कृषीमंत्री भरणे: महायुतीतले वाद खालच्या पातळीवर, वर मुख्यमंत्री व दोन्ही उपमुख्यमंत्री भक्कम

महायुतीमध्ये सतत वाद होत आहेत, याबद्दल कृषीमंत्री दत्तात्रय भरणे यांना प्रतिक्रिया विचारण्यात आली. हे वाद खालच्या पातळीवर आहेत, असे ते म्हणाले. त्यांच्या म्हणण्यानुसार, आमच्या लोकांमध्ये वर मुख्यमंत्री आणि दोन्ही उपमुख्यमंत्री भक्कम आहेत.

कर्जत प्रकल्पासंदर्भात दोन्ही ठाकरे बंधू मोर्चा काढणार आहेत. यावर बोलताना भरणे म्हणाले की, यात राज्याचे मुख्यमंत्री देवेंद्र फडणीस साहेब निर्णय घेतील. मुख्यमंत्री आणि दोन्ही ठाकरे बंधू एकाच मंचावर आले होते, याबद्दल विचारले असता, हा प्रश्न तुम्ही देवेंद्र बाबूंना विचारला तर बरे होईल, असे भरणे म्हणाले. कोर्टाने चांगला निर्णय दिला आहे, असेही ते म्हणाले. 22 जिल्हा परिषदांना अध्यक्ष आणि पदाधिकारी मिळतील, आणि त्या निर्णयाचे स्वागत आहे, असे त्यांनी सांगितले.

उजनी धरणावर होणाऱ्या AI डेटा सेंटर प्रकल्पाला शेतकऱ्यांचा प्रचंड विरोध आहे. गावोगावचे शेतकरी एकत्र येऊन बैठका घेत आहेत. याबद्दल भरणे यांना विचारण्यात आले. त्यांनी सांगितले की, शासनाच्या वतीने आमच्या अधिकाऱ्यांनी शेतकऱ्यांकडे जावे, प्रकल्पाबद्दल त्यांच्याशी चर्चा करावी, त्यांच्या सूचना ऐकाव्यात आणि त्यांचे समज-गैरसमज दूर करावेत. जोपर्यंत शेतकरी तयार होत नाहीत, तोपर्यंत अधिकाऱ्यांनी या गोष्टी करू नयेत, अशी माहिती त्यांनी दिली. शेतकऱ्यांशी चर्चा करूनच पुढचा निर्णय घेतला जाईल, असेही ते म्हणाले.

आंदोलकांसोबत कृषीमंत्री आंदोलनात उतरणार का, असा सवालही त्यांना करण्यात आला. त्यावर, आम्ही शासन आहोत आणि आम्ही शेतकऱ्यांसोबत आहोत, असे भरणे म्हणाले. या प्रकल्पाच्या विरोधात उद्या, म्हणजे 31 ऑक्टोबर रोजी मोठे आंदोलन होणार आहे. राष्ट्रवादी काँग्रेस शरदचंद्र पवार पक्षाचे आमदार रोहित पवार, खासदार धैर्यशील मोहिते पाटील आणि माजी आमदार संजयमामा शिंदे यांच्या नेतृत्वात हे आंदोलन होणार आहे.

बँकांना आपण सूचना दिल्या आहेत की शेतकऱ्यांच्या मागे वसुलीचा तगादा लावू नका, असे भरणे म्हणाले. हे दिवस शेतकऱ्यांसाठी खूप अडचणीचे आणि संकटाचे आहेत, असे ते म्हणाले. फायनान्स कंपन्यांना कडक सूचना देण्यात याव्यात, यासाठी मुख्यमंत्री आरबीआयशी बोलणार आहेत. एवढे सांगूनही कंपन्या ऐकत नसतील, तर त्यांच्यावर कठोर कारवाई केली जाईल, असे भरणे यांनी सांगितले. आम्ही शेतकऱ्यांच्या बाजूनेच राहणार आहोत, शंभर टक्के कायदा करू, पण त्याआधी त्यांनी कायदा काय केला आहे याची माहिती घेणार आहोत, असेही ते म्हणाले. अडचणीच्या काळात सर्वांनी शेतकऱ्यांच्या पाठीशी उभे राहिले पाहिजे, असे त्यांचे म्हणणे होते.

अकोल्यातील विषयाबद्दल आपण स्वतः कलेक्टरशी बोललो आहोत, आणि फायनान्स कंपनीला बोलावून आम्ही कारवाई करू, असे ते म्हणाले. पदवीधर आणि शिक्षक मतदारसंघ निवडणूक निकालावरही भरणे यांनी प्रतिक्रिया दिली. विजय हा विजय असतो, शेवटी पराभवातून शिकले पाहिजे, पराभव मान्य करून विजयी उमेदवारांचे मी अभिनंदन करतो, असे ते म्हणाले.

पुणे पदवीधर निवडणुकीत राष्ट्रवादीचे कार्यकर्ते दिसले नाहीत, असे सांगितल्यावर भरणे म्हणाले की, हा तुमचा आरोप अत्यंत चुकीचा आहे. जिल्ह्यात राष्ट्रवादी काँग्रेस पक्ष पूर्णपणे सक्रिय होता. आमच्या प्रमुख सुनेत्रा वहिनी पवार यांनी आम्हाला आदेश दिले होते, आणि सर्वांनीच महायुतीचा प्रामाणिकपणे प्रचार केला, असे त्यांनी सांगितले. कोण काय म्हणतो याकडे लक्ष देण्याची गरज नाही, असेही भरणे म्हणाले.

संजय गायकवाड यांनी केलेल्या वादग्रस्त वक्तव्याबद्दल भरणे म्हणाले की, कोणीच असे विधान करू नये, कारण शेतकरी अडचणीत आहे. अशी विधाने कोणीच करू नयेत, हे मी तुमच्या माध्यमातून सांगतो, असे ते म्हणाले. या दुष्काळाच्या काळात वायफळ खर्च टाळावा आणि कमीत कमी खर्चात कार्यक्रम करावेत, असेही त्यांनी म्हटले. एकनाथ शिंदे साहेब हे त्यांच्या पक्षाचे प्रमुख आहेत, ते निर्णय घेतील, असे भरणे म्हणाले.