नागपूर पदवीधरमध्ये चार दिवसांत 80 हजार नोंदणी कशी? वडेट्टीवारांचा सवाल

नागपूर विभाग पदवीधर मतदारसंघात शेवटच्या चार दिवसांत 80 हजार मतदारांची नोंदणी कशी झाली, असा सवाल काँग्रेस नेते विजय वडेट्टीवार यांनी केला आहे. या नोंदणीबद्दल त्यांनी संशय व्यक्त केला असून, या मतदार नोंदणीची चौकशी व्हावी, अशी मागणी काँग्रेसकडून करण्यात आली आहे.

अमरावतीतील बंडखोरीबद्दल बोलताना वडेट्टीवार म्हणाले की, अर्ज मागे घेण्यापर्यंत अजून वेळ आहे. आम्ही चर्चा करू, संपर्क करू आणि काय मार्ग निघतो ते बघू. मात्र आता बेईमानी दिसते आहे, असे ते म्हणाले. चार दिवसांत 96 हजार नवीन अर्ज जोडले गेले, ते कुठून आले आणि चार दिवसांत हे कसे शक्य आहे, इतके फॉर्म कुठून आले, असे प्रश्न त्यांनी विचारले. याची चौकशी व्हावी अशी मागणी आम्ही करणार आहोत, हे शक्य नाही, मतचोरीचा प्रकार सुरू आहे, असा आरोपही त्यांनी केला.

आदिवासी विद्यार्थ्यांच्या आंदोलनाबद्दल बोलतानाही वडेट्टीवार यांनी सरकारवर टीका केली. त्यांच्या म्हणण्यानुसार, आंदोलन शांततेच्या मार्गाने सुरू असताना विद्यार्थ्यांनी आझाद मैदानावर परवानगी मागितली, पण ती दिली गेली नाही. त्यानंतर त्यांना पकडून जबरदस्तीने गाडीत ठेवण्यात आले. सरकार एवढे का घाबरते आहे, असा प्रश्न त्यांनी केला. सुमारे तीनशे किलोमीटरचा प्रवास करून हे विद्यार्थी तिथे पोहोचले आहेत आणि पायी चालत आपल्या मागण्या घेऊन निघाले आहेत, असेही ते म्हणाले. सरकारने आपले प्रतिनिधी पाठवावेत आणि चर्चा करावी, पण हे डरपोक आणि घाबरगुंडे सरकार आहे, असे वडेट्टीवार म्हणाले.

सत्ताधाऱ्यांना एवढी मस्ती का आहे की हवे त्यांना उचला आणि गाडीत घेऊन जा, असा सवाल करत त्यांनी पोलीस बळाचा वापर चुकीचा असल्याचे म्हटले. विद्यार्थी आपले अधिकार मागण्यासाठी रस्त्यावर येत आहेत आणि त्यांना दाबण्याचा केविलवाणा प्रयत्न सरकार करत आहे, असे मी मानतो, असे वडेट्टीवार म्हणाले.

तांदूळ घोटाळ्याबद्दलही त्यांनी भूमिका मांडली. वडेट्टीवार यांच्या म्हणण्यानुसार, मिलिंग करणारे आणि मार्केटिंग फेडरेशन यांच्याकडून धान भरडाई करून, चौकशी करून तांदूळ एफसीआयच्या गोडाऊनमध्ये पाठवला जातो. दुर्दैवाने धान मार्केटमध्ये विकला जातो आणि निकृष्ट तांदूळ आणला जातो, असे ते म्हणाले. चांगल्या दर्जाचा धान आपल्याकडे पिकतो, त्यात चंद्रपूर, गडचिरोली, भंडारा, गोंदिया या सगळ्या जिल्ह्यांचा समावेश आहे, असेही त्यांनी सांगितले. सध्या गडचिरोली येथे चौकशीची मागणी होती. या सगळ्यांची चौकशी होईल अशी अपेक्षा आहे आणि ज्यांनी ज्यांनी निकृष्ट दर्जाचा तांदूळ पुरवला असेल, त्यांच्यावर सरकारने कारवाई करावी, अशी मागणी वडेट्टीवार यांनी केली आहे.

सरकारकडून काय उपाययोजना होणार, असा प्रश्न विचारत ते म्हणाले की, सगळे मिलीभगत आहे आणि मंत्रालयात मिलिंगसाठीसुद्धा दर ठरले आहेत. चौकशी सुरू झाली असून आमचे लक्ष आहे, आम्ही यावर बारकाईने लक्ष देऊ, असे त्यांनी सांगितले. हे प्रकरण कुठल्याही प्रकारे दाबता येणार नाही आणि त्यावर आमचे लक्ष असेल, असेही वडेट्टीवार म्हणाले.