पुणे शिक्षक मतदारसंघात विजयासाठी 25 हजार 756 मतांचा कोटा ठरला, सानप यांना निवडून आणण्याचे शिंदेंपुढे आव्हान

पुणे शिक्षक मतदारसंघाच्या विधान परिषद निवडणुकीच्या मतमोजणीतून एक महत्त्वाची माहिती समोर आली आहे. या मतदारसंघात एकूण 51 हजार 511 मते वैध ठरली आहेत. त्या आकडेवारीच्या आधारे विजयासाठी लागणारा मतांचा कोटा 25 हजार 756 इतका निश्चित करण्यात आला आहे.

ही पहिल्या पसंतीची मते आहेत. जो उमेदवार हा कोटा पूर्ण करेल, त्याला विजयी घोषित केले जाईल. सध्याच्या स्थितीत भाजपचे कौस्तुभ गावडे आघाडीवर आहेत.

या जागेवरून एकनाथ शिंदे यांची शिवसेना आणि भाजप यांच्यात तीव्र मतभेद झाले होते. त्यामुळे या मतदारसंघात शिवसेना आणि भाजप यांच्यात मैत्रीपूर्ण सामना होत आहे. शिंदे शिवसेनेने सुरुवातीला मंगेश चिवटे यांना उमेदवारी दिली होती. त्यांनी उमेदवारी अर्जही भरला होता, पण नंतर त्यांनी माघार घेतली. त्यानंतर शिंदे शिवसेनेने अपक्ष उमेदवार सचिन सानप यांना पुरस्कृत केले. दुसरीकडे जयंत आसगावकर हे काँग्रेस आणि महाविकास आघाडीचे उमेदवार म्हणून रिंगणात आहेत. गावडे, सानप आणि आसगावकर या तिघांमध्ये मुख्य लढत आहे.

पुण्यातील हा सामना शिंदे शिवसेनेसाठी प्रतिष्ठेचा विषय मानला जात आहे. कारण आधी पक्षाचा अधिकृत उमेदवार उभा केला गेला, मग त्याने माघार घेतली आणि त्यानंतर एका अपक्ष उमेदवाराला पाठिंबा द्यावा लागला. पुण्यात एकनाथ शिंदे यांच्या शिवसेनेपेक्षा भाजपची ताकद जास्त आहे. त्यामुळे सानप यांना निवडून आणण्याचे आव्हान शिंदे यांच्यासमोर उभे आहे. मंगेश चिवटे यांनी या निवडणुकीसाठी गेली दोन-तीन वर्षे तयारी केली होती. मात्र ऐनवेळी त्यांना माघार घ्यायला लावण्यात आली.

शिंदे शिवसेनेचे पुण्यातील नेते रवींद्र धंगेकर हे सतत भाजपवर टीका करत होते. निकालाच्या दिवशीही त्यांनी भाजपवर जोरदार हल्ला चढवला. धंगेकर म्हणाले, "आज खरंतर लोकशाहीचा विजय होईल. विचारांची देवाणघेवाण करणारे नागरिक आहेत, त्यांनी विचारपूर्वकच मतदान केले असेल. कोटी रुपये, लाखो रुपये खर्च केल्याची चर्चा आपण ऐकतोय. आजचा निकाल शिक्षक आणि पदवीधरांच्या बाजूने लागेल."

पुणे शिक्षक मतदारसंघात एकूण 61 हजार 940 मतदारांची नोंदणी झाली होती. 23 ऑक्टोबर रोजी सकाळी 8 ते दुपारी 4 या वेळेत मतदान झाले. या निवडणुकीत 85.87 टक्के मतदान झाले होते.