पुण्यातील मतदानात स्पायकॅम पेनचा आरोप; सुप्रिया सुळेंनी माहिती पाठवावी, फडणवीसांचे उत्तर

पुण्यात शुक्रवारी पदवीधर आणि शिक्षक मतदारसंघाच्या निवडणुकीसाठी मोठ्या उत्साहात मतदान सुरू होते. या मतदानात भाजपकडून स्पाय कॅमेऱ्याचा वापर होत असल्याचा गंभीर आरोप शरद पवार गटाच्या खासदार सुप्रिया सुळे यांनी केला. त्यावर मुख्यमंत्री देवेंद्र फडणवीस यांनी नागपूरमध्ये प्रसारमाध्यमांशी बोलताना उत्तर दिले.

सुप्रिया सुळे यांनी त्या स्पाय कॅमेऱ्याची माहिती आपल्याकडे पाठवावी, त्यावर योग्य ती कारवाई केली जाईल, असे फडणवीस यांनी सांगितले. स्पायकॅम म्हणजे काय आणि तो कसा असतो, हे सुप्रिया ताईंनी पाठवले तर तो पेन कसा असतो ते आपण समजून घेऊ आणि नेमके काय चालले आहे तेही समजून घेऊ, असे ते म्हणाले.

सुळे यांच्या म्हणण्यानुसार, स्पायकॅमच्या मदतीने पुण्यात मतदान केले जात आहे आणि भाजपला मतदान केल्यावर पैसे मिळत आहेत. पुणे शिक्षक आणि पदवीधर मतदारसंघाच्या निवडणुकीत पैसे वाटण्यासाठी स्पायकॅम असलेल्या पेनचा वापर होत असल्याच्या तक्रारी समोर येत आहेत, असे त्यांनी म्हटले.

मतदारांच्या खिशाला असा पेन लावायचा, भाजपच्या उमेदवाराला मतदान केल्याचा व्हिडिओ रेकॉर्ड करायचा आणि मतदानानंतर तो दाखवल्यावर ठरलेले पैसे द्यायचे, असा प्रकार सुरू असल्याचे मतदार सांगत आहेत, असे सुळे यांनी नमूद केले. या तक्रारी अत्यंत गंभीर आणि चिंताजनक आहेत, असे त्या म्हणाल्या.

मतदानाची गोपनीयता आणि मतदारांचे स्वातंत्र्य धोक्यात आणणाऱ्या या प्रकाराची निवडणूक आयोगाने आणि शासनाने तातडीने दखल घेऊन सखोल चौकशी करावी आणि दोषींवर कठोर कारवाई करावी, अशी मागणी सुळे यांनी केली. लोकशाहीच्या मूलभूत तत्त्वांना हरताळ फासणारे असे प्रकार कोणत्याही परिस्थितीत खपवून घेता कामा नयेत, निवडणूक प्रक्रिया निष्पक्ष, निर्भय आणि पारदर्शक वातावरणात पार पडलीच पाहिजे, असेही त्यांनी म्हटले.

नागपूरमधील मतदानाबद्दल बोलताना फडणवीस म्हणाले की तिथे मतदानाचा उत्साह दिसत आहे. नागपूर पदवीधर, अमरावती आणि पुणे शिक्षक, छत्रपती संभाजीनगर, पुणे पदवीधर या पाचही ठिकाणी मतदारांनी जास्तीत जास्त संख्येने मतदान करावे, असे आवाहन त्यांनी केले. विधानपरिषद हे ज्येष्ठांचे सभागृह आहे आणि मतदान चांगले पार पडेल असा विश्वास आहे, असे ते म्हणाले.

रांगा दिसत आहेत, लोक मतदानाचा हक्क बजावत आहेत, लोकशाहीत हेच अपेक्षित आहे, याचा आनंद आहे आणि योग्य पद्धतीचा निकाल लागेल असा विश्वास आहे, असेही फडणवीस यांनी सांगितले.

यावेळी फडणवीस यांनी मनोज जरांगे यांनी बाहेर काढलेल्या ऑडिओ क्लीपबाबतही भाष्य केले. काल शिवसेना नेत्यांचे शिष्टमंडळ आपल्याला भेटायला आले होते, असे त्यांनी सांगितले. समोर आलेल्या ऑडिओ क्लीपची आणि संभाषणाची फॉरेन्सिक तपासणी होईल, असे आश्वासन आपण शिवसेना नेत्यांना दिले आहे, असे ते म्हणाले.

अडीच वर्षांनंतर हे संभाषण बाहेर येण्यामागे काय हेतू आहेत, कोणाला टार्गेट केले जात आहे आणि कशासाठी, असा प्रश्न आम्हा सगळ्यांनाच पडला आहे, असे फडणवीस यांनी म्हटले. मनोज जरांगे यांनीही चौकशीची मागणी केली आहे, भाजप आणि शिवसेनेचीही तीच मागणी आहे आणि यातील सत्य आम्ही बाहेर काढू, असे त्यांनी सांगितले.