदवीधर मतदारसंघाच्या निवडणुकीत दुबार मतदारांचा मुद्दा आधीपासूनच चर्चेत आहे. त्यातच आता नागपुरात एक वेगळा प्रकार समोर आला आहे. एका मतदाराच्या नावावर त्याच्या आधीच दुसऱ्या कोणीतरी मतदान करून टाकल्याचे दिसले.

दिघोरी परिसरातील अमित प्रायमरी शाळेतल्या मतदान केंद्रावर डॉ. प्रशांत गायकवाड मतदान करायला गेले होते. तिथल्या कर्मचाऱ्यांनी त्यांना सांगितले की, तुमच्या जागी आधीच कोणीतरी मतदान करून गेले आहे. गायकवाड यांनी यादीतल्या स्वाक्षरीची जागा तपासली. तेव्हा ती स्वाक्षरी दुसऱ्याच व्यक्तीची असल्याचे त्यांच्या लक्षात आले.

ही माझी स्वाक्षरी नाही आणि मी मतदान केलेलेच नाही, असे त्यांनी केंद्रातील कर्मचाऱ्यांना सांगितले. सुरुवातीला यावरून वादाची स्थिती निर्माण झाली. गायकवाड यांनी आपला मुद्दा सोडला नाही. माझ्या बोटावर मतदान केल्याची शाई नाही, मग माझ्या नावावर कोण मतदान करून गेले, असा प्रश्न त्यांनी लावून धरला. अखेर काहीतरी चूक झाल्याचे कर्मचाऱ्यांच्या लक्षात आले आणि त्यांनी प्रशांत गायकवाड यांना मतदान करू दिले.

या प्रकरणाची चौकशी व्हावी, अशी मागणी गायकवाड यांनी केली आहे. दुबार मतदारांच्या आडून काही लोक बोगस मतदानाचा प्रयत्न तर करत नाहीत ना, अशी शंकाही त्यांनी व्यक्त केली.

दरम्यान, काँग्रेसचे नेते आणि माजी मंत्री नितीन राऊत यांनी नागपुरात पदवीधर मतदारसंघासाठी मतदान केले. त्यानंतर त्यांनी मतदार यादीबाबत गंभीर आरोप केला. भाजप कार्यकर्त्यांनी नोंदवलेल्या सर्व मतदारांची नावे यादीत आहेत, पण काँग्रेस कार्यकर्त्यांनी नोंदवायला दिलेली अनेक नावे यादीत नाहीत, असे ते म्हणाले.

राऊत यांनी उदाहरण दिले की, एकाच घरातील चार सदस्यांची नावे नोंदवायला दिली, तर त्यापैकी एक किंवा दोघांचीच नावे यादीत आली. बाकीच्यांची नावे नोंदवली गेली नाहीत. सारख्याच कागदपत्रांवर दिलेली काही नावे का नोंदवली गेली नाहीत, याचे कोणतेही उत्तर निवडणूक यंत्रणेकडे नाही, असाही आरोप त्यांनी केला. यादीत हजारोंच्या संख्येने दुबार नावे आहेत. कोणीही दोनदा मतदान करणार नाही याची काळजी यंत्रणा हमीपत्र भरून घेऊन घेत असली, तरी यादीत चूक झाली आहे हे मान्यच करावे लागेल, असे नितीन राऊत म्हणाले.

काँग्रेसचे अधिकृत उमेदवार अभिजीत वंजारी यांनीही आरोप केला आहे की, मतदार यादीत माझ्यासह 8500 दुबार नावे आहेत. ही चिंतेची बाब आहे, अशी प्रतिक्रिया त्यांनी दिली.

शुक्रवारी मतदान सुरू असतानाच आणखी एक माहिती समोर आली. एकाच क्रमांकावरून 22 हजार मतदारांची नोंदणी करण्यात आली होती. काँग्रेसचे राज्याचे मुख्य प्रवक्ते अतुल लोंढे यांनी पत्रकार परिषदेत सांगितले की, निवडणूक आयोगाला वारंवार सांगूनही कारवाई होत नाही. निवडणूक आयोग भाजपसाठी काम करत आहे का, असा सवाल त्यांनी केला.