राणा सूर्यवंशी प्रकरणी धंगेकरांचे सवाल, आंदोलनाचा इशारा

पुणे : विधानपरिषदेच्या पदवीधर आणि शिक्षक निवडणुकीनंतर भाजप आणि शिवसेनेच्या शिंदे गटाच्या नेत्यांमध्ये आता शाब्दिक वाद सुरू झाला आहे. शिवसेनेचे नेते रवींद्र धंगेकर आणि भाजपचे प्रवक्ते नवनाथ बन यांनी एकमेकांवर टीका केली होती. त्यानंतर आता धंगेकर यांनी आपला रोख मुख्यमंत्री देवेंद्र फडणवीस यांच्याकडे वळवल्याचे दिसते.

धंगेकर यांनी आज पत्रकार परिषद घेतली. बारामतीतील उद्योजक राणा सूर्यवंशी यांच्यावर गोळीबार आणि हल्ला झाल्यामुळे ते गेले काही दिवस चर्चेत आहेत. याच प्रकरणावरून धंगेकर यांनी मुख्यमंत्री आणि पोलिसांवर टीका केली. राज्याचे गृहखाते काय करत आहे, असा सवाल त्यांनी केला. भाजपच्या कार्यकर्त्यांनी मला टार्गेट केले, मी खरे बोलतो आहे, मी सत्य मांडत होतो, असेही ते म्हणाले.

धंगेकर यांच्या म्हणण्यानुसार, सूर्यवंशी हे उद्योजक आहेत आणि एका बनावट हल्ल्याच्या प्रकरणात त्यांचे नाव आले होते. त्यांनी अनेकदा खोटे बोलून हल्ले घडवले आणि सरकारकडून Y सुरक्षा घेतली, असा दावा धंगेकर यांनी केला. त्यांच्यावर हल्ला कोणी केला, हत्यारे कुठून आली, असे प्रश्न त्यांनी विचारले. दाते साहेब याचा तपास करत आहेत, मग पोलीस महासंचालकांवरच ही जबाबदारी नेमकी का दिली, हा माणूस कुणाच्या जवळचा आहे, राणा सूर्यवंशी नेमके कोणाचे आहेत, असेही ते म्हणाले. पोलिसांच्या हातावर तुरी देऊन हा कुठे फिरतोय, याच्या मागे गृहखाते आहे का, मुख्यमंत्री याच्या मागे आहेत का, असे सवाल धंगेकर यांनी उपस्थित केले.

गडचिरोलीतील प्रकल्पाबद्दलही धंगेकर यांनी प्रश्न केले. माहिती घेतल्यानंतर सूर्यवंशी यांनी गडचिरोलीत 264 एकरांचा प्रकल्प केल्याचे समजले, असे ते म्हणाले. या प्रकल्पासाठी नोंदणी विभाग, तलाठी विभाग आणि महसूल विभागाकडून जमिनी कशा हस्तगत केल्या, हा प्रकल्प कोणाच्या आशीर्वादाने सुरू झाला, कोणाचा ब्लॅक पैसा व्हाईट केला जातोय का, किंवा कोणाच्या ब्लॅक पैशाला संरक्षण दिले जातेय का, याचा तपास झाला पाहिजे, अशी त्यांची मागणी आहे. त्यांच्या म्हणण्यानुसार सूर्यवंशी यांच्या घरातील काही लोक महसूल खात्यात अधिकारी म्हणून काम करतात. हल्ला एकदाच झाला का, की अनेकदा बनावट हल्ले घडवून स्वतःचा फायदा करून घेतला गेला, आणि हेलिकॉप्टरपर्यंत प्रवास कसा झाला, असेही ते म्हणाले. अनेक हेलिकॉप्टरचे ते मालक आहेत, मग ते देवेंद्र फडणवीस साहेबांच्या जवळ कसे पोहोचले, काहीतरी चुकीची मांडणी करून ते त्यांच्यापर्यंत पोहोचले का, याचाही तपास व्हावा, असे धंगेकर यांनी सांगितले.

दौंड तालुक्यातील चिंचोली गावातील एका संस्थेचा उल्लेखही त्यांनी केला. पोलिसांना हाताशी धरून आणि ओळखीचा फायदा घेऊन ही व्यक्ती तिथल्या सज्जन लोकांना, त्या कुटुंबाला सतत त्रास देते, असा आरोप त्यांनी केला. पोलीस खाते अशा व्यक्तीच्या पाठीशी उभे राहत असेल, तर भाजपमधील काही मंडळी सध्या रस्त्यावर फिरतात, त्यांनी महाराष्ट्राला उत्तर द्यावे, मला उत्तराची गरज नाही, असे धंगेकर म्हणाले. अमित शहा आणि पंतप्रधान मोदी यांनी यात लक्ष घालावे, अशी विनंतीही त्यांनी केली. बनावट उद्योजकांना वेळेत जेलमध्ये पाठवले नाही, तर यापेक्षा मोठे कांड होतील, असे त्यांचे म्हणणे आहे. सर्वसामान्य लोकांना साधे पोलीस संरक्षण मिळत नाही, पण बनावट प्रकरणे पोलिसांच्या डोळ्यांत धूळ फेकून होत असतील, तर छत्रपती शिवरायांच्या महाराष्ट्रात याचा जेवढा निषेध करू तेवढा कमी आहे, असेही ते म्हणाले.

गेले 8 दिवस अनेक वर्तमानपत्रांत बातम्या येत आहेत, तरीही पोलीस दुर्लक्ष करतात, असे धंगेकर यांनी सांगितले. आठ दिवस झाले तरी आरोपीवर गुन्हा का दाखल होत नाही, आणि तो होत नसेल तर त्याला कोणाचे संरक्षण आहे, असा त्यांचा सवाल आहे. आज वाट बघणार, या प्रकरणात सोक्षमोक्ष लागला नाही तर मुंबईत पोलीस महासंचालकांच्या ऑफिसबाहेर आंदोलन करणार, असा इशारा त्यांनी माध्यमांशी बोलताना दिला. महासंचालकांनी याची नोंद घ्यावी आणि महाराष्ट्राच्या पोलिसांची बदनामी टाळावी, असेही धंगेकर म्हणाले.