जावळकर यांचा नवनाथ बन यांना इशारा: शिंदेंवर बोलल्यास जशास तसे उत्तर देणार

राज्यातील पदवीधर आणि शिक्षक मतदारसंघाच्या निवडणुकीचा निकाल लागल्यानंतर भाजप आणि एकनाथ शिंदे यांची शिवसेना यांच्यात राजकीय वाद सुरू झाला आहे. पुण्यात शिंदेंच्या शिवसेनेने साथ दिली नाही, म्हणून भाजपच्या उमेदवाराचा पराभव झाला, असा आरोप भाजपचे प्रवक्ते नवनाथ बन यांनी केला होता. त्यानंतर शिंदेंच्या शिवसेनेचे नेते आक्रमक झाले असून युवा सेनेचे राज्य समन्वयक अनिकेत जावळकर यांनी बन यांच्यावर जोरदार टीका केली आहे.

शिवसेना आणि एकनाथ शिंदे यांची प्रतिमा मलीन करण्याचा प्रयत्न "बनपाव आणि त्याचा आका" करत आहेत, असा आरोप जावळकर यांनी केला. बनपावला भाजपने समज द्यावी, असे ते म्हणाले. हा बनपाव रोज मोक्काट सुटलेला आहे, असेही जावळकर यांनी म्हटले. तो शिवसेनेवर बोलत राहिला, तर जशास तसे उत्तर देऊ, असा इशारा त्यांनी दिला.

जावळकर यांच्या म्हणण्यानुसार, एकनाथ शिंदे यांचे नेतृत्व मोठे होत असल्यामुळे काही लोकांच्या पोटात दुखत आहे. एखादा मराठी नेता मोठ्या उंचीवर पोहोचत असेल किंवा पुन्हा मुख्यमंत्री होण्याच्या दिशेने जात असेल, तर त्याला कसे रोखायचे आणि त्याचे नेतृत्व कसे दाबायचे, यासाठी काही जण राजकारण करत आहेत, असा आरोप त्यांनी केला. पूर्णेकर प्रकरण असो किंवा जरांगे पाटील यांच्याशी संबंधित विषय, या घटनांमधून शिंदे साहेबांची प्रतिमा खराब करण्याचा प्रयत्न होत आहे, असेही जावळकर यांनी म्हटले.

पुढे बोलताना जावळकर यांनी नवनाथ बन यांना सुनावले की, स्वतःच्या कामातून नेतृत्व उभे करा. दुसऱ्याची प्रतिमा मलीन करून किंवा त्याचे नेतृत्व संपवून मोठे होण्याचा प्रयत्न करू नका. असले राजकारण यापुढे खपवून घेतले जाणार नाही, असे ते म्हणाले. येत्या काळात आम्हीही जशास तसे उत्तर द्यायला तयार आहोत, असा इशारा त्यांनी दिला.

एकनाथ शिंदे हेच पुढे मुख्यमंत्री होतील, असा ठाम विश्वास जावळकर यांनी व्यक्त केला. त्यांच्या पाठीशी शिवभक्त, हिंदुत्ववादी विचारांचे कार्यकर्ते, शिवसैनिक, युवासैनिक आणि महिला आघाडीच्या कार्यकर्त्या ठामपणे उभ्या आहेत, असे ते म्हणाले. अहोरात्र, अगदी मध्यरात्रीसुद्धा शिंदे साहेबांसोबत काम करायला आम्ही तयार आहोत, असेही त्यांनी सांगितले.

आम्ही कोणाचे नेतृत्व दाबण्यासाठी किंवा कोणाला संपवण्यासाठी राजकारण करत नाही, आम्ही कर्तृत्वाच्या मागे उभे राहणारे लोक आहोत, असे स्पष्ट करत अनिकेत जावळकर यांनी भाजप प्रवक्ते नवनाथ बन यांच्या आरोपांना प्रत्युत्तर दिले.