विधान परिषद निकाल: पदवीधर, शिक्षक मतदारसंघात पवार गटाचे दोन उमेदवार आघाडीवर, काकडे म्हणाले 2029 ची वाट

विधान परिषदेच्या पदवीधर आणि शिक्षक मतदारसंघाच्या 5 जागांसाठी मतमोजणी सुरू आहे. या मोजणीत महायुतीचे 3 उमेदवार आघाडीवर आहेत, तर महाविकास आघाडीचे 2 उमेदवार पुढे आहेत. सर्वच्या सर्व जागा जिंकण्याचं महायुतीचं स्वप्न भंगलं असून महायुतीसाठी हा सर्वात मोठा धक्का मानला जात आहे.

दुसरीकडे, शरद पवार गटाचं राज्याच्या राजकारणात कमबॅक होताना दिसत आहे. पवार गटाने दोन उमेदवार दिले होते आणि ते दोन्ही विजयाच्या उंबरठ्यावर आहेत. त्यामुळे पवार गटात जल्लोषाचं वातावरण आहे. गटाचे नेते अंकुश काकडे यांनी या पार्श्वभूमीवर केलेल्या एका सूचक विधानावर तर्क वितर्क लढवले जात आहेत.

शरद पवार गटाच्या उमेदवार हर्षदा देशमुख आणि प्रतापसिंह पाटील यांचा विजय जवळपास निश्चित झाला आहे. त्यावर अंकुश काकडे यांनी प्रतिक्रिया दिली. हर्षदा देशमुख यांनी अत्यंत शिस्तबद्ध पद्धतीने प्रचार केला, त्यांनी कोणावरही टीका केली नाही आणि त्या अत्यंत सकारात्मक पद्धतीने मतदारांना भेटल्या, असं काकडे म्हणाले. मोठमोठ्या जाहिराती लावण्याऐवजी त्यांनी फक्त मतदारांशी संवाद साधत प्रचार केला आणि त्याचं फळ आता मिळत आहे, असंही ते म्हणाले.

काकडे यांच्या म्हणण्यानुसार सुशिक्षित मतदार आता जागृत झाला आहे. शासकीय यंत्रणा कशा पद्धतीने हातात घेतल्या जातात याची त्यांना कल्पना आहे आणि हे लोकांना आता समजत आहे. आमचा निकाल शंभर टक्के लागला आहे, कारण आम्ही दोन उमेदवार दिले होते आणि दोन्ही विजयाच्या उंबरठ्यावर आहेत, असं ते म्हणाले. मतदारांचा कौल बदलत आहे आणि आता आम्ही 2029 ची वाट पाहत आहोत, असं सूचक विधान काकडे यांनी केलं.

पवार गटाचे प्रदेशाध्यक्ष शशिकांत शिंदे यांनीही निकालावर प्रतिक्रिया दिली. राज्यातील सर्व मतदारांचे आभार मानतो, असं सांगून ते म्हणाले की पुणे आणि मराठवाड्यातील आमचे दोन्ही उमेदवार आघाडीवर आहेत. आजही मराठवाडा आणि पुण्यातली जनता पवारांवर प्रेम करते, असं शिंदे म्हणाले. सुशिक्षित आणि चांगले उमेदवार दिल्यानंतर असा निकाल येतो, तसंच आमच्यासाठी हा एक टर्निंग पॉईंट होईल, असंही ते म्हणाले. आमचे दोन्ही उमेदवार विजयी होतील, याची मला खात्री आहे, असं शिंदे यांनी सांगितलं.

मी पक्षाचा प्रदेश अध्यक्ष झाल्यापासून ही पहिली निवडणूक विधान परिषदेची लागली होती, असं शिंदे म्हणाले. माझ्या अध्यक्षपदाच्या काळात हा विजय मिळाला असून भविष्यामध्ये पक्षासाठी हा विजय प्रेरणा देणारा असेल, असं ते म्हणाले. महाराष्ट्रामध्ये एक वेगळ्या प्रकारचं वातावरण होतं, असं सांगून त्यांनी म्हटलं की निवडणूक प्रचारासाठी आमचे सर्व नेते आले होते आणि मित्र पक्षही आले होते. महायुतीच्या विरोधात आम्ही काम केलं आणि त्याचा हा परिणाम आहे, असं शिंदे म्हणाले.