धंगेकर आणि बन यांच्यात सोशल मीडियावर जुंपली, शिंदे यांचा धंगेकरांना संयमाचा सल्ला

विधान परिषदेच्या पदवीधर आणि शिक्षक मतदारसंघांचे निकाल जाहीर झाल्यानंतर महायुतीतली धुसफूस आता उघडपणे बाहेर येऊ लागली आहे. भाजप आणि एकनाथ शिंदे यांची शिवसेना यांच्या नेत्यांमध्ये आरोप आणि प्रत्यारोप सुरू आहेत.

भाजपचे प्रवक्ते नवनाथ बन आणि शिवसेनेचे नेते रवींद्र धंगेकर यांच्यातलं सोशल मीडियावरचं हे भांडण सध्या राजकीय वर्तुळात चर्चेचा विषय झालं आहे. या वादात उपमुख्यमंत्री एकनाथ शिंदे यांनीही लक्ष घातलं आणि धंगेकरांना सबुरीने वागायला सांगितलं, अशी माहिती समोर आली आहे.

गेल्या काही दिवसांपासून बन आणि धंगेकर यांच्यात शाब्दिक संघर्ष सुरू आहे. त्याआधी शिवसेना नेते निलेश राणे यांनीही नवनाथ बन यांच्यावर टीका केली होती. त्यानंतर आता धंगेकर यांच्या सोशल मीडिया पोस्टमुळे नवा वाद पेटला आहे.

धंगेकर यांनी कार्टून स्टाइलमधला एक फोटो पोस्ट केला. त्याच्या पार्श्वभूमीला भाजपचं कार्यालय आणि कमळाचं चिन्ह दाखवलं आहे. एक व्यक्ती कुत्र्याला पाव खाऊ घालताना त्या चित्रात दिसते. या फोटोसोबत धंगेकर यांनी नवनाथ बन यांच्यावर आक्षेपार्ह शब्दांत टीका केली.

धंगेकर यांनी पोस्टमध्ये लिहिलं आहे: "हि याची लायकी आणि चालला धंगेकरांशी पंगा घ्यायला चालला....!! अरे बेट्या तुझे मालक लोक पण वाकड्यात जात नाही आमच्या, कधी तुझी नसबंदी होईल कळणार सुद्धा नाही तुला." या पोस्टसोबत त्यांनी #बनश्वान, #चिल्ला_पुकार आणि #Paid_Animal हे हॅशटॅगही वापरले आहेत.

नवनाथ बन यांनीही सोशल मीडियावरूनच उत्तर दिलं. त्यांनी रवींद्र धंगेकर यांचा चेहरा लावलेला, रंग बदलणाऱ्या सरड्याचा फोटो पोस्ट केला. धंगेकर यांनी याआधी ज्या पक्षांत काम केलं, म्हणजे काँग्रेस, मनसे आणि शिवसेना, त्यांची चिन्हं या चित्रात सरड्याच्या अंगावर दाखवली आहेत. बन यांनी सोबत लिहिलं आहे: "काय म्हणतात पुणेकर, रंग बदलू धंगेकर!" दोघा नेत्यांच्या या पोस्टमुळे भाजप आणि शिंदेसेना यांच्यातला वाद सोशल मीडियावर चांगलाच रंगला आहे.

या सगळ्या प्रकारात एकनाथ शिंदे यांनी हस्तक्षेप केला, अशी माहिती सूत्रांकडून मिळत आहे. महायुतीत वितुष्ट येईल अशी वक्तव्यं करू नका, असं त्यांनी धंगेकर यांच्यासह इतर नेत्यांना सांगितल्याचं समजतं. तसंच आरोप आणि प्रत्यारोपांत वेळ घालवण्याऐवजी दुष्काळी भागातल्या लोकांना मदत करण्याच्या कामाला लागा, अशा सूचनाही त्यांनी दिल्याची माहिती आहे.

निवडणुकीनंतर सुरू झालेल्या या वादामुळे महायुतीतल्या समन्वयाचा प्रश्न पुन्हा चर्चेत आला आहे. आता शिंदे यांच्या सूचनेनंतर धंगेकर आणि नवनाथ बन यांच्यातलं हे सोशल मीडियावरचं भांडण थांबणार का, हे पाहणं महत्त्वाचं ठरेल.