अभिजीत दिपके पोलिसांच्या ताब्यात; CJP च्या आंदोलनाचे नेतृत्व अजिंक्य शिंदेंकडे

कॉकरोच जनता पार्टीचे (CJP) संस्थापक अभिजीत दिपके यांना शनिवारी सकाळी दिल्ली पोलिसांनी ताब्यात घेतले. केंद्रीय निवडणूक आयोगाचे मुख्य निवडणूक आयुक्त ज्ञानेश कुमार यांच्याविरोधात आंदोलन करण्याची तयारी हा पक्ष करत होता. दिपके यांच्यासोबत आशुतोष रांका आणि सौरव दास यांनाही पोलिसांनी ताब्यात घेतल्याचे सांगितले जात आहे.

मिळालेल्या माहितीनुसार, दिपके यांचे विमान दिल्ली विमानतळावर उतरल्यानंतर पोलिसांचे पथक विमानात आले. त्यानंतर दिपके, रांका आणि दास यांना ताब्यात घेण्यात आल्याचे सांगण्यात येत आहे. तिघांनाही वेगवेगळ्या ठिकाणी ठेवण्यात आल्याची माहिती आहे, तर त्यांना बसमधून अज्ञातस्थळी नेण्यात आल्याचाही दावा केला जात आहे. मात्र, या तिघांना औपचारिकरीत्या अटक झाली आहे का आणि त्यांना नेमके कुठे नेले, याबाबत अधिकृत पुष्टी अजून आवश्यक आहे.

या घडामोडींमुळे जंतरमंतर येथे ठरलेल्या आंदोलनाच्या भवितव्याबाबत प्रश्न निर्माण झाले. प्रमुख नेतेच पोलिसांच्या ताब्यात असल्याने आंदोलनाचे नेतृत्व कोण करणार, असा प्रश्न उभा राहिला होता, आणि नियोजनावर परिणाम होण्याची शक्यता व्यक्त केली जात होती. मुख्य निवडणूक आयुक्त ज्ञानेश कुमार यांच्याविरोधात भूमिका घेतलेल्या या पक्षाचे पुढचे पाऊल काय असेल, याकडे सर्वांचे लक्ष होते.

त्यानंतर अभिजीत दिपके यांनी व्हिडीओ शेअर करून कार्यकर्त्यांना संदेश दिला. आपल्यासह आशुतोष रांका आणि सौरव दास यांना दिल्ली पोलिसांनी ताब्यात घेतल्याचे सांगत त्यांनी आंदोलनाच्या पुढील नेतृत्वाची घोषणा केली. ते पोलिसांच्या ताब्यात असतानाच त्यांनी CJP च्या नव्या नेत्याचे नाव जाहीर केल्याचा दावा केला जात आहे.

"सीजेपीच्या दिल्लीतील आंदोलनाचे नेतृत्व आता अजिंक्य शिंदे हा करेल. आशुतोष रांका, सौरव दास आणि मला दिल्ली पोलिसांनी ताब्यात घेतले आहे. त्यामुळे आमच्या तिघांनंतर अजिंक्य शिंदे आंदोलनाचे नेतृत्व करेल. तुम्ही माझा हा व्हिडीओ बघत असाल, तर अजिंक्य शिंदे याच्या मार्गदर्शनानुसार काम करा. आमच्या तिघांनंतर आंदोलनाची सूत्रे तो सांभाळेल," असे अभिजीत दिपके यांनी व्हिडीओत म्हटले आहे.

अजिंक्य शिंदे हे CJP चे राष्ट्रीय संघटक प्रभारी असून ते दिल्लीतील आंदोलनाचे नेतृत्व करणार आहेत. दिपके यांनी नेतृत्व सोपवल्याची घोषणा केल्यामुळे आंदोलनाची सूत्रे आता शिंदे यांच्याकडे असणार आहेत.

आता CJP चे पुढील आंदोलन कोणत्या पद्धतीने होणार आणि अजिंक्य शिंदे कार्यकर्त्यांना कसे मार्गदर्शन करणार, याकडे लक्ष लागले आहे. तिघांना ताब्यात घेण्याची नेमकी कारणे आणि त्यांची कायदेशीर स्थिती याबाबत अधिकृत माहितीची प्रतीक्षा आहे.